مۇقتاج جانعا كومەك بەرىپ, قينالعانعا سۇيەۋ بولۋدى ازاماتتىق مىندەت دەپ ءبىلگەن حالقىمىز قاي زاماندا دا جاقسىلىقتىڭ باعاسىن جوعارى قويادى. بۇل ءۇردىس بۇگىن دە ۇمىت قالعان جوق. رامازان ايىندا «ەمبىمۇنايگاز» اق باسقارما توراعاسى ءانۋار جاقسىبەكوۆتىڭ ۇجىمعا ۇندەۋ جاريالاپ, ءبىر كۇندىك جالاقى ەسەبىنەن قامقورلىققا ءزارۋ وتباسىلارعا قولۇشىن سوزۋعا شاقىرعانى دا سول كوپتى كورگەن كورەگەندىكتىڭ بەلگىسى. قاشاندا يگى ىستەرگە قولداۋ تانىتىپ ءجۇرەتىن ەمبىلىك مۇنايشىلار بۇل باستامادان قالىس قالمادى, ءبىراۋىزدان قولدادى. سول بىرلىكتىڭ ارقاسىندا وبلىستىڭ بەس اۋدانىنداعى قامقورلىققا ءزارۋ وتباسىلارعا تۇرعىن ۇيلەر تابىستالدى. جاڭا باسپانا كىلتىن يەلەنەتىندەردى تاڭداپ-تارازىلاۋ دا وڭايعا سوققان جوق. ارنايى كوميسسيا قۇرىلىپ, ەكى اپتا بويى اۋداندارداعى كومەككە مۇقتاج جانداردىڭ جاعدايلارى زەردەلەندى, ناتيجەسىندە سەگىز وتباسىنا ءۇي ساتىپ الىپ بەرۋ تۋرالى شەشىم قابىلداندى.
العاشقى باسپانانى قۇرمانعازى اۋدانىنىڭ ورتالىعى قۇرمانعازى اۋىلىندا التى بالا تاربيەلەپ وتىرعان ۆيكتور كيمنىڭ وتباسى ەنشىلەدى. ءۇش بولمەلى ءۇيدىڭ كىلتىن تابىستاعان «ەمبىمۇنايگاز» اق باسقارما توراعاسى ءانۋار جاقسىبەكوۆ: «بيىل ناۋرىز ايىندا پرەمەر-ءمينيستردىڭ ورىنباسارى گۇلشارا ابدىقالىقوۆا مەن ەڭبەك جانە حالىقتى الەۋمەتتىك قورعاۋ ءمينيسترى بەردىبەك ساپارباەۆ ايماققا ارنايى ساپارلارى بارىسىندا ءىرى ءوندىرىس ورىندارىنىڭ باسشىلارىمەن, بيزنەس وكىلدەرىمەن كەزدەستى. سول كەزدە الەۋمەتتىك جاعىنان از قامتىلعان وتباسىلاردى قولداپ, تۇرعىن ءۇي ماسەلەلەرىن شەشۋگە كومەكتەسۋ ماسەلەسى قوزعالدى. وسىعان وراي ءوزىم جەتەكشىلىك ەتەتىن ۇجىمعا رامازان ايى قارساڭىندا ءبىر كۇندىك جالاقىلارى ەسەبىنەن مۇقتاج جاندارعا قولۇشىن سوزۋ ءجونىندە ۇندەۋ تاستادىم. ەمبىلىك مۇنايشىلار مەنىڭ ۇندەۋىمە ءبىراۋىزدان قولداۋ كورسەتىپ, ءناتيجەسىندە ءبىراز قاراجات جينالدى. مىنە, ۇجىم بىرلىگىنىڭ ارقاسىندا 8 كوپ بالالى وتباسى باسپانالى بولىپ وتىر», – دەدى. بۇعان دەيىن باسىبايلى باسپانالارى بولماعان اۋىل تۇرعىندارى ارماندارىنىڭ ءبىر-اق كۇندە ورىندالعاندارىنا قۋانىشتارىن جاسىرا المادى.
ەكىنشى ءۇي يساتاي اۋدانىنداعى يساتاي ستانساسىندا بەرىلدى. كوپ بالالى باۋىرجان سۇلەيمەنوۆتىڭ وتباسى بارلىق جاعدايى جاسالعان جاڭا ءپاتەرگە قونىس اۋداردى. ون بالا تاربيەلەپ وتىرعان سۇلەيمەنوۆتەردىڭ شاڭىراعى وسىلايشا شاتتىققا تولدى. اۋىل اكىمى ۇلبولسىن حيسىم مۇنايشىلاردىڭ جاقسىلىعىنا جەرگىلىكتى تۇرعىندار اتىنان ريزاشىلىعىن ءبىلدىردى.
