ايدوس سارىم: پىكىرتالاستاردىڭ كوپ بولعانى ءجون

پرەزيدەنتتىكتەن ءۇمىت­كەر­لەردىڭ تەلەدەباتىندا مەنى قۋانتقان بىرنەشە ەرەكشەلىك بار. سونىڭ ءبىرىنشىسى – تەلە­دەباتتىڭ باسىم كوپشىلىگى مەملەكەتتىك تىلدە ءوتتى. بۇل قازاق سايلاۋشىلارىنىڭ بەل­سەندىلىگىنىڭ ارتقانىن جانە قازاق ءتىلىنىڭ ءرولى جوعارىلاپ كەلە جاتقانىن كورسەتەدى. 

دەباتقا قاتىسقان كان­ديدات­­­تاردىڭ ىشىندە كوزگە تۇسكەن 3-4 ادامدى ەرەكشە اتاپ وتۋگە بولادى. ماعان, اسىرەسە, ءالي بەكتاەۆتىڭ سوزدەرى نانىمدى بولىپ كورىندى. ول كوپ تاقىرىپقا بارعان جوق. ءوزىنىڭ ۇستانىمىندا تۇراق­تى بولىپ قالدى. تەك قانا اۋىل شارۋاشىلىعىنا قا­تىستى ماسەلەلەردى كوتە­رىپ, قارسىلاستارىنىڭ سۇراقتارىنا بەلسەندى جاۋاپ بەرە الدى. سونداي-اق ماۋلەن اشىمباەۆتىڭ سويلەۋ شەبەرلىگى ۇنادى. ونىڭ بۇل دەباتقا ابدەن دايىندالعانى كورىنىپ تۇردى. 

ءامىرجان قوسانوۆ ءوزىنىڭ مۇمكىندىگىن بارىنشا پايدا­لانۋعا تىرىستى. الايدا, ونىڭ سوزدەرى مەن كۇتكەندەي جالىندى ءارى بەلسەندى بولمادى. شىنىن ايتۋ كەرەك, وسى دودادا كوڭىلدەن شىقپايتىن تۇستار كەزدەستى. كوممۋنيستەر مەن كاسىپوداقتاردىڭ اتىنان تۇسكەن ەكى كانديداتتىڭ سوزدەرىندە بىرىزدىلىك باي­قالمادى. ارينە, شەكتەۋلى ۋاقىت ىشىندە ۇلكەن تاقى­رىپتى الىپ شىعۋ قيىن ەكەنى بەلگىلى. سوندىقتان مۇنداي دەباتتاردىڭ بارىنشا كوپ بولعانى دۇرىس. مۇنى قوعامنىڭ ساياسي مادەنيەتىن جاڭا ۇردىستەرگە باستايتىن جاقسى دۇنيە دەپ ەسەپتەيمىن. 

ايدوس سارىم,

ساياساتتانۋشى