ارىس اۋداندىق ورتالىق اۋرۋحاناسىنا 24 ماۋسىم كۇنى تاڭعى ساعات 8.00 شاماسىندا تۇسكەن كەنجە بەكاسىلدى 8.30-دا بوسانۋ ءبولىمىنىڭ اكۋشەرى ناعيما زورىمباەۆا ءوز اۋىسىمىنا قابىلداپ الادى. نەگىزىندە قۇرساقتاعى بالا ءىرى ءجانە اناسىنىڭ بۇيرەگىندە اقاۋ بولعاندىقتان شىمكەنت قالاسىنا اپارىپ بوساندىرۋ جوسپارلانعان. بىراق جاعداي وعان قاراتپايدى. ءومىر مەن ءولىم اراسىندا ارپالىسقان كەلىنشەك ەندى ايتىپ كەلمەيتىن اپاتقا تاپ بولادى.
«ءبىز اۋرۋحانا ەسىگىنەن شىعا بەرگەندە قاتتى جارىلىستان جەر ءدۇمپىدى. جەدەل جاردەم كولىكتەرىنىڭ بارلىعى رەانيماتسياداعى بالالاردى تاسىپ كەتكەن. اكۋشەرىم ناعيما زورىمباەۆا مەن كومەكشىسى ولگا الىپباەۆا العاشقى كومەككە قاجەتتى زاتتاردى سالىپ الدى دا, مەنى ەرتىپ اسكەريلەر كورسەتكەن باعىتقا قاراي بەتتەدى. شىنىن ايتسام, مەندە تەك قورقىنىش بولدى. امان قالامىن دەپ ۇمىتتەنگەن دە جوقپىن. بىراق باعىما قاراي قاسىمنان تەك جاقسى ادامدار تابىلىپ وتىردى. ءبىر ساعاتتاي جاياۋ جۇرگەن سوڭ ونە بويىن ءورت شالعان ساربازدىڭ كولىگىنە وتىردىق. ول دا ءبىزدى الىسقا اپارا المايتىنىن ايتىپ كەرى قايتتى. ەكىنشى رەت مىنگەن كولىگىمىزدىڭ بەنزينى تاۋسىلىپ جولدا قالدى. جاياۋ جالپىلاپ كەلە جاتقانىمىزدا دوسمۇحامەت ەسىمدى بالانىڭ ماشيناسى كەز بولدى. ول ءبىزدى مونتايتاس اۋىلىنىڭ مەدپۋنكتىنە اپارماقشى بولعان. الايدا جان-جاقتىڭ ءبارى ءتۇتىن, ەشتەڭە كورىنبەيدى. قىرمەن ءجۇيتكىتىپ كەلەمىز. جول جوق. اداسىپ قازىعۇرتتىڭ تاس جولىنان بىراق شىعىپپىز», دەپ وقيعانى ەسكە الدى كەلىنشەك.
سۋرەتتە: اكۋشەر ناعيما زورىمباەۆا
«ءبىز اۋرۋحانادان ساعات 9.30 شاماسىندا شىقتىق. ماڭايداعى ەشبىر اۋىلدىڭ اۋرۋحاناسى توتەنشە جاعدايعا بايلانىستى جۇمىس ىستەمەيدى. بارلىعى سىرتقا قاشىپ جاتىر. ساعات 12-دەن استى. كەنجەنىڭ تولعاعى جيىلەي باستادى. جول كەپتەلىس. دوسمۇحامەت كولىكتەن باسىن شىعارىپ, بوسانعالى جاتقان كەلىنشەك بار ەكەنىن ايتىپ الىپ شىقتى. جوعارى جىلدامدىقپەن قۇيعىتىپ بوتەن اۋىلداعى بەيتانىس كىسىنىڭ ۇيىنە تۇستىك. اقتاس دەگەن اۋىل ەكەنىن كەيىن بىلدىك. ءۇي يەسى گۇلميرا ەسىمدى اپاي بىزگە ءبىر بولمەسىن بوساتىپ بەرىپ, كەم زاتتارىمىزدىڭ بارلىعىن زىر جۇگىرىپ تولىقتادى. كولىكتە بىزدەن باسقا ارىسقا ۇبت وتكىزۋگە كەلگەن ءبىلىم جانە عىلىم مينيسترلىگىنىڭ ءۇش وكىلى بولعان. بوساندىرۋعا ولار دا كومەكتەستى. ساعات 12.58-دە سالماعى 4,2 كيلو قىز بالا دۇنيەگە كەلدى», دەيدى اكۋشەر ن.زورىمباەۆا.
