جەزقازعان وڭىرىندە 11-13 ماۋسىم كۇندەرى « ۇلى دالا مۇراسى» اتتى حالىقارالىق فەستيۆالى وتەدى. ەلباسىنىڭ «قوعامدىق سانانى جاڭعىرتۋ» جانە « ۇلى دالانىڭ جەتى قىرى» باعدارلامالىق ماقالالارى اياسىندا ۇيىمداستىرىلعالى وتىرعان بۇل ايتۋلى شاراعا وتاندىق جانە شەتەلدىك مۇراجايلار مەن مۇراعاتتاردىڭ وكىلدەرى قاتىسادى. اتاپ ايتقاندا, فەستيۆالگە تۇركيا, مىسىر, قىتاي, رەسەي, وزبەكستان جانە موڭعوليادان دەلەگاتتار كەلمەكشى.
تاريحي-مادەني مۇرانى ساقتاۋ جانە دارىپتەۋدى, قازاق حالقىنىڭ تاريحىن زەرتتەۋدى ماقسات ەتكەن شاراعا قاراعاندى وبلىسىنىڭ اكىمدىگى جانە قاراعاندى وبلىسىنىڭ مادەنيەت, مۇراعاتتار جانە قۇجاتتاما باسقارماسى مۇرىندىق بولىپ وتىر.
فەستيۆال باعدارلاماسى اياسىندا «تاريحتا ءوز ەسىمىڭدى قالدىر» اكتسياسى, شەبەرلىك دارىستەرى, مۇراجاي قىزمەتكەرلەرىنە ارنالعان سەمينار-ترەنينگتەر, ۇلىتاۋدىڭ قاسيەتتى جەرلەرىنە ەكسكۋرسيالار ۇيىمداستىرىلادى دەپ جوسپارلانعان.
« ۇلى دالا مۇراسى» حالىقارالىق فەستيۆالىنىڭ اشىلۋ سالتاناتى 11 ماۋسىم كۇنى ساعات 10.00-دە جەزقازعان تاريحي-ارحەولوگيالىق مۇراجايىنىڭ الاڭىندا (الاشاحان كوشەسى, 22) وتەدى.