تەحنيكالىق جانە كاسىپتىك ءبىلىم جۇيەسىن دامىتۋ پەرسپەكتيۆالارى تۋرالى بايانداي وتىرىپ, ءبىلىم جانە عىلىم ءمينيسترى ك. ءشامشيدينوۆا «بارشاعا ارنالعان تەگىن تجكب» جوباسى شەڭبەرىندە 199 مىڭ ادام وقيتىنىن جەتكىزدى. سوڭعى 3 جىلدا 3,7 ملرد تەڭگەگە قۇرال-جابدىقتار ساتىپ الىندى. مەملەكەتتىك كوللەدجدەردىڭ 71%-ى تەحنيكالىق بەيىندەگى مامانداردى دايارلاۋدى جۇزەگە اسىرادى. قازاقستاندا 821 كوللەدج جۇمىس ىستەيدى. مەملەكەتتىك كوللەدجدەردىڭ 71% تەحنيكالىق بەيىندەگى مامانداردى, ال جەكە كوللەدجدەردىڭ 67%-ى گۋمانيتارلىق-ەكونوميكالىق بەيىندەگى مامانداردى دايارلايدى.
سونىمەن قاتار, ەڭبەك نارىعىن بىلىكتىلىگى جوعارى كادرلارمەن قامتاماسىز ەتۋ بويىنشا ءتيىمدى ناتيجەلەرگە قول جەتكىزۋ ءۇشىن كوللەدجدەردى سەنىمدى باسقارۋعا بەرۋدى جۇزەگە اسىرۋ كوزدەلگەن. قازىردىڭ وزىندە ەكونوميكانىڭ ءتۇرلى سەكتورلارىنداعى 150 وندىرىستىك كوشباسشى بۇل پروتسەسكە قاتىسۋعا ىنتا ءبىلدىردى.
«جۇمىس بەرۋشىلەردى كادرلار دايارلاۋ پروتسەسىنە تارتۋ ءۇشىن بيزنەس ءۇشىن نەسيە جانە سالىق ماسەلەلەرىن جەڭىلدەتۋ ارقىلى جاعدايلار تۋدىرۋ قاجەت, سونىمەن قاتار مامانداردى ەڭبەك نارىعىنىڭ شىنايى قاجەتتىلىكتەرىنە ساي دايارلاۋ كەرەك», - دەدى ك. ءشامشيدينوۆا.
ەڭبەك جانە حالىقتى الەۋمەتتىك قورعاۋ ءمينيسترى ب. ساپارباەۆ قازىرگى كاسىپتىك ستاندارتتاردىڭ ازىرلەنۋى تۋرالى باياندادى. ونىڭ ايتۋىنشا, 2025 جىلعا قاراي ەڭبەك نارىعىندا ايرىقشا وزگەرىستەر بولادى, ونىڭ ىشىندە بىلىكتىلىك تالاپتارى ارتادى.
«الدىن-الا بولجام بويىنشا كادرلارعا قوسىمشا قاجەتتىلىك 573 مىڭنان استام ادامدى قۇرايدى, ورتا جانە جوعارى بىلىكتى جۇمىس ورىندارى سانىنىڭ ارتۋى كۇتىلەدى», - دەدى ب. ساپارباەۆ. 2019 جىلدىڭ سوڭىنا دەيىن ەڭبەك نارىعىندا كادرلارعا قاجەتتىلىك بولجامىن شەشۋ ءۇشىن ەڭبەك رەسۋرستارىن ۇلتتىق بولجامداۋ جۇيەسى قۇرىلاتىن بولادى, وندا ەكونوميكا ءۇشىن قاجەت كادرلارعا سۇرانىس قالىپتاستىرىلادى.
ەڭبەك رەسۋرستارىنىڭ بىلىكتىلىگىنىڭ ەڭبەك نارىعىنداعى قاجەتتىلىكتەرگە سايكەستىگىن قامتاماسىز ەتەتىن ۇلتتىق بىلىكتىلىك جۇيەسىن دامىتۋ اياسىندا 106 كاسىپتىك ستاندارت ازىرلەندى, ولاردا جۇمىس بەرۋشىلەردىڭ جۇمىسكەرلەردىڭ بىلىمىنە, داعدىلارى مەن قۇزىرەتىنە قوياتىن تالاپتارى كورسەتىلگەن. اعىمداعى جىلى 12 باسىم سالا بويىنشا 480 كاسىپتىك ستاندارت پەن 38 سالالىق شەڭبەردى ازىرلەۋ جانە بەكىتۋ جوسپارلانىپ وتىر.
بۇدان وزگە, بىلىكتىلىك جۇيەسىن ودان ءارى دامىتۋ ءۇشىن مينيسترلىك حالىقارالىق ساراپشىلاردى تارتا وتىرىپ, ۇلتتىق بىلىكتىلىك جۇيەسىن دامىتۋ جونىندەگى 2025 جىلعا دەيىنگى جول كارتاسىن ازىرلەۋدە, ول ەكىنشى جارتىجىلدىقتا قابىلدانادى.
ءوز كەزەگىندە, «اتامەكەن» ۇكپ باسقارما توراعاسى و. ورداباەۆ تجكب دامىتۋ اياسىندا ەڭبەككە ورنالاستىرۋ پروتسەسىن جەتىلدىرۋ بويىنشا ۇسىنىلاتىن تاسىلدەر تۋرالى ايتىپ بەردى. باعدارلامانىڭ ىسكە اسىرىلۋى جانە بۇدان كەيىنگى جوسپارلار تۋرالى اتىراۋ وبلىسىنىڭ اكىمى ن. نوعاەۆ, سولتۇستىك قازاقستان وبلىسىنىڭ اكىمى - ق. اكساقالوۆ باياندادى.
وتىرىستا سونىمەن قاتار بيزنەس جانە جوعارعى وقۋ ورىندارىنىڭ وكىلدەرى - «اگرودامۋ» جشس باسشىسى ر. بۋكەەۆ, ا. بايتۇرسىنوۆ اتىنداعى قوستاناي مەملەكەتتىك ۋنيۆەرسيتەتىنىڭ رەكتورى ا. دوششانوۆا باياندادى.
پرەمەر-ءمينيستردىڭ ورىنباسارى گ. ابدىقالىقوۆا تەحنيكالىق جانە كاسىپتىك ءبىلىمدى دامىتۋ ءۇشىن بىرنەشە باعىتتى قولدانۋ قاجەتتىگىن اتاپ ءوتتى, ونىڭ ىشىندە دۋالدى وقىتۋدى دامىتۋ جانە كوللەدجدەردى باسقارۋ جۇيەسىن جەتىلدىرۋ بار. قازىرگى تالاپتارعا سايكەس كوللەدجدەردىڭ ماتەريالدىق-تەحنيكالىق بازاسىن جاقسارتۋ قاجەت. سونىمەن قاتار, تجكب دامىتۋعا بيزنەستى تارتۋ ماسەلەسىن پىسىقتاۋ كەرەك.