ماعجان جۇماباەۆ اۋدانىنىڭ ورتالىعى – بۋلاەۆو قالاسىندا وتكەن «اق بيداي-2019» جازعى سپارتاكياداسى ءتورت كۇنگە سوزىلىپ, جەڭىمپازدار مەن جۇلدەگەرلەر انىقتالدى.
سايىسقا 2500-گە جۋىق سپورتشى قاتىسىپ, سپورتتىڭ 15 تۇرىنەن سايىسقا ءتۇستى.
اۋىل الامانىنىڭ اشىلۋ سالتاناتىندا وبلىس اكىمىنىڭ ورىنباسارى رۋسلان الىشەۆ ءسوز سويلەپ, جينالعانداردى ايتۋلى مەرەكەمەن قۇتتىقتادى.
ءداستۇرلى دودا شەرۋمەن باستالىپ, الاڭدا سپورت ويىندارىنىڭ باستى نىشانى – الاۋدى كيكبوكسينگتەن حالىقارالىق دارەجەدەگى سپورت شەبەرى, الەم كۋبوگىنىڭ جەڭىمپازى, ەلىمىزدىڭ سەگىز دۇركىن چەمپيونى نۇرسۇلتان جاقىپوۆ جاقتى.
تارتىستى باسەكەنىڭ قورىتىندىسىندا الاڭ يەلەرى جارىستىڭ ەڭ بيىك تۇعىرىنا كوتەرىلىپ, وبلىس اكىمىنىڭ سىيلىعى – «گازەل» اۆتوكولىگى تابىس ەتىلدى. ەكىنشى, ءۇشىنشى ورىنداردى قىزىلجار مەن ع. مۇسىرەپوۆ اۋدانىنىڭ كوماندالارى يەلەندى. ولارعا اقشالاي سىياقىلار بەرىلدى.