جالپى, كوپتىڭ كوكەيىندە جۇرگەن بۇل تاقىرىپتى «Egemen Qazaqstan» گازەتى دە كوتەرىپ, اتالعان اۋدانعا بەيىمبەت مايلين ەسىمىن بەرۋ جونىندە ارنايى ماقالا («بولشەۆيك بي-اعاڭا ورىن بەرەدى», 04.10.2018 ج.) جاريالاعان بولاتىن. كەشەگى جاڭالىق تەك بي-اعانىڭ تۋعان اۋىلى, اۋدانى, ودان قالدى قوستاناي وبلىسىنىڭ عانا ەمەس, بۇكىل ەل قۋانىشىنا اينالدى. قازاق ادەبيەتىن وقىعان ادام بەيىمبەت مايلينگە جەتىك بولار. بي-اعانىڭ شاپانىنان شىعىپ, قازاق ادەبيەتىنىڭ ماقتانىشىنا اينالعان قالامگەرلەر قانشا؟! ءتىپتى ادەبيەت اۋىلىنان الىس بولسا دا, بي-اعانىڭ «شۇعانىڭ بەلگىسى» پوۆەسى مەن مىرقىمباي تۋرالى جازبالارىن بىلمەيتىن قازاق كەمدە-كەم ەمەس پە؟ جازۋشى شىعارمالارىنىڭ قايسىسىن بولسا دا ەزۋ تارتپاي وقىمايتىن ەشكىم جوق-اۋ.
بەيىمبەت مايلين, نۇرقان احمەتبەكوۆ «سازدى ايەت, سارىارقادا تۇيەمويناق, جاتاتىن قىمىز ساۋىپ, بيە بايلاپ» دەپ جىرلايتىن ايەت وزەنىنىڭ بويىندا, تاستاقتى, جازيرا بەلدە تۋعان. وسى جەردە ات جالىن تارتىپ ءمىندى, شىعارمالارىن جازدى. «گۇلدەنسە اۋىل, گۇلدەنەمىز ءبارىمىز!» دەپ بي-اعاڭ ايتىپ كەتكەن اۋىلدىڭ وزەكتى ماسەلەلەرى ءالى سول كۇيىندە. ءبۇگىن تاران تۋرالى ايتىپ جاتپاي-اق قويايىق, بولشەۆيككە بۇگىنگى كوزقاراس تا, شىندىق تا باسقا. ول كىم بولسا دا, بەيىمبەتتىڭ ورنى ودان تومەن بە ەدى؟
– بي-اعانىڭ اتىن اۋدانعا بەرۋ تۋرالى ونىڭ 100 جىلدىعىندا ولجاس سۇلەيمەنوۆ باستاعان جازۋشىلار جوعارى جاققا جازدى, باسىلىمداردا ماقالالار جازىپ كوتەردىك. بىراق سەڭ جىلجىماي قويىپ ەدى. بي-اعا تۇرعاندا تۋعان جەرىندەگى اۋدانعا ودان وزگە كىمنىڭ اتى لايىق بولۋى ءتيىس ەدى؟ مىنە, ادىلدىك, مىنە, ەلدىك! – دەيدى اقىن اقىلبەك شاياحمەت.
وتكەن جىلى «ەگەمەن قازاقستان» دا بي-اعانىڭ ەسىمىن تاران اۋدانىنا بەرۋ تۋرالى ماسەلە كوتەرگەن بولاتىن. وبلىستىق تىلدەردى دامىتۋ باسقارماسىنىڭ ونوماستيكا جانە كورنەكى اقپارات مونيتورينگى ءبولىمى قىزمەتكەرلەرىنىڭ باسشىلىعىمەن اۋدان تۇرعىندارى اراسىندا ءتۇسىندىرۋ جۇمىستارى جۇرگىزىلدى. وعان رەسپۋبليكالىق بەيىمبەت مايلين قورىنىڭ ديرەكتورى مارقۇم جۇمابەك تابىن كەلىپ قاتىستى.
– حالىقتىڭ ءوزى دە بىلەدى عوي. جەرگىلىكتى تۇرعىندار اراسىنان اسا قارسى ەشكىم بولعان جوق, – دەيدى ونوماستيكا جانە كورنەكى اقپارات مونيتورينگى ءبولىمى قىزمەتكەرلەرىنىڭ باسشىسى جاراسقان ناۋرىزبەكوۆ. پرەزيدەنت جارلىعىن ەستىسىمەن جۇرتشىلىق ءبىر-بىرىنەن ءسۇيىنشى سۇراپ, قۋانىشتارىن ءبىلدىرىپ جاتىر.
– ءبىز بۇل وزگەرىستى وسىدان بەس جىل بۇرىن جازۋشىنىڭ 120 جىلدىعىندا دا ەلەڭدەپ كۇتكەن ەدىك. جاقسىلىققا قۋانىپ جاتىرمىز. جازۋشى شىعارمالارى كىتاپ سورەسىندە ءالى كۇنگە دەيىن جاتىپ قالمايدى, كىتاپحانادان وقىرماندار الىپ كەتىپ جاتادى. جاقىندا ءبىز كىتاپ قورىن تولىقتىرۋ ءۇشىن بىرنەشە كىتاپتارعا سۇرانىس بەردىك, سونىڭ اراسىندا دا بەيىمبەت مايلين شىعارمالارى بار, – دەيدى اۋداندىق كىتاپحانانىڭ قىزمەتكەرى گۇلنار ەراليەۆا.
اۋداندا بەيىمبەت مايلين اتىنداعى ورتا مەكتەپ بار. ول تۇرعان ۇزىن كوشە وتكەن جىلى عانا سوۆەت اتاۋىن ىسىرىپ تاستاپ, بي-اعانىڭ اتىن الدى. اسەنكريتوۆ اۋىلدىق وكرۋگىندە بي-اعانىڭ اتىنداعى شارۋاشىلىق بار. جەتەكشىسى ۆلاديمير بۋشكين اۋدانداعى بي-اعاڭا بايلانىستى شارالاردان قالماي, ەلگەزەكتىكپەن قولعابىسىن تيگىزەتىن كورىنەدى. اۋدان ورتالىعى مەن كراسنوسەلسكي اۋىلىندا بي-اعانىڭ ءبيۋستى ورنالاسقان. ال قوستاناي قالاسىنداعى تەمىر جول ۆوكزالىنىڭ الدىندا دا بي-اعاڭ كۇلىمسىرەپ قارسى الادى. ونىڭ ۇستىنە, جاقىندا وبلىس ءماسليحاتىنىڭ شەشىمىمەن بۇرىنعى تاران اۋدانىنىڭ ورتالىعى مەن سەلولىق وكرۋگ بەيىمبەت سۋىنا شومىلىپ وسكەن ايەت وزەنىنىڭ اتىمەن اتالدى.
جاقسىلىقتىڭ ەرتە-كەشى جوق. بي-اعا ءوزى تۋىپ-وسكەن وڭىردەگى ادىلەتتىلىك پەن جاراسىمعا ريزالىقپەن ميىعىنان ك ۇلىپ, تۋعان جەرگە كەلىپ قالعانداي. تورلەتىڭىز, بي-اعا, تورلەتىڭىز!
قوستاناي وبلىسى,
بەيىمبەت اۋدانى