تۇركىستان وبلىسى ارىس قالاسىنداعى اسكەري ءبولىم قويماسىندا بولعان جارىلىسقا بايلانىستى قالا تۇرعىندارى جاپپاي ەۆاكۋاتسيالانۋدا. بۇل جايىندا قر ءىىم توتەنشە جاعدايلار كوميتەتىنىڭ رەسمي وكىلى نۇرسۇلتان نۇراحمەتوۆ ايتتى, دەپ حابارلايدى قازاقپارات ءتىلشىسى.
«ارىس قالاسى اكىمىنىڭ وكىميىمەن حالىقتى ارىستان 50 شاقىرىم جەردەگى مۇنتايتاس اۋىلدىق وكرۋگىنە ەۆاكۋاكتسيالاۋ جۇرگىزىلىپ جاتىر. بۇل ءۇشىن 20 اۆتوبۋس جۇمىلدىرىلعان. سونىمەن قاتار حالىقتى ەۆاكۋاتسيالاۋ ءۇشىن شىمكەنت قالاسىنىڭ اكىمدىگى 36 اۆتوبۋس جىبەردى. شىمكەنت قالاسىندا 15 ەۆاكۋاتسيالاۋ بەكەتى قۇرىلدى. قازىرگى ۋاقىتتا ارىستان 17 بالا جەتكىزىلىپ, سامال-3 شاعىن اۋدانىنداعى نازاربەكوۆا اتىنداعى №87 مەكتەپكە ورنالاستىرىلدى», دەدى ول.
ونىڭ اتاپ وتۋىنشە, وقيعا ورنىنا جۇمىلدىرىلعان ازاماتتىق قورعانىس كۇشتەرىنىڭ ءىس-قيمىلىن ۇيلەستىرۋ ماقساتىندا وڭىرگە قر ءىىم توتەنشە جاعدايلار كوميتەتىنىڭ توراعاسى, گەنەرال-مايور ۆلاديمير بەككەر اتتانىپ كەتتى.