قوستاناي وبلىسىنىڭ اۋداندارىندا پوليتسەيلەر جەتكىلىكسىز. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى «پوليتسيا دەپارتامەنتى باستىعىنىڭ ورىنباسارى ارداق ىنتىقباەۆ مالىمدەدى» دەپ حابارلادى.
پوليتسيا دەپارتامەنتىندە وڭىرگە قاراستى پوليتسيا باسقارمالارى مەن بولىمشەلەرى باستىقتارى ورىنباسارلارىنىڭ قاتىسۋىمەن وتكەن جينالىستا كادر جاساقتاۋ ماسەلەسى كوتەرىلدى. پوليتسيا پولكوۆنيگى ا.ىنتىقباەۆتىڭ ايتۋىنشا, ءتارتىپ ساقشىلارى قاتارىن تولىقتىرۋ ءۇشىن اتقارىلار بىرقاتار جۇمىس كۇتىپ تۇر. جەرگىلىكتى جەردە جاستارمەن كەزدەسۋلەر ۇيىمداستىرىلىپ, ىشكى ىستەر ورگانىنا قىزمەتكە ورنالاسۋ جەڭىلدىكتەرى قاراستىرىلماق.
مىسالى, بۇگىندە كادر تاپشىلىعى قوستاناي جانە رۋدنىي قالاسى مەن جىتىقارا, سارىكول اۋداندارىندا ايقىن بايقالادى.
«ىشكى ىستەر ورگاندارىندا تەك ءبىلىمدى ءارى شىنىققان شىمىر, كاسىبي دايىندىعى مىقتى ازاماتتار عانا جۇمىس ىستەي الادى. ءيا, تالاپ تىم جوعارى, سوعان قاراماستان ىنتالىلار دا كوپ, تەك ءتۇسىندىرۋ جۇمىستارى ءتيىستى دەڭگەيدە جۇرمەي جاتىر. اسىرەسە, اۋىلدى جەرلەردە. بۇگىندەرى پوليتسيا قىزمەتىنىڭ جاۋاپكەرشىلىگىمەن قاتار, الەۋمەتتىك مارتەبەسى جانە قارجىلىق جاعدايى دا جاقسارىپ كەلەدى. سونداي-اق, ورگاندا جۇمىس ىستەيتىن ازاماتتارعا باسقا دا جەڭىلدىكتەر قاراستىرىلعان. بۇل ءوز وتانى ءۇشىن ادال قىزمەت ەتۋ مۇمكىندىگى» دەدى دەپارتامەنت باستىعىنىڭ ورىنباسارى, پوليتسيا پولكوۆنيگى ارداق ىنتىقباەۆ.
ماجىلىستە, اسىرەسە, شالعايداعى ەلدى مەكەندەرگە مامان تارتۋ ماسەلەسى قارالدى. ءال-ءازىر جاستاردىڭ اۋىلعا بارعىسى جوق, دەگەنمەن اۋداندىق پوليتسيا بولىمشەلەرى قول قۋسىرىپ وتىرمايدى. جوعارى وقۋ ورىندارىندا وقيتىن, اسكەري بورىشىن وتەپ جۇرگەن جاستارمەن تۇراقتى كەزدەسۋلەر ءوتىپ تۇرادى. ءتىپتى, وزگە وبلىستاعى جاستارعا دا ۇسىنىس ايتۋدا. ماسەلەن, رۋدنىي قالالىق پوليتسيا باسقارماسىنا جۋىردا تۇركىستان وبلىسىنان جاس مامان كەلمەك.
ارداق ىنتىقباەۆ جاستاردى ءتارتىپ ساقشىسى بولۋعا, پولتسيا قاتارىندا قىزمەت ەتۋگە شاقىردى.