اقتوبەدە وتكەن «مەرەيلى وتباسى» ۇلتتىق بايقاۋىنا قاتىسۋشىلار سانى جىل سايىن ءوسىپ كەلەدى. ايتالىق, بيىل وعان قاتىسۋعا 500-دەن استام ءوتىنىش تۇسكەن بولسا, ءىس-شارا قورىتىندىسى بويىنشا ىرىكتەلگەن 38 وتباسى وبلىستىق سىننىڭ ماراپاتتاۋ كەزەڭىنە قاتىستى. ءارى ونىڭ التاۋى وبلىستىق بايقاۋدىڭ جۇلدەگەرى اتاندى. سونىڭ ىشىندە ەرلى-زايىپتى سايلاۋبەك پەن بيبىگۇل ابىلداەۆتار وبلىستىق كەزەڭنىڭ جەڭىمپازى اتانىپ, باس جۇلدەگە يە بولدى. ونەگەلى وتباسى يەلەرى جەتى پەرزەنت تاربيەلەپ, ءوسىرىپ كەلەدى. ەرلى-زايىپتىلاردىڭ ءبىر-بىرىنە دەگەن ماحابباتى مەن سۇيىسپەنشىلىگى جانە ءوزارا سىيلاستىعى وتاعاسى سايلاۋبەكتىڭ قاتەرلى دەرتتى جەڭىپ, ودان ايىعۋىنا سەپتىگىن تيگىزگەنى بولەك ءبىر اڭگىمەنىڭ ەنشىسى.
كوپ بالالى وتباسىنا تاتۋ-ءتاتتى تىرلىك جانە بەرەكە مەن بىرلىك كورىنىستەرى ءتان. سونىڭ ءبارىنىڭ ۇيىتقىسى مەن التىن قازىعى اتانعان «التىن القا» يەگەرى بيبىگۇل ابىلداەۆا اقتوبە قالاسىندا وتكەن جىلى پايدالانۋعا بەرىلگەن «اناعا تاعزىم» ورتالىعىندا مەدياتورلىق قىزمەت اتقارادى. ول اجىراسقانداردى قايتا قوسىپ جۇرگەن شاپاعاتى مەن مەيىرىمى, جۇرەگىنىڭ جىلۋى مول جان. سوڭعى 8-9 جىلدىڭ ارالىعىندا بيىك پاراسات يەسى 400-گە تارتا وتباسىنىڭ بۇزىلماي, ساقتالىپ قالۋىنا كومەگىن تيگىزگەن ەكەن.
«مەرەيلى وتباسى» ۇلتتىق بايقاۋىنىڭ وبلىستىق كەزەڭىنىڭ جەڭىمپازى مەن جۇلدەگەرلەرىن ماراپاتتاۋ ءراسىمى كەزىندە اقتوبە وبلىسىنىڭ اكىمى وڭداسىن ورازالين ءوز ءسوزىن زاڭعار جازۋشى, مەملەكەت جانە قوعام قايراتكەرى ءابىش كەكىلباەۆتىڭ «ۇلتىمىزعا نە تىلەيسىز» دەگەن ءتىلشى ساۋالىنا وراي «قازىرگى جاعدايدا ۇلتىمىزدىڭ ءۇش ۇرپاعىنىڭ وكىلىنىڭ باسى ءبىر داستارقاندا توعىسۋىن قالايمىن» دەگەن عيبراتتى تىلەگىمەن تۇيىندەدى. اقتوبە