- جۋىردا «مادەنيەت» پورتالىندا جاريالانعان «سەمسەر» ادەبي كونكۋرسى كوپتەگەن قالامگەر جاستاردىڭ قىزىعۋشىلىعىن تۋدىرىپ, ادەبي ورتادا جاقسى تانىلىپ ۇلگەردى. وسى ورايدا ادىلقازىلار القاسىنىڭ توراعاسى رەتىندە اتالمىش كونكۋرسقا تولىعىراق توقتالىپ وتسەڭىز... ۇيىمداستىرۋشى مەن دەمەۋشىلەر كىم؟ قورىتىندىسى قاشان شىعادى؟
- ءيا, شىنىمەن, «سەمسەر» ادەبي كونكۋرسىنا دەگەن جاستاردىڭ قىزىعۋشىلىعى زور. ونى ءوزىمىز دە «مادەنيەت» پورتالىنا كۇندە جاريالانىپ جاتقان شىعارمالاردان كورىپ وتىرمىز. بۇل كونكۋرستى بىلتىر ەلباسىمىز نۇرسۇلتان ءابىش ۇلى جاريالاعان «جاستار جىلىنا» وراي «مادەنيەت پورتالى» ۇيىمداستىرىپ وتىر. باس دەمەۋشىسى – ERG دەگەن كومپانيا ەكەن. بۇل ءوزى ەلىمىزدەگى تاۋ-كەن ءوندىرىسى, ەنەرگەتيكا, لوگيستيكا سالالارىنداعى ەڭ ءبىرى كومپانيالاردىڭ ءبىرى ەكەن. مەنى قۋانتىپ وتىرعانى, مادەني سالامەن مۇلدەم بايلانىسى جوق كورپوراتسيا بولسا دا, وزدەرى قىزىعۋشىلىق تانىتىپ, وسىنداي رۋحاني-مادەني شارالارعا دەمەۋشى بولىپ, جاستاردى, ادەبيەتتى قولداپ جاتقاندارى كەرەمەت باستاما. ەلىمىزدە وسىنداي مادەنيەتكە قولداۋ كورسەتەتىن الپاۋىت كومپانيالار كوپ بولسا, ادەبيەتىمىز دە, مادەنيەتىمىز دە, رۋحاني ءومىرىمىز دە ەداۋىر ەڭسەسىن تىكتەپ, قاناتىن كەڭگە جايا تۇسۋىنە ۇلكەن كومەك بولار ەدى دەگەن ءۇمىت ۇيالايدى.
ەندى كونكۋرسقا كەلەر بولساق, بۇل ءوزى بۇرىن مەن كوپ كەزدەستىرمەگەن كونكۋرس بولىپ وتىر. ونلاين تۇردە وتەدى, ءجيۋريدىڭ توراعاسى بولىپ بەرىڭىز دەگەن سوڭ, قىزىعىپ, سايتتى ءبىراز اقتارىپ كورگەن بولدىم, شاما-شارقىمشا. شىنىمەن دە, بۇرىنعى كونكۋرستارداي اق كونۆەرتكە سالىپ, پوشتامەن جىبەرە سالىپ, ول وقىلدى ما, وقىلمادى ما, ءتىپتى اشىلدى ما, اشىلمادى دەگەندى بىلە الماي پۇشايمان بولىپ وتىراتىن دۇنيە ەمەس, سايتقا تىركەلىپ, شىعارماڭدى ءوزىڭ ورناتساڭ, بىرنەشە ۋاقىتتان كەيىن جارق ەتىپ بۇكىل ەلدىڭ الدىنا شىعا كەلەدى. ەلدىڭ ءبارى وقىپ, ءوز باعالارىن بەرىپ جاتادى. مۇنداي كونكۋرسقا قاتىسقان شىعارمالاردىڭ باعى بار ەكەن دەگەن ويعا قالدىم. سوندىقتان دا, مۇنداي ەشقانداي دا بارماق باستى, كوز قىستى بولمايدى, بارلىق شىعارمالار ءادىل باعاسىن الادى, پاتشا كوڭىل وقىرماننىڭ كوز الدىندا وتەدى دەگەن سوڭ, سوعان اتسالىسىپ, اقىل-كەڭەس قوسۋعا كەلىسىم بەرگەنىمىز راس.
