– ۇلان توقتارباي ۇلى, «نۇرلى جول» باعدارلاماسى قازاقستان جولدارىنىڭ جاقسارۋىنا قانشالىقتى اسەر ەتتى؟
– «نۇرلى جول» مەملەكەتتىك باعدارلاماسى دۇنيەجۇزىلىك ەكونوميكالىق داعدارىس تۇسىندا قابىلداندى. اقش پرەزيدەنتى رۋزۆەلت ەلدە ەكونوميكالىق داعدارىس باستالعاندا حالىقتىڭ جاعدايىن جاقسارتۋ ءۇشىن تاسجول سالۋعا ءمان بەرگەن ەكەن. ساراپشىلار وسى ارقىلى امەريكانىڭ الەۋمەتتىك-ەكونوميكالىق جاعدايى جاقساردى دەپ ءجيى ايتادى. ەلىمىزدە دە وسى تاجىريبە ەسكەرىلگەن بولار, 2015-2020 جىلدارى «ورتالىق – وڭتۇستىك», «ورتالىق – شىعىس», «ورتالىق – باتىس» سياقتى ءىرى اۆتوجول جوبالارى ىسكە قوسىلدى. بۇل جونىندە ەلباسى «اۆتوكولىك جولى, تەمىر جولى بولاشاق ۇرپاق ءۇشىن سالىنىپ جاتىر. قازاقستاننىڭ بارلىق جەرىندە توقتاماستان جول سالىنۋدا. استانادان تارايتىن ساۋلە سياقتى جان-جاققا شىعاتىن ساپالى جول بولادى. سوندىقتان بۇل جولداردىڭ ساپاسىنا ۇلكەن كوڭىل ءبولۋ كەرەك» دەگەن بولاتىن.
ياعني, ءاۋ باستاعى ماقسات – ەلوردانى بارلىق وڭىرمەن بايلانىستىرىپ, بارىس-كەلىستى نىعايتۋ. وسى ارقىلى ەكونوميكا وسىمىنە جاعداي جاسالىپ, مىڭداعان جۇمىس ورىندارى اشىلدى. بارشا قازاقستاندىقتاردىڭ الەۋمەتتىك جاعدايىن جاقسارتۋعا ىقپال ەتتى. مىڭداعان ازامات ەكى قولعا ءبىر كۇرەك تاۋىپ, وتباسىن اسىراۋعا مۇمكىندىك الدى. بارلىق جوبالاردى ىسكە اسىرۋ بارىسىندا 127 مىڭ ۋاقىتشا, 34 مىڭ تۇراقتى جۇمىس ورنى اشىلدى. ءبىر وتباسىندا 4-5 ادام بار دەپ ەسەپتەسەك, باعدارلاما ارقىلى 600-700 مىڭ ادامنىڭ كۇنكورىس ساپاسى جاقساردى. ودان بولەك, جول قۇرىلىسى ءجۇرىپ جاتقان كۇرە جولدىڭ بويىنداعى اۋىل ادامدارى دا جۇمىسقا تارتىلدى. ولار جولشىلاردى ازىق-ت ۇلىكپەن قامتاماسىز ەتىپ, وزگە دە تۇرمىستىق قىزمەتتەر كورسەتتى. «نۇرلى جول» سونىمەن قاتار ەل ەكونوميكاسىن كوتەرۋگە مۇمكىندىك بەردى. مىسالى, بىلتىر نەگىزگى كاپيتالعا سالىنعان ينۆەستيتسيالاردىڭ ناقتى ءوسىمى 6,1%-عا, مولشەرمەن 1,5 ترلن تەڭگەگە جەتتى. سونداي-اق كولىكتىك قىزمەتتىڭ كولەمى 4,6%-عا, ەڭبەك ونىمدىلىگى 3,4%-عا جوعارىلادى. ونىڭ ۇستىنە «باتىس ەۋروپا – باتىس قىتاي» جوباسى اياسىندا 47 جاڭا ءوندىرىس ورنى اشىلىپ, 73 قىزمەت كورسەتۋ نىسانى قۇرىلدى. بۇل ورتاشا جىلدىق جيىنتىق تيىمدىلىكتىڭ 200 ميلليارد تەڭگەگە جەتكەنىن بىلدىرەدى.
