ارمان شوراەۆتىڭ ايتۋىنشا, وسىمەن توعىزىنشى رەت وتەتىن باسەكەگە ەلىمىزدىڭ 14 وبلىسىنان, نۇر-سۇلتان, الماتى, شىمكەنت قالالارىنان جانە كۇشتىك قۇرىلىمدار اراسىنداعى تۋرنيردە ىرىكتەۋدەن وتكەن 36 ۇزدىك بالۋان قاتىسادى. «قازاقستان بارىسى» تۋرنيرى 8 ماۋسىمدا 13:00-دە بالۋانداردىڭ جەرەبە تارتۋ راسىمىنەن باستالماق. تارتىستى بەلدەسۋلەر جەتى ساعاتقا سوزىلادى دەپ جوسپارلانعان.
«بيىلعى ءتۋرنيردىڭ ءجۇلدە قورىنا 41 ملن تەڭگە ءبولىنىپ وتىر. «قازاقستان بارىسى» اتانعان بالۋانعا التىن بەلبەۋ مەن التىننان قۇيىلعان اۋىسپالى «تايتۇياق» جانە 25 ملن تەڭگە قارجىلاي سىياقى بەرىلەدى. ەكىنشى جانە ءۇشىنشى ورىن يەگەرلەرى سايكەسىنشە كۇمىس جانە قولا بەلبەۋلەرمەن ماراپاتتالادى. سونىمەن قاتار ءار بەلدەسۋدەگى جەڭىسكە جەتكەن بالۋانعا 100 مىڭ تەڭگەدەن بەرىلەدى. جالپى ءجۇلدە قوماقتى بولعانى جاقسى, بىراق «قازاقستان بارىسى» اتاعى ودان دا جوعارى تۇرادى دەپ ويلايمىن. بۇل اتاقتى الۋ بۇگىنگى تاڭدا ءار بالۋاننىڭ ارمانى», دەيدى ول.
بيىلعى تۋرنير جىلداعى ەرەجە بويىنشا ىرىكتەلىپ, سول ءداستۇر بويىنشا وتەدى. ال كەلەسى جىلدان باستاپ ءار وبلىستان تەك ءبىر عانا بالۋان قاتىساتىن بولادى. ونى ۇپاي, رەيتينگ ارقىلى انىقتاماق. «كەي وبلىستاردا قازاق كۇرەسى جاقسى دامىعان. كەيبىر وبلىستاردىڭ دەڭگەيى ونشا ەمەس. بيىل قوستاناي وبلىسىندا «قازاقستان بارىسىنا» بالۋانداردى ىرىكتەۋ تومەن دەڭگەيدە ۇيىمداستىرىلعان. ال قىزىلوردا, تۇركىستان, الماتى, شىعىس قازاقستان وبلىستارىندا «سەن تۇر, مەن اتايىن» دەگەن بالۋاندار كوپ. رەيتينگ بويىنشا ولارعا جارىسقا قاتىسۋعا ءمۇمكىندىك بەرەمىز دەپ ويلايمىن. رەيتينگتە جوعارى ۇپاي جيناۋ ءۇشىن كۇنتىزبەمىزدەگى سايىستارعا قاتىسۋ كەرەك», دەپ ءسوزىن ءتۇيىندەدى ارمان شوراەۆ.
ۇلتتىق وليمپيادا كوميتەتىنىڭ سپورت ديرەكتسياسىنىڭ ديرەكتورى ەلسيار قاناعاتوۆ قازاق كۇرەسىنە ەرەكشە كوڭىل ءبولىپ, «قازاقستان بارىسى» جوباسىن دا قولدايتىندارىن جەتكىزدى. مۇنىڭ دالەلى رەتىندە جۋىردا عانا ۇلتتىق وليمپيادا كوميتەتىنىڭ توراعاسى تيمۋر ق ۇلىباەۆ لوزاننادا حالىقارالىق كۇرەس فەدەراتسياسىنىڭ باسشىسىمەن كەزدەسىپ, حالىقارالىق قازاق كۇرەسى فەدەراتسياسىن مۇشەلىككە ەنگىزۋ ماسەلەسىن قوزعاپ, سول جاقتان قولداۋ تاپقانىن اتاپ ءوتتى.
«قازاقستان بارىسى» ءتۋرنيرى «نۇر-وتان» پارتياسى, «سامۇرىق-قازىنا» ۇلتتىق ءال-اۋقات قورى, مادەنيەت جانە سپورت مينيسترلىگى, نۇر-سۇلتان قالاسى اكىمدىگىنىڭ قولداۋىمەن قازاق كۇرەسى فەدەراتسياسى جانە «قازاقستان بارىسى» قازاق كۇرەسىن دامىتۋ قورى ۇيىمداستىرۋدا.