ماڭىزدى مادەني شارانىڭ سالتاناتتى اشىلۋىندا جەزقازعان قالاسى اكىمىنىڭ ورىنباسارى زينا اقىلبەكوۆا, قاراعاندى وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ باسشىسى ەركەبۇلان اعىمباەۆ جانە «مۇراعات-2025» عىلىمي-ادىستەمەلىك ورتالىعىنىڭ جەتەكشىسى بەرىك ابدىعالي ۇلى, قاراعاندى وبلىستىق ءماسليحاتىنىڭ دەپۋتاتى, مەتسەنات بەكزات التىنبەكوۆ قۇتتىقتاۋ ءسوز سويلەدى.
فەستيۆالدىڭ العاشقى كۇنى «ءوز ەسىمىڭدى تاريحتا قالدىر» اكتسياسى وتكەننەن كەيىن, جەزقازعان تاريحي-ارحەولوگيالىق مۇراجايى, تۇرىك رەسپۋبليكاسىنىڭ انكارا ۋنيۆەرسيتەتى مەن استراحان مۋزەي-قورىعى اراسىندا ىنتىماقتاستىق تۋرالى ۇشجاقتى مەموراندۋمعا قول قويىلدى.
بۇدان كەيىن باعدارلاماعا ساي, قولدانبالى ونەر بويىنشا شەبەرلىك دارىستەرى ۇيىمداستىرىلىپ, وعان مۇراجايلاردىڭ سۋرەتشى-رەستاۆراتورلارى, قىش ءىسىنىڭ شەبەرلەرى بەلسەنە ات سالىستى.
فەستيۆالدە ۇيىمداستىرىلعان « ۇلى دالا مۇراسى» ەكسپوزيتسياسىندا ەلىمىزدىڭ 60-تان استام بىرەگەي جادىگەرى قاتىسۋشىلار مەن قوناقتار نازارىنا ۇسىنىلدى. سونىڭ ىشىندە جۇرتتى وزىنە قاراتقان ەكسپوناتتىڭ ءبىرى «التىن ادام» جادىگەرىنىڭ كوشىرمەسى بولدى. سونىمەن قاتار, كورمەدە باسقا ەلدەردىڭ مۇراجايلارىنان جەتكىزىلگەن سيرەك كەزدەسەتىن جادىگەرلەر دە تانىستىرىلدى.
حالىقارالىق فەستيۆالگە قاتىسۋشى قوناقتار قۇر قول كەلمەگەن ەكەن. مىسالى, قىتاي دەلەگاتسياسى قاراعاندى وبلىسىنىڭ مادەنيەت, مۇراعاتتار جانە قۇجاتتاما باسقارماسىنىڭ يەلىگىنە XVIII عاسىرداعى قىتاي مەن قازاقستان اراسىنداعى جىبەك ساۋداسى تۋرالى قۇجاتتىڭ كوشىرمەسىن سىيعا تارتتى. موڭعول دەلەگاتسياسى بولسا, قازاق دياسپوراسىنىڭ موڭعوليا اۋماعىنا قالاي قونىس اۋدارعانى تۋرالى قۇجاتتىڭ كوشىرمەسىن اكەلىپتى. ال وزبەك دەلەگاتسياسى XIX-XX عاسىرلارداعى قازاق حالقىنىڭ تاريحىنا قاتىستى قۇجاتتار مەن فوتوسۋرەتتەردىڭ كوشىرمەسىن تارتۋ ەتتى.
فەستيۆالدىڭ ەكىنشى كۇنى قاتىسۋشىلار ءۇشىن مۇراجاي قىزمەتكەرلەرىنە ارنالعان «مۇراجاي قىزمەتىن جاھاندىق جاڭعىرتۋ – ۋاقىت قاجەتتىلىگى» تاقىرىبىندا سەمينار-ترەنينگ ۇيىمداستىرىلادى. شارا بارىسىندا انكارا ۋنيۆەرسيتەتىنىڭ پروفەسسورى ايشا چاكير يلحان, جوعارى ساناتتى ەكسكۋرسوۆود-ادىسكەر, قازاق سپورت جانە تۋريزم اكادەمياسىنىڭ تۋريزم ساراپشىسى, يۋنەسكو ۇلتتىق كوميسسياسىنىڭ مۇشەسى باقىت ورازىمبەتوۆا, تاريح عىلىمدارىنىڭ كانديداتى, ءال-فارابي اتىنداعى قازۇۋ ارحەولوگيا, ەتنولوگيا جانە مۋزەولوگيا كافەدراسىنىڭ دوتسەنتى, پروفەسسور تاتتىگۇل قارتاەۆا جانە باسقا دا تانىمال تۇلعالار ءدارىس وقىپ, تاجىريبەلەرىمەن بولىسەدى.
حالىقارالىق فەستيۆالدىڭ قورىتىندى كۇنى, ياعني 13 ماۋسىمدا قوناقتارعا ارنالىپ ۇلت ۇياسى – ۇلىتاۋدىڭ تاريح تۇنعان قاسيەتتى جەرلەرىنە ساياحات ۇيىمداستىرىلادى.
ەسكە سالساق, «رۋحاني جاڭعىرۋ» باعدارلاماسى اياسىندا ۇيىمداستىرىلعان بۇل مادەني شارا قازاقستان رەسپۋبليكاسىنىڭ تۇڭعىش پرەزيدەنتى ن.ءا. نازارباەۆتىڭ «قوعامدىق سانانى جاڭعىرتۋ» جانە « ۇلى دالانىڭ جەتى قىرى» اتتى باعدارلامالىق ماقالالارىندا ايتىلعان مىندەتتەردى جۇزەگە اسىرۋعا سەپتىگىن تيگىزۋدى ماقسات ەتەدى.