«ارىس قالاسىنداعى جارىلىستان كەيىن 409 ادام مەديتسينالىق كومەككە جۇگىنگەن. ولاردىڭ 329-ى امبۋلاتوريالىق ەم الىپ, 80-ءى اۋرۋحاناعا جاتقىزىلعان بولاتىن. بۇگىنگە دەيىن اۋرۋحاناعا تۇسكەن 15 ادام ساۋىعىپ شىقتى جانە ءبىر كىسى قايتىس بولدى. قازىرگى ۋاقىتتا اۋرۋحانالاردا 64 ناۋقاس ەم الۋدا. جاعدايى اۋىر 9 ناۋقاس جانساقتاۋ بولىمىندە جاتىر, ونىڭ 4-ءى بالا. ەكى بالانى ەلورداعا جەتكىزۋ ءۇشىن سانيتارلىق اۆياتسيا شىمكەنتكە ۇشىپ شىقتى. ولار استاناعا «انا مەن بالا» ۇلتتىق ورتالىعىنا اۋىستىرالادى. تاعى ءبىر ناۋقاس الماتى قالاسىنداعى №7 كلينيكالىق اۋرۋحاناسىنا جەتكىزىلمەك», دەدى ە.ءبىرتانوۆ.
ونىڭ مالىمدەۋىنشە, جاراقات العان بارلىق ناۋقاستارعا كومەك بەرۋ ءۇشىن جەدەل جاردەم كومەگىن ۇيىمداستىرۋ ماسەلەسى شەشىلگەن. تۇركىستان وبلىسىنان, شىمكەنت قالاسىنان جانە جامبىل وبلىسىنان 20 جەدەل جاردەم بريگاداسى جۇمىس ىستەپ, كۇزەتۋدە. قاجەتتى ءدارى-دارمەك, مەديتسينالىق قۇرال-جابدىقتار جەتكىلىكتى. اۋرۋحانالاردا جاتقان ناۋقاستاردىڭ 90 پايىزى, ياعني, 64 ناۋقاستىڭ 56-سى ءتۇرلى جاراقاتتار العان. 6 ناۋقاس تۇتىننەن ۋلانعان جانە 2 ادام وققا كۇيگەن.
«مەديتسينالىق كومەك كورسەتۋگە باسقا وبلىستاردان جانە تۇركىستان وبلىسىنان 140 دارىگەر جۇمىلدىرىلدى. ولار ەۆاكۋاتسيالىق پۋنكتەردە سانيتارلىق-دەزينفەكتسيالىق جۇمىستار جۇرگىزۋدە», دەدى دەنساۋلىق ساقتاۋ مينيسترلىگى.
اق حالاتتىلاردىڭ اراسىندا جەدەل جاردەم ماماندارى عانا ەمەس پسيحولوگتار دا بار ەكەنىن جەتكىزگەن مينيستر قالا اشىلعاننان كەيىنگى العاشقى مىندەت سونداعى اۋرۋحانالاردى جەدەل جوندەپ, جۇمىستى قالپىنا كەلتىرۋ ەكەنىن اتاپ ءوتتى.
مايگۇل سۇلتان,
«Egemen Qazaqstan»