– ەلىمىزدەگى جولدىڭ ساپاسى تۋرالى حالىق اراسىندا ءارتۇرلى سىني پىكىرلەر ايتىلىپ جاتادى. سوڭعى جىلدارى حالىقتى مەزى ەتكەن قانداي جولداردا جوندەۋ جۇمىستارى جۇرگىزىلىپ جاتىر؟
– سوڭعى 10 جىلدا اۆتوجول سالاسىندا 9 مىڭ شاقىرىم رەسپۋبليكالىق ماڭىزى بار جولعا قايتا جاڭارتۋ جۇمىستارى جۇرگىزىلدى, ونىڭ ناتيجەسىندە جولدىڭ جاي-كۇيى 21 پايىزعا جاقساردى, ناشار جولدار 40 پايىزدان 12 پايىزعا ازايدى. بۇگىنگى تاڭدا «نۇرلى جول» ينفراقۇرىلىمدى دامىتۋدىڭ مەملەكەتتىك باعدارلاماسىنا سايكەس رەسپۋبليكا كولەمىندە جالپى ۇزىندىعى 4400 شاقىرىمدا قايتا جاڭارتۋ جۇمىستارى بويىنشا 14 جوبا جۇزەگە اسىرىلۋدا, وندا 18 مىڭ ادام جانە 12 مىڭعا جۋىق تەحنيكا جۇمىلدىرىلعان. بۇدان بولەك 428 شاقىرىمدا كۇردەلى جوندەۋ, 1415 شاقىرىمدا ورتاشا جوندەۋ, 19,6 مىڭ شاقىرىمدا كۇتىپ ۇستاۋ جۇمىستارى جاسالۋدا. اتالعان جوبالارعا ورتالىق – وڭتۇستىك, ورتالىق – شىعىس, ورتالىق – باتىس, ورتالىق – سولتۇستىك دالىزدەرى قاراستى. سونىمەن قاتار حالىقارالىق دالىزدەر مەن شەكارا ماڭىنداعى باعىتتارعا دا باسىمدىق بەرىلەدى: الماتى – وسكەمەن, ءۇشارال – دوستىق, بەينەۋ – اقجىگىت, قالباتاۋ – مايقاپشاعاي, اقتوبە – اتىراۋ – رف شەكاراسى. بۇگىنگى تاڭدا بارلىق جوبالار بويىنشا شارالار ۇيىمداستىرىلىپ, جۇمىستار ءجۇرىپ جاتىر. مەردىگەرلىك شارتتارىنا قول قويىلىپ, دايىندىق جۇمىستارى جاسالىپ, قۇرىلىس جۇمىستارى باستالۋدا.
ينفراقۇرىلىمدىق جوبالاردى جۇزەگە اسىرۋعا ينۆەستيتسيالاردى تارتۋ بويىنشا ءبىرشاما جۇمىس اتقارىپ جاتىرمىز. مەملەكەتتىك ەمەس قارىز ەسەبىنەن مەملەكەتتىك كەپىلدىكپەن ەۋروپالىق قايتا قۇرۋ جانە دامۋ بانكىمەن جانە قحر ەكسيمبانكىمەن كەلىسىم جاسالدى. تارتىلعان قاراجاتتىڭ ەسەبىنەن 2019 جىلى تالدىقورعان – وسكەمەن (763 كم), قالباتاۋ – مايقاپشاعاي (415 كم), مەركى – بۋرىلبايتال (266 كم), نۇر-سۇلتان قالاسى وڭتۇستىك-باتىس اينالما جولى (34 كم), كۇرتى – بۋرىلبايتال (143 كم) ۋچاسكەلەرىندە جۇمىستار جالعاسۋدا. جۇمىس جوسپارىنا سايكەس بيىل 548 شاقىرىم جولدى پايدالانۋعا بەرەمىز دەپ وتىرمىز. مۇنىڭ ءبارى حالىقتىڭ يگىلىگى ءۇشىن جاسالىپ جاتقان دۇنيەلەر, ءسال سابىر ساقتايىق, الداعى بەس جىلدا قازاقستانداعى جول جاعدايى جاقسارادى.
