ءمالىم بولعانداي دارىگەر ن. وتارعازيەۆ وبلىستىق بالالار اۋرۋحاناسىنىڭ قابىلداۋ بولىمىندە نەمەرەسىن قاراتۋعا كەلگەن ازاماتشامەن سوزگە كەلىپ, تۇسىنبەۋشىلىك كەزىندە ءبىر-ءبىرىن بالاعاتتاعان. جەكە باستىڭ ار-نامىسىنا تيەتىن سوزدەر ايتىلعان, ەكەۋارا جانجال كەزىندە اينالاسىنداعىلارعا كەدەرگى كەلگەن. تەكسەرىس بارىسىندا, اقتاۋ قالاسى مامانداندىرىلعان اكىمشىلىك سوتىنىڭ 2019 جىلعى 19 شىلدەدەگى قاۋلىسىمەن وبلىستىق بالالار اۋرۋحاناسىنىڭ حيرۋرگ دارىگەر قازاقستان رەسپۋبليكاسى اقبتك-ءنىڭ 434-بابىنىڭ 2-بولىگىندە كوزدەلگەن اكىمشىلىك قۇقىق بۇزۋشىلىق جاساعانى ءۇشىن كىنالى دەپ تانىلىپ, وعان وسى باپپەن 1 تاۋلىك مەرزىمگە اكىمشىلىك قاماققا الۋ تۇرىندەگى اكىمشىلىك جازا قولدانعان. مامانداردىڭ ايتۋىنشا, اتالمىش دارىگەردىڭ اتىنا بۇعان دەيىن دە ارىز ءتۇسىپ, ياعني, اقتاۋ قالاسى مامانداندىرىلعان اكىمشىلىك سوتىنىڭ 05.03.2019 جىلعى قاۋلىسىمەن قر اقبتك-ءنىڭ 434 بابىنىڭ 1 بولىگىمەن اكىمشىلىك جاۋاپكەرشىلىككە تارتىلىپ, وعان ايىپپۇل سالىنعان.
-قاۋلى زاڭدى كۇشىنە ەنگەن جوق. سوت قاۋلىسىنا تاراپتار ون تاۋلىك iشiندە اپەللياتسيالىق شاعىم نەمەسە ءوتىنىشحات كەلتىرە الادى, دەدى اقتاۋ قالاسى مامانداندىرىلعان اكىمشىلىك سوتىنىڭ سۋدياسى سۇيەۋوۆا گۇلميرا.
سونداي-اق, ەكىنشى تاراپ تا اقتاۋ قالاسىنىڭ مامانداندىرىلعان اكىمشىلىك سوتىنىڭ 2019 جىلعى 19 شىلدەدەگى قاۋلىسىمەن قازاقستان رەسپۋبليكاسى اقبتك-ءنىڭ 434-بابىنىڭ 1-بولىگىمەن كىنالى دەپ تانىلىپ, وعان 5 ايلىق ەسەپتىك كورسەتكىش مولشەرىندە اكىمشىلىك ايىپپۇل تولەۋ جونىندە شەشىم شىعارىلعان.
ماڭعىستاۋ وبلىسى