ءتورت كۇننىڭ قورىتىندىسى بويىنشا راللي جالپى ەسەپتە بۇرىنعىداي اۆتوشاباندوز ناسەر ءال-اتتيا كوش باستاپ كەلەدى, كاتارلىق ءتورت كەزەڭنىڭ ەكەۋىندە توپ جاردى. ءال-اتتيا مەن ماتە بومەل ەكيپاجىنىڭ جالپى ەسەپتە ياكۋب پشيگونسكيدەن 9 مينۋت, ال بەرنحارد تەن برينكەدەن 10 مينۋت باسىمدىعى بار. ازىرگە ەكىنشى ورىن ءۇشىن وسى نيدەرلاندتىق جانە پولشالىق اۆتوجارىسشىلار اراسىندا وتكىر باسەكەلەستىك ورىن الۋدا. ءتورتىنشى ورىنعا ەرلى-زايىپتى ستەفان مەن اندرەا پەتەرانسەلدەردىڭ دۋەتى ورنالاسقان.
جارىستىڭ ءتورتىنشى كۇنى تاعى دا كەندىرلىدەن باستالدى. بۇل كەزەڭدە شاباندوزدار الدىمەن كۇردەلى ناۆيگاتسياسى بار قۇمدى ۋچاسكەلەردى ءجۇرىپ ءوتىپ, جىلدام دالا جولدارىنا شىقتى. 58 كيلومەتردە ولاردى تاستى توبەمەن تومەن باعىتتالاتىن جول كۇتىپ تۇردى. 120 كيلومەتردەن كەيىن رالليستەر جىلدام تەگىس جولداردى ەڭسەرىپ, مارە سىزىعىنىڭ الدىندا كەڭ گرەيدەرگە شىقتى.
ءتورتىنشى ارنايى ۋچاسكەدە ەڭ ۇزدىك ۋاقىتتى ساۋد ارابياسىنىڭ اۆتوشاباندوزى ءال-رادجي تىركەپ, قاشىقتىقتى 3 ساعات 45 مينۋت جانە 53 سەكۋندتا ءجۇرىپ ءوتتى. وتكەن جىلعى قازاقستاندىق كەزەڭنىڭ جەڭىمپازى كەشەگى اپاتتى جاعداي جانە كوپ ۋاقىت جوعالتۋىنا قاراماستان, جارىستىڭ سوڭىنان دەيىن كۇرەسۋدى شەشتى.
الايدا, يازيد ءال-رادجي مەن ديرك فون تسيتسەۆيتستىڭ كومانداسى «راللي قازاقستان 2019» جارىسىندا جەڭىسكە جەتۋدىڭ مۇمكىندىگىن جوعالتىپ الدى, سەبەبى ەكيپاج ءۇشىنشى كەزەڭنىڭ مارە سىزىعىن كەسەر الدىندا سپورتتىق رەگلامەنتتى بۇزعانى ءۇشىن 4 ساعاتتىق پەناليزاتسيا الدى.
-كەشەگى وقيعادان كەيىن بىزدە بارلىعى دۇرىستالدى. كولىك دوڭگەلەگى ءدىن-امان جانە ەشقانداي قيىنشىلىققا تاپ بولمادىق. ءبىز التىنشى بولىپ جارىستى باستادىق, الدىمەن زاپلەتالدى وزدىق, سودان كەيىن مارە سىزىعىنا دەيىن پەتەرانسەلدىڭ ارتىنان ءجۇرىپ وتىردىق, دەدى ءال-رادجي.
بۇگىنگى جەڭىسكە قاراماستان, ءال-رادجي جارىس كوشباسشىسىنان جالپى ەسەپتە 5 ساعاتقا ارتتا تۇر.
«داكار» راللي-مارافونىنىڭ 13 دۇركىن جەڭىمپازى فرانتسۋز اۆتوشاباندوزى ستەفان پەتەرانسەل بۇگىن مارە سىزىعىنا ەكىنشى بولىپ كەلدى. بۇل - قازاقستانداعى الەم كۋبوگى كەزەڭىندەگى ەرلى-زايىپتى ستەفان مەن اندرەا پەتەرانسەل دۋەتىنىڭ ۇزدىك ناتيجەسى. «راللي قازاقستان» دەبيۋتانتتارى ماڭعىستاۋ ءشول جولدارىنىڭ ەرەكشەلىگىنە بىرتىندەپ بوي ۇيرەتىپ كەلەدى.