– «اپات ايتىپ كەلمەيدى» دەمەكشى, ەلىمىزدىڭ كەيبىر ايماعىندا سۋ تاسقىندارى بولىپ جاتادى. سونداي-اق قىس مەزگىلىندە قار باسىپ, بارىس-كەلىستى قيىنداتىپ جاتاتىنى دا جاسىرىن ەمەس. «QazAvtoJol» سۋ تاسقىنى جانە قار باسىپ قالۋ جاعدايىندا قالاي ارەكەت ەتەدى؟
– قازىر رەسپۋبليكالىق ماڭىزى بار اۆتوموبيل جولدارىنىڭ جالپى جەلىسى 24,4 مىڭ شاقىرىمدى قۇرايدى. جالپى جول قۇرىلىستارىن جانە بولىنگەن بەلدەۋدى كۇتىپ ۇستاۋ, تۇراقتى پايدا بولاتىن ۇساق زاقىمدانۋلاردىڭ الدىن الۋ وڭاي ەمەس. سونداي-اق تاس جولدى قىس جانە جاز مەزگىلىندە كۇتىپ ۇستاۋ دا مىندەتىمىز. ويتكەنى «QazAvtoJol» ۇك» اق – رەسپۋبليكالىق ماڭىزى بار اۆتوموبيل جولدارىن باسقارۋ جونىندەگى ۇلتتىق وپەراتور. اعىمداعى جىلى بۇل اۆتوجولداردى كۇتىپ ۇستاۋ ماقساتىندا بيۋدجەتتەن 26 ملرد تەڭگەدەن استام قاراجات ءبولىندى. جىل سايىن كوكتەم, جاز مەزگىلىندە جۇمىستاردى جۇرگىزۋ ءۇشىن قوزعالىس قاۋىپسىزدىگى جونىندەگى كەشەندى ماقساتتى باعدارلاما ازىرلەنەدى. ونىڭ اياسىندا شۇڭقىرلاردى جوندەۋ, ياعني ۇساق دەفورماتسيالار مەن زاقىمدانۋلاردى جويۋ جۇمىستارى جۇرگىزىلەدى. سونىمەن قاتار اسفالتبەتوندى جانە تسەمەنت-بەتوندى جامىلعىلاردا جارىقتاردى قۇيۋ, تسەمەنت-بەتوندى جامىلعىلاردا دەفورماتسيالىق جىكتەردى قالپىنا كەلتىرۋ جانە تولتىرۋ جۇمىستارى ءبىزدىڭ موينىمىزدا.
بۇدان بولەك ءبىزدىڭ باقىلاۋىمىزعا «قازاقاۆتوجول» جشس ارقىلى جول بەلگىلەرىن ورناتۋ جانە اۋىستىرۋ, دەمالىس الاڭدارىن جانە اۆتوپاۆيلوندار سىندى, ت.ب. جوندەۋ جۇمىستارى كىرەدى. اعىمداعى جىلدىڭ ماۋسىمىندا كەشەندى ماقساتتى باعدارلاما اياسىندا 514 مىڭ شارشى مەتر كولەمىندە شۇڭقىرلاردى جوندەۋ, جارىقتاردى قۇيۋ, جولتابانداردى جانە تاراقتاردى جويۋ, 13 مىڭنان استام جول بەلگىلەرىن ورناتۋ جۇرگىزىلدى. سونىمەن قاتار ۇزىندىعى 21,7 مىڭ كم ءجۇرىس بولىگىن بەلگىلەۋ, 28 مىڭ قورشاۋلاردى ورناتۋ جانە اۋىستىرۋ, 205 اۆتوپاۆيلون مەن دەمالىس الاڭىن جوندەۋ جوسپارلانۋدا. جولدى كۇتىپ ۇستاۋ شەڭبەرىندە رەسپۋبليكالىق ماڭىزى بار اۆتوموبيل جولدارىندا سۋ تاسقىنى مەن مۇز ءجۇرۋ كەزەڭىندە قاۋىپتىڭ الدىن الۋ بويىنشا جۇمىستار جۇرگىزىلىپ تۇرادى. رەسپۋبليكالىق ماڭىزى بار اۆتوجولدار جەلىسى بويىنشا اعىمداعى جىلى ۇزىندىعى 298 كم بولاتىن 456 سۋ تاسقىنى قاۋپى بار ورىن, 827 قۇبىر, 61 كوپىر, 9 بوگەت انىقتالعان. ايتالىق, قاراعاندى وبلىسىندا 6, شىعىس قازاقستان وبلىسىندا 2, الماتى وبلىسىندا 1 بوگەتتىڭ تاسقىن سالدارىنان قيراۋى تىركەلدى. بارلىق سۋ تاسقىنى قاۋپى بار ۋچاسكەلەردىڭ بۇزىلۋىنا جول بەرمەۋ جانە ۇزدىكسىز جول قوزعالىسىن قامتاماسىز ەتۋ بويىنشا ۋاقتىلى شارالار قابىلداندى.
