ءىس-شاراعا ۇلى وتان سوعىسى مەن قازاقستان قارۋلى كۇشتەرىنىڭ ارداگەرلەرى, الماتى گارنيزونىنىڭ قولباسشىلىعى مەن جەكە قۇرامى, الماتى قالاسى اكىمىنىڭ ورىنباسارى, قازاقستان رەسپۋبليكاسى پارلامەنتىنىڭ دەپۋتاتتارى, اتى اڭىزعا اينالعان ارميا گەنەرالىنىڭ تۋىسقاندارى مەن قىزمەتتەستەرى, اسكەري جوو-لاردىڭ كۋرسانتتارى, اسكەري-پاتريوتتىق كلۋبتاردىڭ تاربيەلەنۋشىلەرى, اسكەري كافەدرالاردىڭ ستۋدەنتتەرى, سونداي-اق شاقىرىلعان قوناقتار قاتىستى.
بيىل 25 مامىردا كەڭەس وداعىنىڭ باتىرى, حالىق قاھارمانى, تاۋەلسىز قازاقستاننىڭ تۇڭعىش قورعانىس ءمينيسترى ارميا گەنەرالى ساعادات نۇرماعامبەتوۆ ءتىرى بولسا, 95 جاسقا تولار ەدى.
ساعادات نۇرماعامبەتوۆ - ءوزىن تۇتاستاي وتانعا قىزمەت ەتۋگە ارناعان ادام. تۇڭعىش پرەزيدەنت نۇرسۇلتان نازارباەۆتىڭ جەتەكشىلىك ەتۋىمەن ول قازىرگى زامانعى قازاقستان قارۋلى كۇشتەرىنىڭ ىرگەتاسىن قالادى. ەل ءۇشىن قيىن-قىستاۋ كەزەڭدە ارميانى باسقارىپ, ونىڭ قالىپتاسۋى مەن دامۋىنا ولشەۋسىز ۇلەس قوستى. ونىڭ جوعارى بەدەلى اسكەري الەۋەتتى ساقتاۋ مەن جەكە قۇرام اراسىنداعى اسكەري ءتارتىپتى نىعايتۋعا سەپتىگىن تيگىزدى.
«ساعادات قوجاحمەت ۇلى - مەملەكەت تاريحىندا «حالىق قاھارمانى» اتاعىنا يە بولعان العاشقى ادام. تاۋەلسىز قازاقستاننىڭ قارۋلى كۇشتەرى تاريحىندا وعان ءبىرىنشى بولىپ «ارميا گەنەرالى» جوعارى اسكەري اتاعى بەرىلدى. بىزبەن ارميا گەنەرالى نۇرماعامبەتوۆتى ماڭگى ەستە ساقتاۋ بويىنشا جۇمىس جۇرگىزىلۋدە. ەلىمىزدىڭ كوپتەگەن قالالارىنداعى كوشە اتاۋلارىنا ونىڭ ەسىمى بەرىلگەن. نۇر-سۇلتان, تاراز, گۆاردەيسك قالالارىندا, سونداي-اق ونىڭ كىندىك قانى تامعان اقكولدە وعان ارنالعان مەموريالدار تۇرعىزىلدى. بۇل مەموريال بولاشاق وفيتسەرلەردىڭ اسكەري ىستە تىڭ جەتىستىكتەرگە جەتۋدە جىگەرلەندىرەدى. اتى اڭىزعا اينالعان تۇلعا, ارميا گەنەرالى ساعادات قوجاحمەت ۇلى نۇرماعامبەتوۆ - بارلىق قازاقستاندىق جاۋىنگەرلەر ءۇشىن ۇنەمى ۇلگى-ونەگە», - دەدى اسكەري ۆەدومستۆو باسشىسى.
ءوز كەزەگىندە, ساعادات قوجاحمەت ۇلىنىڭ نەمەرەسى ساۋىق پەن قىزمەتتەسى ۇوس-قا قاتىسۋشى, الماتى وبلىسىنىڭ قۇرمەتتى ازاماتى, قازاقستان حالقى اسسامبەلياسىنىڭ مۇشەسى, اسكەري جازۋشى, وتستاۆكاداعى پولكوۆنيك لەونيد گيرش جۇرەكجاردى ىستىق لەبىزىن ءبىلدىردى.