سەيسەنبى, 23 ءساۋىر 2013 3:15
قوستانايدا جالعان كاسىپورىندار مەملەكەتتى 1 ملرد. تەڭگەدەن استام شىعىنعا باتىردى
قوستاناي وبلىسىنداعى جالعان كاسىپورىندار مەملەكەتكە 1 ملرد. تەڭگەدەن استام سومانىڭ زيانىن كەلتىردى. بۇلاردىڭ نەگىزگى بولىگى سالىق پەن باسقا دا مىندەتتى تولەمدەردى اينالىپ ءوتۋ ارقىلى زاڭسىز اقشا اينالىمىن جاساۋعا ماماندانىپ العان مەكەمەلەردىڭ ۇلەسىنە تيەدى.
سەيسەنبى, 23 ءساۋىر 2013 3:15
قوستانايدا جالعان كاسىپورىندار مەملەكەتتى 1 ملرد. تەڭگەدەن استام شىعىنعا باتىردى
قوستاناي وبلىسىنداعى جالعان كاسىپورىندار مەملەكەتكە 1 ملرد. تەڭگەدەن استام سومانىڭ زيانىن كەلتىردى. بۇلاردىڭ نەگىزگى بولىگى سالىق پەن باسقا دا مىندەتتى تولەمدەردى اينالىپ ءوتۋ ارقىلى زاڭسىز اقشا اينالىمىن جاساۋعا ماماندانىپ العان مەكەمەلەردىڭ ۇلەسىنە تيەدى.
– وسى كەزگە دەيىنگى جەدەل-تەرگەۋ تاجىريبەسى كورسەتكەندەي, مەملەكەتكە مەيلىنشە ءىرى ءمولشەردە زالال كەلتىرەتىندەر سالىق پەن بيۋدجەتكە مىندەتتى تولەنۋگە ءتيىستى باسقا دا تولەمدەردى اينالىپ ءوتىپ, اقشا قاراجاتىن زاڭسىز قولما-قول اقشاعا اينالدىرىپ بەرۋگە ماشىقتانىپ العان جالعان كاسىپورىندار بولىپ وتىر, – دەدى جۋرناليستەرمەن كەزدەسۋىندە وبلىستىق سىبايلاس جەمقورلىققا جانە ەكونوميكالىق قىلمىسقا قارسى كۇرەس دەپارتامەنتى باستىعىنىڭ ءبىرىنشى ورىنباسارى تالعات باشەۆ.
ول ءوز ءسوزىنىڭ دالەلى رەتىندە 2011 جىلعى قاراشا ايىندا قوستانايدا زاڭدى كاسىپكەرلىك جاساۋعا ەشقانداي دا نيەتى بولماعان بىرنەشە كاسىپورىنعا قارسى قىلمىستىق ءىس قوزعالعانىن كەلتىردى. ولار سالىقتى تولەمەۋ ارقىلى مەملەكەتكە 1 ملرد. تەڭگەنىڭ ۇستىندەگى سومادا شىعىن كەلتىرگەن بولىپ شىقتى.
تاعى ءبىر مىسال, زاڭدى بيزنەسپەن اينالىسۋعا ەشبىر قۇلقى بولماعان ت.تولەكوۆ ەسىمدى جالعان كاسىپكەر 2010-2011 جىلدارى ءالى تەرگەۋ انىقتاي قويماعان كۇماندى تۇلعالارمەن كەلىسىمگە كەلىپ, «DOS Plus KZ» جشس مەن «وپتسنابسەرۆيس» جشس-نىڭ رەكۆيزيتتەرىن ءىس جۇزىندە اتقارىلا قويماعان جۇمىستار ءۇشىن شوت-فاكتۋرا تولتىرۋعا پايدالانعان. وسى ارقىلى ول مەملەكەتكە 36 ملن. تەڭگەدەن استام زالال كەلتىرگەن.
– جەدەل-ىزدەستىرۋ شارالارىنىڭ ناتيجەسىندە تولەكوۆ وسىنداي جالعان كاسىپورىنعا جازىپ بەرگەن جالعان شوت-فاكتۋرالارى ءۇشىن 800 مىڭ تەڭگە كولەمىندە سىياقى الىپ جاتقان كەزىندە قولعا ءتۇستى, – دەپ مالىمدەدى ت.باشەۆ.
ءنازيرا جارىمبەتوۆا,
«ەگەمەن قازاقستان».
قوستاناي.