قىزىلوردا وبلىسى اكىمدىگىندە وڭىردەگى جاپپاي كاسىپكەرلىكتى دامىتۋ قورىتىندىسى بويىنشا ءماجىلىس ءوتتى. قىزىلوردا قالاسى مەن اۋدان اكىمدەرى اتقارىلعان جۇمىستار تۋرالى باياندادى.
ماسەلەن, قارماقشى اۋدانىندا "بيزنەستىڭ جول كارتاسى-2020" باعدارلاماسى اياسىندا 12 جوبانى ىسكە اسىرۋ ءۇشىن نەسيە بەرىلىپ, تاعى 6 جوبا ەكىنشى دەڭگەيلى بانكتەردىڭ قاراۋىندا, ال 5 جوبا سۇيەمەلدەۋگە الىنعان. ال شيەلى اۋدانىندا "قاراپايىم زاتتار ەكونوميكاسى" باعدارلاماسىن جۇزەگە اسىرۋ اياسىندا 26 جوبا ۇسىنىلىپ وتىر. سونىمەن قاتار, اعىمداعى جىلى يننوۆاتسيالىق بيزنەس-يدەيالاردى ىسكە اسىرۋعا 200 جاس كاسىپكەر, 200 كوپبالالى وتباسى جانە 100 جۇمىسسىزعا مەملەكەتتىك گرانتتار ءبولۋ جوسپارلانۋدا.
جيىندا وبلىس اكىمى ق.كوشەرباەۆ ء"بىزدىڭ باستى ماقساتىمىز – جالپى وڭىرلىك ونىمدەگى شاعىن جانە ورتا بيزنەستىڭ ۇلەسىن 14,4 پايىزدان 2020 جىلعا قاراي 20 پايىزعا دەيىن ۇلعايتۋ بولىپ تابىلادى»,-دەدى. سول ءۇشىن شاعىن جانە ورتا بيزنەس سالاسىنا ينۆەستيتسيا تارتىپ, جاڭا كاسىپورىندار اشىپ, ەكسپورتتىڭ ۇلەسىن ارتتىرۋ قاجەتتىگىن اتاپ ءوتتى.
«وتكەن جىلدىڭ سايكەس كەزەڭىمەن سالىستىرعاندا شاعىن جانە ورتا بيزنەستىڭ ۇلەسى 14,4 پايىزدى قۇرادى. جىل باسىنان بەرى شاعىن جانە ورتا بيزنەس سۋبەكتىلەرىنىڭ سانى 1741 بىرلىككە ارتتى. بۇل رەتتە 93 مىڭنان استام وبلىس تۇرعىنى نەمەسە ءوڭىردىڭ ەكونوميكالىق بەلسەندى جۇمىسپەن قامتىلعان حالقىنىڭ ۇشتەن ءبىرى وسى سالادا جۇمىسقا ورنالاستىرىلدى.
جىل قورىتىندىسى بويىنشا شاعىن جانە ورتا بيزنەستە جۇمىسقا ورنالاسقانداردىڭ سانى 95 000 ادامعا دەيىن جەتۋى ءتيىس», - دەدى ايماق باسشىسى.
قىزىلوردا وبلىسى