ەلىمىزدىڭ كەيبىر ايماعىندا 6 اي قىس بولىپ, جول ءجۇرۋ مۇمكىندىگى قيىنداي تۇسەدى. قارلى بورانداردا جولاۋشىلاردىڭ قاۋىپسىزدىگىن ساقتاپ, دىتتەگەن جەرىنە امان-ەسەن جەتۋى وتە ماڭىزدى ماسەلە. سوندىقتان دا جولداعى قاردى دەر كەزىندە تازالاپ, كوكتايعاق بولسا قۇم نەمەسە قۇمدى تۇز سىندى ءارتۇرلى قوسپا سەبەمىز.
شىنى كەرەك, وسى رەتتە ءبىزدىڭ جۇمىستاعى جەكەلەگەن پروبلەمالار تۋرالى ايتىپ وتكەن ءجون. قازىرگى تاڭدا اۆتوجولداردى ۇستاۋعا ارنالعان جول-پايدالانۋ تەحنيكاسى جەتكىلىكسىز بولىپ وتىر. قولدا بار تەحنيكانىڭ كەيبىرى توزىپ, كەرەك شاقتا جۇرمەي قالاتىنى جاسىرىن ەمەس. وسى ولقىلىقتىڭ ورنىن تولتىرۋ ءۇشىن «قازاقاۆتوجول» جشس جەكە قازاقستاندىق كومپانياعا ءۇش جىل مەرزىمگە سەنىمگەرلىك باسقارۋعا بەرىلدى. سەنىمگەرلىكپەن باسقارۋ شارتى بويىنشا, كومپانيا 300 بىرلىك جول تەحنيكاسى مەن 200 دانا قۇرال-جابدىقتار ساتىپ الۋعا مىندەتتى. وسى تەحنيكا مەن جابدىقتاردى ساتىپ الۋ اۆتوجولداردى تازالاۋ, كۇتىپ ۇستاۋ جۇمىستارىنىڭ ناتيجەلەرىنە وڭ اسەرىن تيگىزەدى دەپ ۇمىتتەنەمىز.
– جول بويىنداعى تازالىق – باستى ماسەلە. «QazAvtoJol» تاس جولداعى تازالىقتى قالاي ساقتاپ وتىر؟ بۇدان بولەك اجەتحانا ماسەلەسىنە دە ءجۇردىم-باردىم قاراۋعا بولمايتىن ءتارىزدى...
– تەحنولوگيالىق تالاپقا سايكەس اۆتوجولداردى تازارتۋ جىل بويى جۇرگىزىلۋى ءتيىس. قويىلاتىن مىندەتتەرگە بايلانىستى تازالاۋدىڭ ءتۇرلى ادىستەرى مەن تاسىلدەرىن پايدالانامىز. ونىڭ ىشىندە مەحانيكالىق نەمەسە قولمەن اتقارىلاتىن شارۋالار دا بار. جالپى, رەسپۋبليكالىق ماڭىزى بار اۆتوموبيل جولدارىندا قىسى, جازى جۇمىس جۇرگىزۋگە ارنالعان تەحنيكالار بار. قازىرگى ۋاقىتتا بۇل جۇمىستاردىڭ ءبارىن بىزگە قاراستى «قازاقاۆتوجول» جشس جانە ۇلتتىق كومپانيانىڭ وڭىرلىك فيليالدارى جۇرگىزەدى.
سونداي-اق كوپشىلىك جول بويىنداعى دارەتحانالاردىڭ تازالىعىنا بايلانىستى سىن ايتىپ جاتاتىنى جاسىرىن ەمەس. جالپى دارەتحانالاردىڭ تالاپقا ساي بولماۋى حالىقتىڭ كوڭىل كۇيىن ءتۇسىرىپ, ءبىزدىڭ جۇمىسىمىزدى جوققا شىعارىپ جىبەرەتىنى انىق. سوندىقتان «QazAvtoJol» ۇك» اق قر يدم اۆتوموبيل جولدارى كوميتەتىمەن بىرلەسە وتىرىپ 2019-2022 جج 304 سانيتارلىق-گيگيەنالىق توراپتى (سگت) ورناتۋ بويىنشا باعدارلاما جاسادى. جوبا بويىنشا قايتا جاڭارتۋ جۇمىستارىمەن قامتىلعان رەسپۋبليكالىق اۆتوجولداردا 109 بىرلىك سگت ورناتۋ جوسپارلانعان.
