جۇرەك جۇتقاندارى اجەپتاۋىر بيىكتىككە كوتەرىلىپ, شىركوبەلەك اينالعاندى ۇناتسا, تاۋەكەل ەتە بەرمەيتىندەرى قىزىقتاۋمەن عانا شەكتەلەدى. جىل وتكەن سايىن وسىندا ورنالاسقان اتتراكتسيوندار پاركىنىڭ الەۋەتتىك قۋاتى ارتىپ, جاڭا قۇرىلعىلارمەن تولىعىپ كەلەدى. وسىدان بىرنەشە جىل بۇرىن «دامۋ» كاسىپكەرلىكتى قولداۋ قورى ارقىلى جەڭىلدىكتى نەسيەمەن بىرنەشە اتكەنشەك ساتىپ الىنسا, ەندى سەرۆيستىك قىزمەتتىڭ ساپاسىن جاقسارتۋعا بەت بۇرعان ءتارىزدى.
«مير اتتراكتسيونوۆ» جشس-ءنىڭ ديرەكتورى الەكساندر كوزلوۆتىڭ ايتۋىنشا, جاڭا جۇيە ەنگىزىلگەلى ءبىر ورتالىقتان باسقارۋ مۇمكىندىكتەرى الدەقايدا جەڭىلدەگەن. فۋنكتسيونالدى وپەراتسيالار «R-Keeper» باعدارلاماسى ارقىلى اتقارىلادى. دەمالۋشىلار ەندى ءار كاسساعا جۇگىرىپ, اۋرە بولمايدى. بۇل دا بىرىڭعاي تولەم كارتاسىنىڭ ارتىقشىلىعى. 10 ميلليون تەڭگەنىڭ قۇرىلعىسى پايدامەن جۇمىس ىستەيتىنىنە ەش كۇمانىمىز جوق. قازىردىڭ وزىندە شىعىنىمىزدى ەداۋىر ازايتىپ وتىرمىز, دەيدى ول.
پەتروپاۆل دەمالىس جانە مادەنيەت ساياباعى ەلىمىزدەگى ەڭ ۇزدىكتەردىڭ قاتارىندا. اۋماعى اباتتاندىرىلىپ, قاراعاي, قايىڭ, ەمەن اعاشتارى جايقالا ءوسىپ تۇر. كەزىندە «حرۋستالنوە كولەسو», «زولوتوي پوني موسكۆا» سەكىلدى ايتۋلى حالىقارالىق بايقاۋلاردا جۇلدەگەر اتانعانى تەگىن بولماسا كەرەك. وسى سەبەپتى بولار, 32 اتتراكتسيون قالالىقتارعا ءمىنسىز قىزمەت ەتىپ تۇر. ءبىر ماۋسىمدا ورتا ەسەپپەن 70-75 مىڭداي ادام سەرۋەندەۋگە كەلەتىن كورىنەدى.
ء بىر «اتتەگەنايى», وتكەن جىلدان بەرى اتتراكتسيوندىق قوندىرعىلاردى مىندەتتى سەرتيفيكاتتاۋ تالابى ەنگىزىلگەلى شەتەلدىك ستاندارتتار جارامسىز بولىپ قالىپتى. ال قازاقستاندا اتتراكتسيوندىق تەحنيكالار شىعارۋمەن اينالىساتىن كاسىپورىندار جوقتىعى ماتەريالدىق-تەحنيكالىق بازانى جاڭالاۋعا قولبايلاۋ بولىپ وتىرعان ءتارىزدى. قاراجات تابىلعانىنا قاراماستان...
پەتروپاۆل