سەمەيدەگى جاڭا مەديتسينالىق نىسان JCI ستاندارتى بويىنشا جوبالانىپ, جابدىقتالعان. گيبريدتى زالدى ۇلتتىق نەيروحيرۋرگيا عىلىمي ورتالىعى باسقارماسىنىڭ باستىعى, ەلىمىزدىڭ ۇزدىك نەيروحيرۋرگى, پروفەسسور سەرىك اقشولاقوۆ اشتى. جانە بىردەن وپەراتسيا جاساۋعا بەتتەدى. سەرىك اقشولاقوۆ نەيروحيرۋگيا ورتالىعىنداعى قان-تامىرلى نەيروحيرۋگيا ءبولىمىنىڭ مەڭگەرۋشىسى ەربول ماحامبەتوۆپەن جانە سەمەيدەگى جەدەل مەديتسينالىق جاردەم كورسەتۋ اۋرۋحاناسىنداعى ەندەۆوسكۋليارلى حيرۋرگيا جانە گيبريدتى وپەراتسيالىق ءبولىمىنىڭ مەڭگەرۋشىسى ايبول مارالباەۆپەن بىرگە ءتورت ساعات بويى وسىندا شۇعىل كەلىپ تۇسكەن ناۋقاستىڭ باسىنداعى قاتەرلى ىسىككە كۇردەلى وپەراتسيا جاساپ, ونى ءارى قاراي اشىق تۇردە الىپ تاستاۋ ءتاسىلىن قولداندى. ىسىكتى نارلەندىرىپ تۇرعان تامىرلاردى جويدى.
- بۇنداي وپەراتسيا ءبىز ءۇشىن بۇدان بۇرىن بىرنەشە كۇنگە سوزىلعان ەكى بولىمنەن تۇراتىن ەدى,-دەدى ەلىمىزدىڭ باس نەيروحيرۋرگى سەرىك اقشولاقوۆ,-مىسالى بىرىنشىسىندە, ىسىكتى ءوسىرىپ بارا جاتقان تامىرلاردى ەندوسۆوسكۋليارلى تۇردە الىپ تاستايمىز, ەكىنشىسىندە بىرنەشە كۇن وتكەن سوڭ, سول قاتەرلى ىسىكتىڭ ءوزىن الىپ تاستايتىنبىز. ول ارالىقتا ناۋقاستى دا حالى قيىنداپ كەتۋى مۇمكىن. ال بۇگىن, مىنا گيبريدى وپەراتسيا جاساۋ زالىنىڭ اشىلۋىنا وراي, مەن شاعىن ءينۆازيۆتى تۇردە, ناۋقاسقا كوپ زيان شەكتىرمەي ەكى وپەراتسيانى بىردەن جاسادىم. شىنى كەرەك, قازاقستاندا ەشبىر جەردە ازىرشە جوق گيبريدتى وپەراتسيانى جاساۋ بارىسىندا, جاڭا قۇرال-جابدىقتىڭ كومەگىمەن ناۋقاستىڭ ءومىرىن الىپ قالعانىما ەرەكشە قۋانىشتىمىن. گيبريدتى وپەراتسيالىق زال جەرگىلىكتى وبلىس تۇرعىندارىنا جوعارى تەحنولوگيالىق مەديتسينالىق كومەك كورسەتە الادى. ناۋقاستار شەتكە شىقپاي-اق, ءوز ەلىمىزدە, سەمەيدە ەمدەلىپ شىعادى. بۇل ارينە, وبلىس اكىمى دانيال احمەتوۆتىڭ قولداۋى ارقىلى جۇزەگە اسىپ جاتقان جوبا. وبلىس باسشىسى مەديتسينا دارىگەرلەرىنىڭ الەمدىك دەڭگەيدە جاڭا جەتىستىكتەرگە جەتۋىنە مۇمكىندىك جاساپ وتىر.