سونىمەن قاتار جول بويىنداعى سەرۆيستىڭ جاڭا نىساندارىنىڭ قۇرىلىسىنا ينۆەستورلار تارتىلۋدا. 2019 جىلدىڭ 1-جارتى جىلدىعىندا ۇلتتىق ستاندارتتارعا سايكەس 20 سەرۆيس نىسانى اشىلدى.
اۆتوموبيل جولدارىنىڭ تۇتىنۋشىلارىن ۇلتتىق ستاندارتتارعا ساي ەمەس سەرۆيس قىزمەتىنەن ساقتاندىرۋ ماقساتىندا, قر «اۆتوموبيل جولدارى تۋرالى» زاڭىنا وزگەرىستەر ەنگىزۋ ماسەلەسىن قوعاممەن تالقىلاۋدامىز. ۇلتتىق ستاندارتتارعا سايكەس كەلمەيتىن سەرۆيس نىساندارىنا (جايلى جابدىقتالعان دارەتحانالارى جوق نىساندار) قولجەتىمدىلىكتى شەكتەۋ ماسەلەسى دە تالقىعا سالىنىپ وتىر.
– الەمنىڭ دامىعان مەملەكەتتەرىندە اقىلى تاس جولدار جۇمىسى جاقسى جولعا قويىلعان. شۇرىق تەسىك تاس جولدا دىتتەگەن جەرىڭە قينالىپ جەتكەنشە, اقشاسىن تولەپ تەز جەتكەن جاقسى ەمەس پە؟
– ارينە جاقسى. جۇرت «اقىلى جول دەگەن نە سۇمدىق. ونى ۇكىمەت جاساپ بەرۋى قاجەت» دەپ ويلايدى. شىن مانىندە التاي مەن اتىراۋعا, سولتۇستىكتەن وڭتۇستىككە سوزىلعان ۇلان-عايىر دالانى ءبىر-بىرىمەن جالعاۋ وڭاي شارۋا ەمەس. بۇگىنگى تاڭدا ەلىمىزدە جالپى ۇزىندىعى 682 شاقىرىمدى قۇرايتىن 4 اقىلى جول بار. بۇل نۇر-سۇلتان – ششۋچينسك (211 كم), نۇر-سۇلتان – تەمىرتاۋ (134 كم), الماتى – قاپشاعاي (42 كم), الماتى-قورعاس (295 كم) اۆتوجولدارى.
اقىلى جولداردا الدىن الا «ونلاين» تولەم جاساعان جەڭىل اۆتوكولىكتەر ءۇشىن جول اقىسى قولما-قول تولەممەن سالىستىرعاندا 2 ەسە ارزان. جۇك كولىكتەرى ءۇشىن تولەماقىنىڭ مولشەرى وزگەرىسكە ۇشىراعان جوق. اۆتوكولىكتەرى اقىلى جولداردىڭ بويىنداعى ەلدى مەكەندەردە تىركەلگەن ازاماتتار ءۇشىن ارنايى ابونەمەنت قاراستىرىلعان. ءبىر جىلدىق ابونەمەنتتىڭ قۇنى – 1000 تەڭگە. اتالعان ابونەمەنت ارقىلى 365 كۇن مەرزىمىندە اقىلى جولدا تەگىن جۇرۋگە رۇقسات بەرىلەدى. ابونەمەنتتى الۋ ءۇشىن تولەم قابىلداۋ پۋنكتىندە ءوتىنىش جازۋ كەرەك. جۇرگىزۋشىلەردىڭ قولىندا جەكە كۋالىك پەن اۆتوكولىكتىڭ تەحنيكالىق قۇجاتى بولۋى ءتيىس.