قورىتىندىسىنا كەلەر بولساق, «مادەنيەت پورتالىندا» بارلىق تالاپ-شارتتارى جازىلىپ تۇر. قاتەلەسپەسەم, شىعارمالاردى قابىلداۋ ماۋسىم ايىنىڭ 24-ىنە دەيىن جۇرگىزىلەدى. ودان كەيىن ءبىز تاعى ءبىر پىسىقتاپ, قورىتىندىسىن شىعارامىز. باس جۇلدەسى 1 ملن. تەڭگە, ال پروزا, پوەزيا, ادەبي سىن اتالىمدارىنىڭ جەڭىمپازدارىنا 500 مىڭ تەڭگەدەن جۇلدە تىگىلگەن. ولارعا قوسا «سەمسەر» ادەبي سىيلىعى دەگەن التىن توسبەلگىسى بولادى دەپ جاتىر ۇيىمداستىرۋشىلار, سوندىقتان, بۇل بولاشاقتا جالعاسىن تابۋعا ءتيىس جاقسى ءۇردىس دەپ ويلايمىن.
- ونلاين وتكىزىلىپ جاتقاندىقتان كونكۋرسقا قاتىسۋشىلاردىڭ شىعارمالارىن بارلىق وقىرمان ءجىتى باقىلاپ وتىر دەدىڭىز عوي جاڭا ءبىر سوزىڭىزدە. كونكۋرستىڭ ەرەجەسىندە قازىلار القاسىنىڭ شەشىمىمەن قاتار وقىرمانداردىڭ بەرگەن داۋىسى دا ەسكەرىلەدى دەلىنگەن ەكەن. وسى رەتتە سىزدەر شىعارمالاردى قالاي باعالايتىندارىڭىزدى ايتا كەتسەڭىز...
- ارينە, پاتشا كوڭىل وقىرمانداردىڭ بەرگەن باعاسى مىندەتتى تۇردە ەسكەرىلەدى. دەگەنمەن ءبىزدىڭ مىندەتىمىز بەلگىلى ءبىر قالامگەردىڭ قىزۋقاندى فاناتتارىنان كەلىپ تۇسكەن كوپ داۋىستى سالقىنقاندىلىقپەن ساراپتاي وتىرىپ, شىعارمانىڭ وزىنە باعا بەرۋ! وزدەرىڭىز دە بىلەسىزدەر, قىزدار قاۋىمىنا ەرەكشە سۇيكىمى بار اقىندار دا بولادى, سوندىقتان ولاردىڭ جەكە باس سۇيكىمىنە بەرىلگەن باعالار مەن ناقتى شىعارماعا بەرىلگەن باعالاردىڭ دا اراجىگىت اجىراتۋ ءۇشىن ءادىل قازىلار القاسى سايلانىپ وتىر ەمەس پە؟ سول سەبەپتى, وقىرماننىڭ داۋىسى ەسكەرىلەدى, بىراق بۇل ەڭ كوپ لايك جيناعان اقىن مىندەتتى تۇردە باس جۇلدە الادى دەگەن ءسوز ەمەس, ءبىز تۋىندىنىڭ ايتار ويىنا, كونتسەپتسياسىنا, يدەياسىنا, كوركەمدىگىنە جان-جاقتى زەر سالىپ, زەرتتەپ قارايتىن بولامىز.
وقىرمانداردىڭ داۋىس بەرۋ مۇمكىندىگى سياقتى, بىزگە دە جۇلدىزشا باسىپ, باعا قويۋ مۇمكىندىگىن بەرىپ قويدى ۇيىمداستىرۋشىلار. وعان تەك ءوزىمىز عانا كىرە الامىز. ءسويتىپ, وسى جاقسى-اۋ دەگەن شىعارمالارىمىزدى بەلگىلەپ كەتىپ وتىرامىز. شىعارمالاردى قابىلداۋ ۋاقىتى بىتكەن سوڭ, سول جۇلدىزشالارىمىز ارقىلى ءبىر شەشىمگە كەلەمىز.
تاعى ءبىر ايتا كەتەرلىگى, قازىر جاستار جاعىنان ادەبي سىن جازۋ ءۇردىسى اقساپ تۇرعانى ايتپاس دا تۇسىنىكتى. بۇرىنعىداي شىعارمانى جىلىكتەپ, ءتۇپ-تۇقيانىنا دەيىن تالداپ جازىلاتىن سىن تىم از. بولسا دا سول سىننىڭ ءوزى سىن كوتەرمەيدى. مەن ءوزىم ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ كوميسسيا قۇرامىندامىن عوي. سوندا ستۋدەنتتەردىڭ ادەبيەت بويىنشا جازعان عىلىمي زەرتتەۋ-ماقالالارىن تەكسەرىپ تۇرامىز. بۇرىنعى دەڭگەي جوق! وتە تاياز. مىنە, وسى ادەبي سىن اتالىمىنا دا قاتتى نازار اۋدارىپ, ءالى دە بولسا ساپالى سىني ماقالالار كەلىپ قالار دەگەن ۇمىتپەن وتىرمىز. قازىر دە ازداپ ءتۇسىپ جاتىر, اراسىندا جاقسىلارى دا جوق ەمەس, بىراق ءبىز ودان دا جاقسى, ودان دا كوبىرەك بولسا ەكەن دەيمىز.