-بۇگىن ءبىز جارىستى ءتورتىنشى كەزەكتە باستادىق. الدىمەن پشيگونسكيدى قۋىپ جەتتىك. قازىر ول جانە تەن برينكە الدىڭعى ورىندارعا تالاسۋدا. ال بىزدەن جەڭىستىڭ اۋىلى الىستاپ كەتتى, سوندىقتان مەن ونى باسىپ وزۋعا تىرىسپايمىن جانە كەدەرگى جاساماۋعا تىرىسامىن. جالپى, بۇگىن ءساتتى كەزەڭ بولدى, دەدى ستەفان پەتەرانسەل.
ءوزىنىڭ Mini John Cooper Works Rally اۆتوكولىگىمەن ياكۋب پشيگونسكي جانە ونىڭ شتۋرمانى تيمو گوتتشالكپەن مارە سىزىعىن ءۇشىنشى بولىپ كەستى. پولشا ەلىنىڭ اۆتوشاباندوزى ارنايى ۋچاسكەنى جىلدام ءارى سەنىمدى ءجۇرىپ ءوتىپ, ناتيجەسىندە بەرنحارد تەن برينكەدەن ءبىر جارىم مينۋتقا ەرتە كەلدى.
-ءۇشىنشى پوزيتسيادان جولعا شىقتىق. جولدا كوپ شالشىق سۋلار كەزىكتى. ءبىز بارىمىزدى سالدىق. جوسپار تەك برينكەنى باسىپ وزۋ بولاتىن, ول ءبىزدىڭ قولىمىزدان كەلدى. وتكەن جىلمەن سالىستىرعاندا ءسوزسىز ءبىز جىلدام جۇرۋدەمىز. ەڭ ماڭىزدىسى - اقتىق ناتيجە, دەدى ياكۋب پشيگونسكي.
ۆلاديمير ۆاسيلەۆتىڭ جارىستان شىعىپ قالۋى مەن يازيد ءال-ءرادجيدىڭ كوپ ساعاتتىق پەناليزاتسياسى ميروسلاۆ زاپلەتال مەن دەنيس كروتوۆتىڭ بەسىنشى ورىنعا تالاسۋىنا جول اشتى. ازىرگە ءتورت كەزەڭنىڭ قورىتىندىسى بويىنشا چەحيالىق شاباندوز رەسەيلىك سپورتشىدان جالپى ەسەپتە بەس مينۋتقا الدا كەلەدى.
قازاقستاندىق اندرەي چەرەدنيكوۆ پەن يگنات فالكوۆتىڭ ەكيپاجى جارىستىڭ بارلىق كەزەڭدەرىندە بىرقالىپتى ناتيجە كورسەتىپ كەلەدى. كوماندا بۇگىن 4 ساعات 48 مينۋت پەن 4 سەكۋندتا قاشىقتىقتى ەڭسەرىپ, سەگىزىنشى بولىپ مارەگە جەتتى. ءتورت كۇننىڭ قورىتىندىسى بويىنشا "OFF ROAD Kazakhstan" كومانداسىنىڭ وكىلدەرى جالپى ەسەپتە جەتىنشى ورىنعا جايعاستى.
ت2 جول تالعامايتىن كولىكتەر ساناتىندا قازاقستاندىق كيريلل چەرنەنكوۆ پەن الەكسەي مۋننىڭ ەكيپاجى قاشىقتىقتى 6 ساعات 12 مينۋت 30 سەكۋندتا ءجۇرىپ ءوتتى. دەگەنمەن, بۇل ساناتتا جالپى ەسەپتە كاتارلىق موححامەد ءال-مەەردىڭ ەكيپاجى كوش باستاپ تۇر.
ت3 ساناتىندا فەدور ۆوروبەۆتىڭ ەكيپاجى ەڭ جىلدام ۋاقىتتى كورسەتتى, ولار 5 ساعات 5 مينۋت جانە 32 سەكۋند ناتيجەسىمەن مارەگە ءبىرىنشى جەتتى.
جۇك كولىكتەرى سەرياسىندا ءتورتىنشى كەزەڭدە رەسەيلىك «كاماز-ماستەر» كومانداسىنىڭ وكىلى دميتري سوتنيكوۆ تاعى دا جەڭىس تويىن تويلادى. ەكيپاجدىڭ كورسەتكىشى 5 ساعات 39 مينۋت 29 سەكۋند.
راللي-رەيدتىڭ بەسىنشى كۇنىندە اۆتوشاباندوزدار اقتاۋ قالاسىنىڭ سولتۇستىگىندەگى اينالما جولعا بەت الىپ, 290 شاقىرىمدى ءجۇرىپ وتەدى.
«راللي قازاقستان 2019» راللي-رەيدىنەن الەم كۋبوگىنىڭ كەزەڭى ماڭعىستاۋ وبلىسىنىڭ اۋماعىندا وتۋدە جانە ول 1 ماۋسىمدا اياقتالادى.
ماڭعىستاۋ وبلىسى