«رۋحاني جاڭعىرۋ» باعدارلاماسى اياسىندا العاش رەت تاۋەلسىز قازاقستان تاريحىندا جوعارى ۇلتتىق جانە حالىقارالىق قىزىعۋشىلىق نىسانى بولاتىن «قازاقستاننىڭ كيەلى جەرلەرىنىڭ گەوگرافياسى» جوباسى اياسىندا اۋقىمدى شارالار جۇزەگە اسىرىلۋدا. بۇل جوبانى ءتيىمدى جۇزەگە اسىرۋ ماقساتىندا ارنايى جۇمىس توبى مەن جوبالاۋ كەڭەسى جانە قازاقستان رەسپۋبليكاسى ۇلتتىق مۋزەيى جانىنان «قاسيەتتى قازاقستان» ولكەتانۋدى دامىتۋ ورتالىعى جۇمىس اتقارۋدا. ورتالىق جانىنان قۇرىلعان عىلىمي-ساراپتامالىق كەڭەس ەلىمىزدەگى قاسيەتتى تاريحي-مادەني ورىنداردى انىقتاپ, ولاردىڭ ۇلتتىق-يدەولوگيالىق دەڭگەيىن ناقتىلاۋدا» دەيدى قازاقستان رەسپۋبليكاسى مادەنيەت جانە سپورت ءمينيسترى ارىستانبەك مۇحامەدي ۇلى وسى ەڭبەكتىڭ كىرىسپە سوزىندە.
ايتا كەتەيىك, «قاسيەتتى قازاقستان» كوپتومدىعىنىڭ العاشقى جيناعى 2018 جىلى جارىق كوردى. وندا الماتى جانە اقمولا وبلىستارى, الماتى مەن نۇر-سۇلتان قالالارىنداعى كيەلى نىساندار شوعىرلانعان بولاتىن. وسىلايشا قازاقستاننىڭ بارلىق ءوڭىرى قامتىلىپ, بۇل جيناق كەزەك-كەزەگىمەن باسپادان شىعادى. جيناق ەكى تىلدە – قازاق جانە ورىس تىلدەرىندە دايىندالعان.
كىتاپتا قازاقستاننىڭ باتىس اۋماعىنداعى قاسيەتتى ورىندار مەن كەشەندەر, كيەلى جەرلەر مەن تابيعي لاندشافت ەسكەرتكىشتەرى, ەل تۇتقاسى بولعان تاريحي تۇلعالارى ەنگىزىلگەن. جيناقتا باتىس قازاقستان وبلىسىنان 137 نىسان بار. جيناقتى قۇراستىرۋدا نەگىزىنەن جەرگىلىكتى ولكەتانۋشىلاردىڭ ۇسىنىسى مەن شىعارمالارى پايدالانىلعان. بەرىك ابدىعالي ۇلىنىڭ ايتۋىنشا, بۇل ءتىزىم بولاشاقتا تولىقتىرىلا بەرمەك. وسىلايشا ءار وبلىستىڭ جەكە ەنتسيكلوپەدياسى دا پايدا بولۋى مۇمكىن.
ءدال وسى كۇنى مۋزەي سالاسىنىڭ ارداگەرى سارا تاناباەۆا مەن 1941-1945 جىلدارداعى ۇلى وتان سوعىسىنداعى قازاقتار تاريحىن جۇيەلى زەرتتەپ جۇرگەن احمەديار باتىرحانوۆ «ۇزدىك ولكەتانۋشى» توسبەلگىسىمەن ماراپاتتالدى.