ءوزىنىڭ ادال ەڭبەگىمەن, اقىل-پاراساتىمەن اتى اڭىزعا اينالعان كامشات بايعازىقىزىنىڭ ومىردەن وتكەنىنە دە ەكى جىلعا جۋىقتادى. قوستانايداعى جاڭادان ورىن تەپكەن «يۋبيلەينىي» شاعىن تۇرعىن اۋدانىنداعى ءبىر كوشە كامشات اپانىڭ اتىنا بەرىلگەن بولاتىن. ورتالىقتاعى اباي داڭعىلىنىڭ بويىنداعى توعىز قاباتتى ءۇيدىڭ قابىرعاسىنا كامشات اپانىڭ سۋرەتى سالىندى. ەندى مىنە, جاقىندا عانا پايدالانۋعا بەرىلگەن جاستار سارايىنىڭ الدىنا قازاقتىڭ دارا قىزىنىڭ ەسكەرتكىشى ورناتىلدى. ونىڭ اشىلۋ سالتاناتىندا وبلىس اكىمى ارحيمەد مۇحامبەتوۆ كامشات اپا ەسكەتكىشىنىڭ جاستار كوپ كەلەتىن ورىندا تۇرۋى زاڭدىلىق, ونىڭ ءومىرى مەن قىزمەتى جاس ۇرپاققا ۇلگى ەكەنىن ايتتى.
«قازاق قىزىنىڭ ەسىمى تۇتاس ءبىر ءداۋىردىڭ اڭىزىنا اينالدى. كامشات اپامىز قازاق قىزدارىنىڭ اراسىنان شىققان, تەحنيكا تىزگىندەگەن العاشقى مەحانيزاتور ەدى. ول سوتسياليستىك ەڭبەك ەرى اتاعىنا يە بولدى. جولداسى تەمىربەك قابدولۇى ەكەۋى ءتورت بالا تاربيەلەپ ءوسىردى. مەحانيزاتور بولا ءجۇرىپ, وشاعىنىڭ وتىن وشىرمەدى, بالالارى ۇلگىلى ازامات بولىپ ءوستى. كامشات اپا جاسى كەلە يماندىلىق جولىمەن قاجىعا بارىپ, بەس پارىزىنىڭ ءبىرىن وتەدى. باسىنان اق جاۋلىعىن تاستاماعان اپامىزدىڭ ءار ءىسى ەلگە ۇلگى ەدى. جاقىندا پرەزيدەنت قاسىم-جومارت توقاەۆ كەلگەندە كامشات اپاعا ەسكەرتكىش-ءمۇسىن قوياتىنىمىزدى ايتقانمىن. سوندا پرەزيدەنت «ول كىسى داڭقتى ادام, ول تەك قوستانايدىڭ عانا ەمەس, ەلىمىزدىڭ, حالقىمىمىزدىڭ ماقتانىشى, وتە دۇرىس ءىس ەكەن» دەدى. مىنە, جاستار سارايىنىڭ جانىنداعى ەسكەرتكىش-مۇسىنگە بولاشاقتا جاستار كەلىپ گۇل قويادى, اپامىزدىڭ ءومىرى مەن قىزمەتى تۋرالى ءبىلىپ, وزدەرىنە ۇلگى ەتەتىن بولادى» دەدى ارحيمەد بەگەجان ۇلى. سونىمەن قاتار ەسكەرتكىش-ءمۇسىننىڭ اشىلۋ سالتاناتىندا وبلىستىق ارداگەرلەر كەڭەسىنىڭ توراعاسى كەنجەبەك ۇكين, قازاقستاننىڭ ەڭبەك ەرى سايران بۇقانوۆ ءسوز سويلەپ, كامشات دونەنباەۆانىڭ جارقىن بەينەسىن ەسكە الدى. ونىڭ اتىنىڭ ماڭگى ەستە قالدىرۋ جۇمىستارىنىڭ جالعاسا بەرۋى جاس ۇرپاق ءۇشىن كەرەكتىگىن دە ەسكە سالدى. كامشاتتىڭ ۇلى سىرىم ءسوز الىپ, اناسىنا بايلانىستى اتقارىلعان يگى ىستەر ءۇشىن وبلىس باسشىلىعىنا, ارداگەرلەر كەڭەسىنە العىسىن ايتتى.