بەيسەنبى, 14 اقپان 2013 6:31
ۇلىبريتانيانىڭ ءۇش جاسار تۇرعىنى الەمنىڭ عۇلامالارىن ارتتا قالدىردى
انگليانىڭ گيلفورد قالاسىنىڭ ءۇش جاسار تۇرعىنى اليسا اموس جوعارى ينتەللەكت كوەففيتسيەنتىن كورسەتكەن ادامدار ەنەتىن «مەنسا» ۇيىمىنىڭ ەڭ جاس مۇشەسى اتاندى, دەپ حابارلادى Daily Mail.
كىشكەنتاي ءبۇلدىرشىننىڭ IQكورسەتكىشى تاڭعالارلىق – 162. اليسا ادامنىڭ كوگنيتيۆتىك, ياعني تانىمدىق قابىلەتتەرىن باعالايتىن ستەنفورد-بينە تەستىن تاپسىرعان. ونىڭ ىشىندە جالپى ءبىلىم دەڭگەيى, جادى, قورشاعان ورتانى قابىلداۋ قابىلەتى جانە تاعى باسقالارى سىناقتان وتكىزىلگەن.
بالدىرعاننىڭ كورسەتكىشى الەمگە ايگىلى كەيبىر عالىمدار مەن تاريحي تۇلعالاردىكىنەن دە اناعۇرلىم جوعارى بولىپ شىقتى. اقىلدى بالاقايدىڭ كورسەتكىشتەرى IQ دارەجەسى 160 دەپ بولجانىپ جۇرگەن سالىستىرمالى بولجال تەورياسىنىڭ اۆتورى البەرت ەينشتەيننەن, وسى زامانعى اتاقتى فيزيك-تەورەتيك جانە عارىشتانۋشى ستيۆەن حوكينگتەن (160), ءپسيحواناليزدىڭ نەگىزىن قالاۋشى زيگمۋند فرەيدتەن (156) اسىپ تۇسكەن. بۇل جاعىنان كەلگەندە, اليسا سونداي-اق, اقش-تىڭ بۇرىنعى پرەزيدەنتتەرى اۆراام لينكولننەن (128), بەندجامين فرانكليننەن (160), بيلل كلينتوننان (137) جانە فرانتسۋز يمپەراتورى ناپولەون بوناپارتتان (145) جوعارى تۇر.
برازيليادا اسپاننان ورمەكشى جاۋدى
برازيليانىڭ سانتو انتونيو دا پلاتينا (Santo Antonio da Platina) قالاسىندا ەرەكشە تابيعي قۇبىلىس ورىن الدى. اسپاننان جاڭبىر ورنىنا ورمەكشى جاۋدى, دەپ حابارلادى «Baq.kz»
جاڭبىر جاۋعان ساتتە اعاشتاردا جانە ەلەكتر توگىن تاراتۋشى سىمداردا ورمەكشىلەر قاپتاپ كەتكەن. جەكسەنبى كۇنى 20 جاستاعى ۆەب-ديزاينەر ەريك رەيس دالاعا شىققاندا, ءوز كوزىنە ءوزى سەنبەگەن. ول اسپاننان جاپالاق-جاپالاق قار سەكىلدى ورمەكشىلەردىڭ ءتۇسىپ جاتقانىن بايقايدى.
ەريك ورمەكشى جاڭبىرىنىڭ ۆيدەوسىن YouTube-كە سالىپ, «مەن ورمەكشىلەردىڭ اسپاننان ءتۇسۋ سەبەبىن تۇسىنە الار ەمەسپىن. بىراق, ەندى ولارعا زەرتتەۋ جۇرگىزىپ, قورىتىندىسىن وسى جەردە تاعى جاريالايتىن بولامىن» دەپ جازادى. ءبىر-ەكى كۇن ىشىندە بەينەماتەريال كوپتىڭ نازارىن وزىنە اۋدارىپ ۇلگەرىپتى. جەرگىلىكتى بيولوگ عالىمدار ورمەكشى جاڭبىرىنان ەش قاۋىپ جوق ەكەنىن, بىراق, مۇنداي جايتتەر كوپ كەزدەسپەيتىن قۇبىلىس ەكەنىن ايتقان.
ازىرلەگەن