- قازىرگى ساتتە كونكۋرسقا 200-دەن استام قاتىسۋشى تىركەلىپ, قاتىسىپ جاتىر ەكەن. ءسىزدىڭ ويىڭىزشا باسقالاردان شىعارماسى وق بويى وزىق كەلە جاتقان قاتىسۋشىلار بار ما؟ ولار قانداي شىعارمالار؟
- ءدال قازىر كىمنىڭ شىعارماسى وق بويى وزىق كەلە جاتىر دەگەندى تاپ باسىپ ايتۋ قيىن. ونى ءالى سالماقتاپ قاراۋ كەرەك. ءتۇسىپ جاتقان شىعارمالاردىڭ بارلىعى دا جاقسى, وزدەرىڭىز كورىپ وتىرعان شىعارسىزدار, جاڭا ەسىمدەرمەن قاتار, ەلگە كوپتەن تانىمال, وزىندىك قولتاڭباسى باياعىدا قالىپتاسىپ ۇلگەرگەن تالانتتى اقىن-جازۋشىلار دا مولىنان قاتىسىپ جاتىر. اتتارىن اتاماي-اق قويايىن, دامەلەنىپ قالىپ جۇرەر. جاڭا ايتتىم عوي, ءبىز شىعارمانىڭ اۆتورىنا ەمەس, ايتار ويىنا, قۇدىرەت-كۇشىنە قارايمىز. سوندىقتان, اقتىق مارەگە قاي شىعارمانىڭ وق بويى وزىق كەلەتىنى, قايسىلارىنىڭ ۇزەڭگى قاعىستىرا كەلەتىنى ناقتى باعالاۋدان كەيىن بەلگىلى بولادى.
- وسىنداي اشىق تۇردە وتكىزىلەتىن كونكۋرس پەن بۇرىنعىداي كونۆەرت ارقىلى كەلىپ, جابىق تۇردە قورىتىندىسى شىعاتىن كونكۋرستاردىڭ ايىرماشىلىعى تۋرالى نە ويلايسىز؟
- ازدى-كوپتى ومىرىمىزدە ءبىراز كونكۋرستارعا قازىلىق جاساپ كوردىك. ولار جابىق تۇردە, كونۆەرتپەن كەلەتىن. قال-قادىرىمىزشە, ناقتى, ءادىل باعاسىن بەردىك تە. ال وسىنداي ونلاين كونكۋرسقا ءبىرىنشى رەت قازىلىق جاساپ وتىرعاندىقتان بۇل ماعان ءارى قىزعىلىقتى, ءارى جاۋاپكەرشىلىكتى ءىس. جارتى قادام قالت كەتسەڭ دە, قىراعى وقىرمان كورىپ وتىر. قاساقانا تۇرماق, ابايسىزدا شالىس باسۋعا قاقىمىز جوق. قارا قىلدى قاق جارۋعا ءتيىسپىز! ول الميساقتان سولاي بولعان, سولاي بولۋى دا زاڭدىلىق. بار ايىرماشىلىعى, بۇرىنعى كونكۋرستاردا ءوز ارىڭمەن جەكە قالىپ, اللا الدىندا جاۋاپكەرشىلىگىڭدى سەزىنسەڭ, بۇل جولى حالىقتىڭ الدىنا شىعىپ, ءادىل تورەلىگىن ايتىپ وتىرعان توبە بيدەي تۋرا بولۋىم كەرەك ەكەنىن باعامدايمىن.
قالاي دەگەنمەن دە, كونكۋرستى تەحنولوگيالىق زامانعا ساي ۇيىمداستىرىپ وتىرعان جىگىتتەردىڭ ىسىنە ساتتىلىك تىلەيمىن. «سەسمسەر» ادەبي كونكۋرسى ءداستۇرلى تۇردە جىلدا وتكىزىلىپ تۇراتىن ۇردىسكە اينالسا ەكەن دەيمىن.
- - اڭگىمەڭىزگە كوپ راحمەت!
اڭگىمەلەسكەن ينديرا جۋازباي