بىراق حالىقتىڭ قىراعى نازارى قانشالىقتى قاداعالاعانىمەن تەڭىزدى قولدان ءبۇلدىرۋشىلەر دە ايىلىن جياتىن ەمەس. تەڭىزدەن زاڭسىز بالىق اۋلاۋشىلار, ءوزگە دە زياندى ارەكەتتەر ءوز الدىنا, لاس سۋ توگۋ جاعدايىنىڭ قايتالانۋى اقىلعا سىيمايدى. جۋىردا اقتاۋ قالاسىنىڭ 1-شاعىن اۋدان تۇسىنداعى جاعالاۋعا لاس سۋ توگىلىپ, ءتيىستى ورىندار كىنالى مەكەمەنى ىزدەپ تاپقان ەدى. لاس سۋدىڭ قۇرامىندا نيكەل, مارگانەتس پەن مىس سىندى دەنساۋلىققا جانە قورشاعان ورتاعا زياندى ەلەمەنتتەر مولشەرىنىڭ كوپ ەكەندىگى انىقتالدى. كىنالى مەكەمە تەڭىزگە زيان كەلتىرگەنى ءۇشىن 1,7 ملن تەڭگە ايىپپۇل ارقالاعان ەدى.
بۇل جولى جاعىمسىز جاعداي تاعى قايتالاندى. ساپ-سارى سۋ قالانىڭ 1-شاعىن اۋدانى تۇسىنداعى جاعالاۋعا كانال ارقىلى قۇيىلعان.
ماڭعىستاۋ وبلىستىق ەكولوگيا دەپارتامەنتى قىزمەتكەرلەرى تەڭىز جاعاسىنا بارىپ, سۋدىڭ سىناماسىن الدى, ازىرگە ونىڭ قورىتىندىسى انىقتالعان جوق. لاس سۋ قۇرامىنداعى زياندىلىق مولشەرى دە, ونى كوك تەڭىزگە توككەندەر دە انىقتالىپ, ايىپپۇل سالىنار. بىراق مىڭداعان تۇرعىننىڭ اۋىز سۋىنا اينالعان, ونسىز دا ەكولوگيالىق احۋالى الاڭداتارلىق كوك تەڭىزدى قولدان لاستاۋ قاسكويلىك ەمەي نەمەنە؟! بىلە تۇرا قولدان ءبۇلدىرۋدى قاساقانا جاساۋ دەۋدەن باسقا امال جوق. سوندا بۇلاي تابيعاتتى بۇلدىرە بەرۋ قاشانعا دەيىن جالعاسادى؟
ماڭعىستاۋ وبلىسى