كەنجەنىڭ ايتۋىنشا, بالا كىندىگىنە ورالىپ تۇنشىعىپ قالعان. سوعان قاراماستان, 25 جىلدان اسا تاجىريبەسى بار مامان ناعيما زۇلبىقارقىزى تاۋەكەلگە بەل بۋعان كورىنەدى. «ءالىم قۇرىپ كەتكەندىكتەن بوساناتىن كەزدە تالىپ قالا بەردىم. بالا تۋىلعاندا كوگەرىپ كەتكەن, دىبىسى شىقپايدى. ماسساج جاساپ, ۇستىنە سۋ شاشىپ ءجۇرىپ وياتتى. وسىنداي قيىن جاعدايدا ءبىزدىڭ امان قالۋىمىزعا بىردەن-ءبىر سەبەپ بولعان ناعيما اپايدىڭ بىلىكتىلىگى دەپ ەسەپتەيمىن. كاسىبىنە دەگەن نەتكەن ادالدىق؟! كومەكشىسى ەكەۋى جول بويى ءوز بالا-شاعاسىنان حابار الماستان, مەنىڭ قاسىمنان ءبىر ەلى الىستامادى. دوسمۇحامەت تە ءبىزدى ۋاقتىلى جەتكىزگەن. ءسال كەشىككەندە نە بولارىن ەلەستەتكىم دە كەلمەيدى. ريزاشىلىعىمدى جەتكىزۋ ءۇشىن قىزىمنىڭ ەسىمىن دوسمۇحامەتتىڭ اناسىنىڭ اتىمەن كاميلا دەپ قويدىق. قىزىمنىڭ كىندىگىن كەسكەن ءبىلىم جانە عىلىم مينيسترلىگىنىڭ وكىلى, اتىراۋلىق بالبوپە اپاي كىندىك شەشە اتاندى. بىزگە بارىن الدىمىزعا توسقان, نەمەرەسىنىڭ بار كيىمى مەن جايالىعىن دايىنداپ بەرگەن اقتاستاعى گۇلميرا اپاعا العىسىم شەكسىز. قازىر ەسىمە الىپ, اللاعا شۇكىرشىلىك ەتىپ وتىرمىن», دەيدى بوسانعان انا.
سۋرەتتە: دوسمۇحامەت ومىرتاەۆءبىز قيىن-قىستاۋ ساتتە ءوز باستارىنا تونگەن قاتەرگە قاراماستان, جۇدىرىقتاي جۇمىلعان جاناشىر جانداردىڭ بارلىعىنا حابارلاسۋعا تىرىستىق. 24 جاستاعى دوسمۇحامەت ومىرتاەۆ ۇلتتىق قاۋىپسىزدىك كوميتەتىندە قىزمەت ەتەدى ەكەن. بۇگىندە ارىستا جۇمىسىن جالعاستىرىپ جاتقان ول بۇل ىستەرىن ازاماتتىق بورىشى دەپ بىلەدى. «جول بويى قىرقىنان شىقپاعان نارەستەسىن كوتەرىپ, ەكى بالاسىن ەرتكەن ايەلدى جانە تاياققا سۇيەنگەن قارت اجەنى كولىگىمە وتىرعىزىپ الدىم. ولاردى كورشى اۋىلعا – قاۋىپسىز جەرگە جەتكىزدىم. كەيىننەن بعم-نىڭ ءۇش قىزمەتكەرىن الدىم. سوسىن وسى تولعاتقان اناعا تاپ بولدىم. اقتاستا ول كىسى بوسانعان سوڭ جەدەل جاردەم شاقىرىپ, سالىپ جىبەردىم دە, ۇبت وتكىزۋگە كەلگەن قىزمەتكەرلەردى مەكەمتاستاعى مەكتەپكە اپارىپ, ديرەكتورىنا تاپسىردىم», دەيدى دوسمۇحامەت. جەدەل جاردەم كەنجەنى قازىعۇرت ورتالىق اۋرۋحاناسىنا جەتكىزگەن. بۇگىندە انا مەن بالانىڭ جاعدايى جاقسى. ەكىنشى قىزىن قۇشاعىنا العان انا بۇگىن وتباسىمەن قاۋىشاتىنىن ايتىپ قۋاندى.