يساتاي اۋدانىنىڭ ورتالىعى اققىستاۋ سەلوسىندا دا بۇل كۇنى قونىس تويى تويلاندى. كوپ بالالى ارمان ورازاقوۆ دەنساۋلىعىنا بايلانىستى جۇمىسسىز, جۇبايى بالا تاربيەسىمەن ۇيدە وتىر. وتباسىنىڭ قيىن جاعدايىن ەسكەرگەن ەمبىلىكتەر تولىق ءجوندەۋدەن وتكەن ءۇش بولمەلى باسپانانى تارتۋ ەتتى.
وبلىس ورتالىعىنان شالعايدا ورنالاسقان قىزىلقوعا اۋدانى دا «ەمبىمۇنايگاز» كومپانياسىنىڭ نازارىنان تىس قالعان جوق. مۇقىر اۋىلىنداعى ءۇش بالالى جالعىزباستى انا اقمارال باكىشەۆا مەن جامانسور ەلدى مەكەنىندەگى جالعىزباستى اكە ەسەنباي ەرسايىن جاڭا قونىسقا يە بولدى. اقمارال بۇعان دەيىن اۋىلداعى اپاتتى جاعدايدا تۇرعان ەسكى ءۇيدى پانالاپ كەلسە, ەرسايىن ەسەنباي ەكى كىشكەنتاي قىزىمەن اعايىندارىنىڭ ۇيلەرىن جاعالاپ جۇرگەن.
تۇرعىن ءۇي تاپسىرۋ سالتاناتى جىلىوي اۋدانى ورتالىعى قۇلسارى قالاسىندا جالعاسىن تاپتى. بەس بالانى ءبىر ءوزى تاربيەلەپ وتىرعان گ.قارامولديەۆا مۇنايشىلارعا العىسىن ايتىپ, قۋانىشتان جانارىنا جاس الدى.
ءبىر اپتاعا سوزىلعان قايىرىمدىلىق شاراسى ماقات اۋدانىندا مارەگە جەتتى. كوپ بالالى انالار گ.ابدەنوۆا مەن ا.سەيىتوۆا ەمبىلىك مۇنايشىلاردىڭ كومەگىمەن جاڭا ۇيگە كوشتى. ءپاتەر كىلتىن تابىستاعان كومپانيا باسشىلىعى بارلىق وتباسىلارعا ازىق-ت ۇلىك قورىنان دا كومەك ۇيىمداستىردى. مۇنايشىلاردىڭ بۇل سىيى جاڭا ۇيگە كىرگەن وتباسىلارعا عانا ەمەس, اۋىلداستارى ءۇشىن دە قۋانىشتى مەرەكەگە اينالدى. شاشۋ شاشىپ, قونىس تويعا قۇتتى بولسىن ايتىپ كەلۋشىلەر قاتارى سيرەمەدى. اۋىل-ەلدىڭ اراسىن جاقىنداتىپ, بەرەكە-بىرلىككە ۇندەيتىن مۇنداي قايىرىمدىلىق شارالارىنىڭ تاربيەلىك ءمانى دە زور ەكەنىن اڭعاردىق.
«ەمبىمۇنايگازدىڭ» بۇعان دەيىنگى دە ىزگى ىستەرى از ەمەس. 2015 جىلى ءبىر كۇندىك جالاقىلارى ەسەبىنەن اتىراۋ قالاسىنداعى كوپ بالالى وتباسى تۇراتىن ۇيگە كۇردەلى جوندەۋ جۇرگىزىپ بەردى جانە جالعىزىلىكتى قارياعا جاڭا باسپانا سىيلادى. 2016 جىلى اۋىر دەرتكە شالدىققان بالالارى بار وتباسىنا ءۇي سالىپ بەردى. 2018 جىلى قاتتى نوسەردەن زارداپ شەككەن شىعىس قازاقستان وبلىسى زىريان اۋدانىنىڭ تۇرعىندارىنا قولداۋ كورسەتىپ, 7 وتباسىن باسپانامەن قامتاماسىز ەتتى. بۇدان بولەك 2012-2018 جىلدارى اتىراۋ وبلىسىنىڭ ينفراقۇرىلىمىن دامىتۋعا 4,3 ملرد تەڭگەدەن استام قاراجات ءبولدى. تۇرمىس تاۋقىمەتى قيناپ, باسپاناسىز, كورىنگەن بوساعادا تەنتىرەپ جۇرگەن سەگىز وتباسىنىڭ ەندى جاڭا دا جايلى ۇيدە ءومىر ءسۇرىپ, ۇل-قىزىن الاڭسىز ءوسىرەتىنى قۋانتادى. وتاندىق كومپانيانىڭ ادام تاعدىرىنا الاڭداۋشىلىق تانىتىپ, قولداۋ كورسەتۋى, قامقورلىق جاساۋى الەۋمەتتىك جاۋاپكەرشىلىكتى ابىرويمەن اتقارىپ جۇرگەنىنىڭ ناقتى ايعاعى.
اتىراۋ