شىنىندا دا وبلىستىڭ دەنساۋلىق ساقتاۋ سالاسىنداعى كەشەندى دامۋ جوبالارىنا وراي 2018 جىلى وسكەمەن قالاسىنداعى وبلىستىق مەديتسينالىق مامانداندىرىلعان ورتالىقتا روبوتوحيرۋرگيا جانە ترانسپلانتولوگيا ورتالىعى اشىلعان ەدى. ال اياگوز بەن التاي قالالارىندا ۇلتتىق نەيروحيرۋرگيا ورتالىعىنىڭ ادىستەمەلىك كومەگى ارقىلى ەكىنشى دەڭگەيلى ينسۋلت ورتالىقتارى ىسكە قوسىلدى. سەمەي قالاسىنداعى جەدەل مەديتسينالىق جاردەم ورتالىعىندا ۇلتتىق تراۆموتولوگيا جانە ورتوپەديا عىلىمي-زەرتتەۋ ينستيتۋتىمەن بىرلەسىپ پوليتراۆما جانە ورتوحيرۋرگيا ورتالىعى دا تۇساۋىن كەستى.
ال جاڭا جوباعا كەلسەك, بۇل گيبريدتى وپەراتسيا زالى حيرۋرگيا سالاسىنىڭ كوپتەگەن سالالارىنىڭ باسىن بىرىكتىرەدى. بۇل وپەراتسيا جاسايتىن كلاسسيكالىق بولمەدەن ەرەكشەلىگى ارنايى ۇلكەن زال ەكەندىگىندە. كوپ جۇيەلى بلوكتا جاڭا دەڭگەيلى تەحنولوگيالار مەن قۇرال-جابدىقتار اشىق جانە شاعىن ءينۆازيۆتى لاپاروسكوپيالىق تۇردەگى ماگنيتتى-رەزونانستىق توموگرافيا, حيرۋرگيالىق رەنتگەن جۇيەلەرى, ۋدز سالاسى, بەينەباقىلاۋ جۇيەسى ارقىلى كۇردەلى وپەراتسيانى ساپالى جاساۋ مۇمكىندىگى تولىق قامتىلعان.
سەمەيدەگى گيبريدتى وپەراتسيانىڭ ءوتۋ بارىسىنا تىكەلەي قاتىسقان وبلىس اكىمىنىڭ ورىنباسارى اسەم ءنۇسۇپوۆانىڭ ايتۋىنشا, بۇنداي جاڭاشىل تەحنولوگيا سەمەي ءوڭىرىن, قالا تۇرعىندارىن جوعارى مەديتسينالىق كومەكپەن تولىق قامتاماسىز ەتۋگە مۇمكىندىك بەرەدى.
- سەمەيدەگى جەدەل مەديتسينالىق جاردەم كورسەتۋ اۋرۋحاناسى سەمەي ءوڭىرىنىڭ 700 000 تۇرعىنىنا مەديتسينالىق كومەك كورسەتەدى,-دەدى وبلىس اكىمىنىڭ ورىنباسارى اسەم ءنۇسۇپوۆا,- وسىلايشا بۇل ايماقتىڭ ستاتسيونارلى كومەگىنىڭ 40 پايىزىن جابادى. جىل سايىن 24 000 تۇرعىن ەمحانانىڭ قابىلداۋ, دياگنوز قويۋ بولىمىنەن تەكسەرىلۋدەن ءوتىپ, ونىڭ 14 000 ناۋقاسى اۋرۋحاناعا جولدانادى. بۇنداي كوپ مولشەردەگى سىرقاتتار جاڭا گيبريدتى وپەراتسيالىق زالدىڭ جۇمىسىنىڭ كەرەك ەكەندىگىن راستايدى. ادامدارعا شۇعىل تۇردە كەشەندى مەديتسينالىق كومەك كورسەتۋگە تولىق مۇمكىندىك بار. اسىرەسە, قان تامىرلارى جۇيەسىنىڭ بۇزىلۋى كەزىندە, ءتۇرلى كوپ دەڭگەيلى جاراقاتتاردا, ينسۋلت پەن ينفاركتتەردە جاڭا تەحنولوگيالاردى ىسكە قوسۋ ارقىلى ەمدەۋگە بولادى. گيبريدتى وپەراتسيا جاساۋ زالىنىڭ جوباسى 2,3 ملرد.