بۇل تۇڭعىش پرەزيدەنتىمىز نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» باعدارلامالىق ماقالاسىندا ايتىلعان ماسەلەلەرگە سايكەس «قازاقستاننىڭ كيەلى جەرلەرى» جوباسىن جۇزەگە اسىرۋ ماقساتىندا قولعا الىندى. ساياحاتقا امانقاراعاي اۋىلىنىڭ جاستارى شاقىرىلدى. ورماندى اۋىلدىڭ شىعىس جاعىندا شاعىن توبەشىك باتىس جاعىنان جاقسى كورىنەدى دە, شىعىسقا قاراي ەڭىستەنىپ بارىپ, ەتەگى تەگىستەلىپ كەتەدى. بۇل ورىن ەرتەدەن تويتوبە دەپ اتالادى. توبەگە شىعىپ, دەمالىپ وتىرعاننىڭ ءوزى ادام جانىنا شيپا بەرەتىنىن, شارشاعانى تەز باسىلاتىنىن ايتادى جەرگىلىكتى تۇرعىندار. ولار بۇل جەردە كەرەمەت ەمدەۋ ورنىن اشۋعا بولاتىنىنا سەنىمدى.
كىتاپحاناشىلار ساياحاتشىلارعا وسى قاسيەتتى جەردىڭ ەرەكشەلىكتەرى جانە ولكەتانۋشى جامانتاي ۋاقباەۆ تۋرالى اڭگىمەلەدى. ول كىسى امانقاراعاي ورمانىنىڭ كيەلىلىگى جايىندا حالىق جادىندا قالعان قىزىقتى اڭىز اڭگىمەلەردى جەتكىزۋشىنىڭ ءبىرى ەدى. وسى جەردە سامارقاند قالاسىنان ورالعان اقساق تەمىر توقتامىستى جەڭگەن جەڭىسىن تويلاعان ەكەن. اڭىز بويىنشا, ول 1391 جىلى جازدا بولعان دەسەدى. ءبىر اپتا بويى تويلانىپتى. ال ءحىح عاسىردا بۇل جەردە شوقان ءۋاليحانوۆتىڭ اكەسى شىڭعىس تورەنىڭ اق كيىز ءۇيى تۇردى. ورماننىڭ اۋاسى تۇنىق, جەردەن ءبىر ەرەكشە قاسيەت بەرىپ تۇرعانداي. ادام جانى سەرگىپ سالا بەرەدى. ءتۇرلى شوپتەردىڭ جۇپار يىسىمەن راحاتتانا دەم الىپ, ەگەر اق قايىڭعا جاقىنداپ كەلسەڭ سۋ سىلدىرىن ەستۋگە بولادى. تومەن قاراساڭ اياق استىنداعى ساڭىراۋقۇلاقتار جانە الۋان ءتۇرلى گۇلدەر مەن شوپتەردى كورەسىڭ. تاڭعاجايىپ ورىننان شىعا بەرە كادىمگى كەڭ دالاعا كەزىگەسىڭ. كىتاپحاناشىلار وسى ورىنعا بىرنەشە رەت كەلىپ دەرتتەرىنەن ايىعىپ كەتكەن جانداردىڭ شىنايى وقيعالارى تۋرالى اڭگىمەلەدى.
ساياحاتقا قاتىسۋشىلار ولكەمىزدە وسىنداي كوركەم جەردىڭ, ورماننىڭ بولعانىن ماقتانىش تۇتاتىنىن جەتكىزدى.