بۇل كەزدەسۋگە رەسپۋبليكالىق جانە حالىقارالىق بايقاۋلاردىڭ, وليمپيادالاردىڭ 55 قاتىسۋشىسى شاقىرىلعان ەدى. ولار بيىل 58 جۇلدە, اتاپ ايتقاندا, 15 التىن, 13 كۇمىس جانە 30 قولا مەدال العان بولاتىن.
ءوڭىر باسشىسى جاستارمەن ايماقتىڭ دامۋى تۋرالى اڭگىمەلەسىپ سۇراقتارىنا جاۋاپ بەردى.
– ەكىنشى جىل قاتارىنان ءبىزدىڭ مەكتەپ تۇلەكتەرىنىڭ 97%-ى جوعارى وقۋ ورىندارى مەن كوللەدجدەرگە تۇسەدى. ەندى كەم دەگەندە وبلىستاعى مەكتەپ ءبىتىرۋشىلەردىڭ 50%-ى جوعارى وقۋ ورىندارىنا, ونىڭ ىشىندە شەتەلدىك ۋنيۆەرسيتەتتەرگە دە ءتۇسۋىن كوزدەپ وتىرمىز. ماقساتىمىز – ايماق جاستارىنىڭ گارۆارد, يەل جانە ماسساچۋسەتس ۋنيۆەرسيتەتتەرىندە ءبىلىم الۋىنا جاعداي جاساۋ. سونداي-اق تالانتتى جاستارعا كاسىپكەرلىك, ديزاين, كوممۋنيكاتسيا سياقتى سالالاردا جاڭا تەحنولوگيالاردى ەنگىزىپ, قولداناتىن رەسەيدىڭ «كۆانتوريۋم», «سيريۋس» سەكىلدى ءىرى ورتالىقتاردىڭ تاجىريبەسىن مەڭگەرۋى وتە ماڭىزدى – دەدى ايماق باسشىسى.وسى ماقساتتا قىزىلوردالىق وقۋشىلاردى «بولاشاق» باعدارلاماسىنىڭ تۇلەكتەرى قۇرعان ەلوردالىق «Astana Garden School» جەكەمەنشىك مەكتەبىندە وقىتۋدى ۇيىمداستىرۋ جانە نازارباەۆ زياتكەرلىك مەكتەبىنىڭ بازاسىندا وقۋشىلاردى شەت مەملەكەتتەگى ىرگەلى ۋنيۆەرسيتەتتەرگە تۇسۋگە دايىندايتىن ارنايى ورتالىق اشۋ جوسپارلانۋدا. بۇل تاجىريبە 2016 جىلدان باستاپ ەلوردادا جۇزەگە اسىرىلىپ جاتىر.
جاستار ساياساتى جونىندەگى باسقارمانىڭ باسشىسى قۋانىش جانۇزاقوۆ بيىل 117 ءبىتىرۋشىنىڭ 53 تۇلەگى «مبجقي» ۇلتتىق زەرتتەۋ تەحنولوگيالىق ۋنيۆەرسيتەتىن, 41 تۇلەگى ك.ا.تيميريازەۆ اتىنداعى رەسەي مەملەكەتتىك اگرارلىق ۋنيۆەرسيتەتىن, 23 تۇلەگى سانكت-پەتەربۋرگ قالاسىنداعى تەحنولوگيا جانە ەنەرگەتيكا جوعارى مەكتەبىن ءتامامدايتىنىن ايتتى. ولار «نانوتەحنولوگيا جانە ميكروسيستەمالىق تەحنيكا», «مەتاللۋرگيا», «تەحنولوگيالىق ماشينالار مەن جابدىقتار», «ەلەكتر ەنەرگەتيكاسى جانە ەلەكتروتەحنيكا», «اگروينجەنەريا» جانە تاعى باسقا 22 ماماندىق بويىنشا ءبىلىم العان. ولاردىڭ 50-ءى ماگيستراتۋرادا وقۋىن جالعاستىرۋدى جوسپارلاپ وتىرسا, 67 تۇلەك ەلگە ورالماق. وسىعان وراي, «بيىل وڭىردە اگروونەركاسىپ كەشەنى سالاسىندا 76 جوبا ىسكە اسىرىلۋدا. ايماقتا ىسكە قوسىلۋى جوسپارلانعان 4 جوبا بويىنشا 400-دەن اسا ادامدى جۇمىسپەن قامتۋ جوسپارلانعان. جاس ماماندار وسى جوبالار جانە باسقا دا ءىرى كاسىپورىندار مەن مەكەمەلەردە جۇمىسپەن قامتىلۋى ءتيىس», دەدى وبلىس اكىمى.
قىزىلوردا وبلىسى