وڭتۇستىك افريكاداعى ەڭ كونە جانە ەڭ ءىرى كينوفەستيۆالدەردىڭ بىرىنەن سانالاتىن Durban IFF كينو بايگەسىنە الەمنىڭ تۇكپىر-تۇكپىرىنەن 180-نەن استام فيلم ۇسىنىلىپ وتىر. سونداي-اق فەستيۆال شەڭبەرىندە ونەر تاقىرىبى مەن كينو بيزنەسىنە ارنالعان ءتۇرلى سەمينارلار مەن دوڭگەلەك ۇستەلدەر دە ۇيىمداستىرىلماق.
«تالان» كارتيناسىندا تانىمال قازاقستاندىق رەجيسسەر بولات قالىمبەتوۆ قيىن-قىستاۋ جىلداردا ءبىر-بىرىنەن اجىراپ قالعان اعايىندى ەكى باۋىردىڭ تاريحىن ۇلتتىق كينو تىلىمەن شىنايى باياندايدى. باۋىرلار بىرنەشە جىلدان كەيىن كۇتپەگەن جەردەن كەزدەسەدى. ادامدار اراسىنداعى باۋىرمالدىق پەن مەيىرىمدى, ادامنان دا, قوعامنان دا الىستاپ, جويىلىپ بارا جاتقان ىزگى قۇندىلىقتاردى دارىپتەيتىن ءفيلمنىڭ مازمۇنى تەرەڭ, ايتار ويى قاتپارلى.
ەستەرىڭىزگە سالا كەتەيىك, وتكەن جىلى «تالان» ءفيلمى شاكەن ايمانوۆتىڭ 14-حالىقارالىق كينوفەستيۆالىندە «ۇزدىك رەجيسسەرلىك جۇمىس» دەپ تانىلعان بولاتىن. سونداي-اق, وسى فەستيۆالدە تاريحي كارتينا «ەل ارنا» تەلەارناسىنىڭ «ەل ارنا تاڭداۋى» ديپلومىنا يە بولدى.
الماتى