جۇرگىزۋشىلەرگە قولايلى بولۋ ءۇشىن ءبىز 20-عا جۋىق تولەم قابىلداۋ ادىستەرىن ەنگىزدىك. بۇل PayWay.kz, KazDriver ينتەرنەت سەرۆيستەرى; QIWI, كاسسا24, تەڭگە, كاسپي تەرمينالدارى; QIWI مەن كاسپي ەلەكتروندى ءامياندارى; حالىق بانك, سبەربانك, اتف, كاسپي ينتەرنەت بانكينگتەرى; Wooppay, بيلاين, KCell نەمەسە اكتيۆ جەلىلەرى بويىنشا تەڭگەرىمنەن تولەۋ ءادىسى; KazToll قوسىمشاسى جانە ت.ب. تولىق اقپاراتتى جانە نۇسقاۋلىقتى رەسمي سايتتىڭ «اقىلى جولدار» بولىمىندە تابۋعا بولادى. ءجۇرىپ وتكەن جول تۋرالى اقپاراتتى الۋ ءۇشىن جانە جەكە شوتتى تولتىرۋ ءۇشىن KazToll سايتىندا جەكە كابينەتتە تىركەلۋگە بولادى.
تۇتىنۋشىلاردىڭ ەسكەرتۋلەرىنە جەدەل جاۋاپ بەرۋ جانە اقىلى جولداردى پايدالانۋدىڭ ەرەجەلەرى بويىنشا تولىق اقپاراتتى ۇسىنۋ ماقساتىندا 1403 نومىرىمەن ارنايى بايلانىس ورتالىعى جاساقتالدى 8(7172) 64-87-92, 64-87-85). بايلانىس ورتالىقتىڭ وپەراتورلارى تاۋلىك بويى تۇتىنۋشىلاردىڭ سۇراقتارىنا جاۋاپ بەرۋگە دايىن. قاجەت بولسا, وپەراتورلار سالانىڭ ماماندارىمەن, جول پوليتسياسى قىزمەتكەرلەرىمەن نەمەسە توتەنشە جاعداي قىزمەتىمەن بايلانىس ورناتادى. سونىمەن قاتار تەلەگرام جەلىسىندە (kazautozholbot) ارنايى بوت جاسالدى. ونىڭ نەگىزگى فۋنكتسياسى – اقىلى جولداردان باستاپ جول ساپاسىنا دەيىن «QazAvtoJol» ۇك» اق-نىڭ بارلىق قىزمەتتەرى بويىنشا ۇسىنىستار مەن ەسكەرتۋلەردى قابىلداۋ. ءوز ساۋالدارىن جولداعان تۇتىنۋشىلار قاراپايىم تىركەلۋ راسىمىنەن كەيىن بىرەر مينۋتتىڭ ىشىندە بايلانىس ورتالىعىنىڭ وپەراتورىنان قىزىقتىراتىن ساۋالىنىڭ جاۋابىن الادى. سونىمەن قاتار اتالعان بوت اقىلى جولدار بويىنشا تاريفتەردى جانە جەكە شوتتاعى قاراجات تۋرالى اقپاراتتى ۇسىنادى. زاڭدى تۇلعالار ءۇشىن شارت جاساسۋ مۇمكىندىگى قاراستىرىلعان. ولارعا شوت-فاكتۋرالار جاسالىپ, بارلىق بۋحگالتەرلىك قۇجاتتار ۇسىنىلادى.
الداعى 2-3 جىل ىشىندە اقىلى اۆتوجولداردىڭ جەلىسىن ۇزىندىعى 11 مىڭ شاقىرىم قۇرايتىن بولادى, 32 ۋچاسكەگە دەيىن كەڭەيتۋدى جوسپارلاپ وتىرمىز. بۇگىنگى تاڭدا كونكۋرستىق پروتسەدۋرالار دايىندالۋدا. تولەم قابىلداۋدىڭ اشىق جۇيەسىن ەنگىزۋ جوسپارلانعان. ياعني, تولەمدەر الدىن الا تولەۋ ءادىسى بويىنشا قابىلدانادى, الايدا شلاگباۋمدار مەن تولەم قابىلداۋ پۋنكتتەرى بولمايدى.
اقىلى اۆتوجولداردان تۇسكەن قاراجاتتىڭ بارلىعى اتالعان جولداردى جانە تولەم قابىلداۋ جۇيەسىن كۇتىپ ۇستاۋعا جۇمسالادى.
اڭگىمەلەسكەن
دۋمان اناش,
«Egemen Qazaqstan»