تەڭگە بولىنسە, ال بۇل زالدىڭ قۇرال-جابدىعىن الۋعا 1,7 ملرد تەڭگە جۇمسالدى. بۇل قارجى وبلىستىق بيۋدجەتتەن جانە بيۋدجەتتەن تىس قورلاردان بەرىلىپ وتىر. قۇرال-جابدىقتار ەۋروپالىق جانە امەريكالىق ساپا كورسەتكىشتەرىنىڭ سوڭعى ۇلگىسى. بۇل جابدىق ارقىلى قر دەنساۋلىق ساقتاۋ مينيسترلىگىنىڭ قولداۋىمەن ءبىز شىعىس قازاقستان وبلىسىنىڭ تۇرعىندارىنا كەپىلدى مەديتسينالىق كومەك كورسەتۋ باعدارلاماسى ارقىلى تەگىن تۇردە ەمدەۋ, وپەراتسيا جاساۋ, ساۋىقتىرۋ شارالارىن جاساي الامىز.
قازىرگى ۋاقىتتا اۋرۋحانادا گيبريدتى وپەراتسيا جاساۋ بولمەسىندە جۇمىس ىستەۋ ءۇشىن مامان دارىگەرلەر توبى دايىندالعان. وپەراتسيالار جاساۋعا وراي الدىن الا دايىندالعان 20 شاقتى دارىگەر ءوز ىسىنە تەز ارادا كىرىسە الادى. جىلىنا 3000 وپەراتسيا وتەدى دەپ جوسپارلانۋدا. سەبەبى بۇل زال اشىلماستان بۇرىن دارىگەر ماماندار دايىنداۋ ەداۋىر ەرتەرەك قولعا الىندى. شقو دەنساۋلىق ساقتاۋ باسقارماسىنىڭ باسشىسى يلياس مۇحامەدجاننىڭ ايتۋىنشا, سەمەي قالاسىنىڭ جەدەل مەديتسينالىق جاردەم كورسەتۋ اۋرۋحاناسى 2017 جىلدان باستاپ, دارىگەرلەردىڭ بىلىكتىلىگىن كوتەرۋ ءۇشىن ءۇش دەڭگەيلى وقىتۋ جۇيەسىن قولعا الىپ وتىر. 2017 جىلى وبلىس اكىمشىلىگى بۇعان 3,2 ملرد تەڭگە بولگەن. وسى جوبا اياسىندا انگليادا 3 اي بويى 19 مامان مۋلتي ءتارتىپ توبى باعىتىندا بىلىمدەرىن كوتەرىپ كەلدى.
بۇعان رەنتگەندى حيرۋرگيا, انەستەزيولوگيا, تراۆماتولوگيا, نەۆرولوگيا, كارديولوگيا جانە ساۋلەمەن ەمدەۋ ماماندارى دا كىردى. جانە رەسپۋبليكالياق ورتالىقتاردا نەيروحيرۋرگيا, ينتەرۆەنتسيالىق كارديولوگيا, رەنتگەن-زەرتحاناشى ماماندارى دا وقىتىلدى. جالپى گيبريدتى وپەراتسياعا جۇمىس ىستەۋگە 43 مامان دايارلانعان. بيىل شەتەلدەردە وقىتۋ باعدارلاماسى جالعاسىن تابادى. سوعان وراي قىركۇيەك ايىندا بىلىكتىلىكتەرىن كوتەرىپ, ءبىلىم الۋ ءۇشىن سەمەي قالاسىنداعى جەدەل مەديتسينالىق جاردەم كورستەۋ اۋرۋحاناسىنان شەتەلگە 12 مامان اتتانادى.
راۋشان نۇعمانبەكوۆا,
«ەgemen Qazaqstan»
سۋرەتتى تۇسىرگەن اۆتور
سەمەي