بۇل – ازىرگە رەسمي دەرەك. كۋاگەرلەردىڭ ايتۋلارىنا قاراعاندا كەلگەن زارداپ بۇدان دا اۋقىمدى بولۋى مۇمكىن. ويتكەنى, ەكىلەنە سوققان جەلدىڭ جىلدامدىعى سەكۋندىنا 25-28 مەترگە دەيىن جەتىپ, ىستىق جالىن كوپكە دەيىن ءورت وندىرۋشىلەردىڭ ىرقىنا «كونە» قويماعان. «ءتىلسىز جاۋمەن» 3,5 ساعات بويى ارپالىسىپ ءجۇرىپ, ارەڭ دەگەندە ەڭسەرگەن.
سقو تجد باستىعىنىڭ ورىنباسارى نۇرلان اتىعاەۆتىڭ ايتۋىنشا, قۋراعان شوپتەن باستالعان ءورتتى داۋىل ءورشىتىپ, 48 قىزمەتكەر جانە 11 تەحنيكانى جۇمىلدىرۋعا تۋرا كەلگەن. بۇعان قوسا وڭتۇستىك ۋرال تەمىرجولى پەتروپاۆل بولىمشەسى, «قىزىلجار سۋ», «ءورت ءسوندىرۋ» مەكەمەلەرىنەن قوسىمشا كۇشتەر تارتىلعان. كوشەلەردىڭ تارلىعى كەدەرگى كەلتىرگەن. سوعان قاراماستان ءجىتى قيمىلدىڭ ارقاسىندا ءورتتىڭ ودان ءارى ورشۋىنە جول بەرىلمەگەن.
مامانداردىڭ ەسەبىنشە, الاپات ءورت تۇرعىنداردىڭ قاراپايىم قاۋىپسىزدىك ەرەجەرىن ساقتاماۋدان تۇتانىپ, 1,5 مىڭ شارشى مەتر اۋماقتى شارپىعان.
سولتۇستىك قازاقستان وبلىسى