كەشە ءبىلىم جانە عىلىم ءمينيسترى اسحات ايماعامبەتوۆ جاس ايەلدى بوساندىرۋعا كومەكتەسكەن اتىراۋ مۇناي جانە گاز ۋنيۆەرسيتەتى ءوندىرىستى اۆتوماتتاندىرۋ جانە اقپاراتتىق تەحنولوگيالار كافەدراسىنىڭ دوتسەنتى بالبوپە ۋتەنوۆا, شاكارىم اتىنداعى سەمەي مەملەكەتتىك ۋنيۆەرسيتەتى ەكولوگيا جانە قورشاعان ورتانى قورعاۋ كافەدراسىنىڭ مەڭگەرۋشىسى جانات نۇرجۇمانوۆا, سەمەي قالاسىنداعى قازاق يننوۆاتسيالىق گۋمانيتارلىق-زاڭ ۋنيۆەرسيتەتىنىڭ اعا وقىتۋشىسى شايزا دوسكەەۆاعا مينيسترلىكتىڭ قۇرمەت گراموتاسىن تابىستاپ, ەرلىكتەرىن جوعارى باعالادى. جۇمىس بابىمەن جولدارى ارىستا تۇيىسكەن اتىراۋ مەن التايدىڭ پەداگوگتارىنىڭ اپاتتاعى جانكەشتىلىگى كىمگە بولسا دا ۇلگى. «ۇبت كەزىندە جوو قىزمەتكەرلەرى مينيسترلىك وكىلدەرى رەتىندە ءار جاققا ءبولىنىپ تەست الامىز. بيىل 12 ادام ارىس قالاسىنا باردىق. 22-23 ماۋسىم كۇندەرى ەكى لەكپەن ۇبت قابىلدادىق. ءۇشىنشى كۇنى, ياعني 24 ماۋسىم كۇنى مەكتەپتە اپەللياتسيا ءوتكىزىپ جاتقان كەزدە جارىلىس باستالدى. ەشتەڭەگە قاراۋعا شامامىز بولعان جوق. جانات, شايزا ۇشەۋىمىز توبىمىزدان اداسىپ, حالىق بەتتەگەن جاققا قاراي جۇگىرە بەردىك. 10 مەتردەي جەرگە كەپ سناريادتار ءتۇسىپ, جارىلىپ جاتتى. ۇزاق جۇرگەننەن كەيىن دوسمۇحامەتكە كەزىكتىك...», دەيدى بالبوپە ۋتەنوۆا.
«بالاپان باسىنا, تۇرىمتاي تۇسىنا» بولسا-داعى, الاپات اپات اراسىندا كەز كەلگەن جان ءۇشىن باسىن بايگەگە تىگەتىن ادامداردىڭ از ەمەس ەكەنىن وسى ءبىر وقيعانىڭ ءوزى كورسەتىپ تۇرعان جوق پا؟!. ءيا, اسىل قاسيەتتەن اينىماعان ادامدار ارامىزدا!
مايگۇل سۇلتان,
«Egemen Qazaqstan»