سپيكەرلەردىڭ العاشقىسى بولىپ ءسوز العان اقپارات جانە قوعامدىق دامۋ مينيسترلىگى جاستار جانە وتباسى جونىندەگى كوميتەتىنىڭ توراعاسى دانيار قوجاحمەت جاستار جىلى اياسىنداعى اتقارىلىپ جاتقان جۇمىستارعا, سونداي-اق اتالعان ۆەدومستۆونىڭ جاستار ساياساتى باعىتىنداعى ماڭىزدى ءمىندەتتەرىنە توقتالدى. ونىڭ ايتۋىنشا, جاستار جىلى اياسىندا ۇيىمداستىرىلاتىن شارالارعا ەلىمىزدەگى جاستاردىڭ 70 پايىزى قامتىلادى. «قالعان 30 پايىزى مەكتەپتىڭ وقۋشىلارى نەمەسە ستۋدەنتتەر بولۋى مۇمكىن. ولار وسى جىلى بەكىتىلگەن جۇمىستاردىڭ جەمىسىن الداعى ۋاقىتتا كورەدى. سونداي-اق جاستاردىڭ ءوز كاسىبىن اشىپ, كونسۋلتاتسيالىق كەڭەس الۋىنا, بيزنەستەگى ساۋاتىن ارتتىرۋعا باعىتتالعان باعدارلامالاردى ىسكە اسىرۋ باستالدى. بۇدان بولەك, اتاۋلى جىل اياسىندا جاس عالىمدارعا كوبىرەك كوڭىل ءبولۋدى قولعا الىپ وتىرمىز. سونىڭ ءبىر دالەلى – جاس عالىمداردىڭ جوبا جۇمىستارىنا 3 ميلليارد تەڭگەنىڭ ءبولىنۋى», دەدى م.قوجاحمەت.
ال تۇڭعىش پرەزيدەنت قورىنىڭ جەتەكشى ساراپشىسى جاقسىلىق ءسابيتوۆ ءوز كەزەگىندە جاستار ءۇشىن عىلىمدا كارەرا جاساۋدىڭ مۇمكىندىكتەرى تۋرالى باياندادى. ول عالىمدارعا دەگەن قوعامنىڭ كوزقاراسى بۇرىنعىدان الدەقايدا وزگەرگەنىن, وعان زاماناۋي تالاپتاردىڭ اسەر ەتكەنىن ايتا كەلە: «عالىمدارعا وسىعان دەيىن قايىرشى سەكىلدى قاراپ كەلدى. راس, ويتكەنى كەيبىر تاريحي وزگەرىستەر ىقپال ەتتى. ال قازىر – عالىمداردىڭ زامانى. سوندىقتان عىلىم جولىنا ءتۇسۋ – تابىس تابۋعا, ەلگە قىزمەت ەتۋگە, قوعامدى العا جىلجىتۋعا جانە جەتىستىككە جەتۋگە جاقسى مۇمكىندىك», دەدى. ونىڭ ويىنشا, لايىقتى ناتيجە كورسەتۋ ءۇشىن جاستار ءوزى وقيتىن جوعارى وقۋ ورنىن الدىن الا مۇقيات زەرتتەپ, سارالاپ, ەڭ ۇزدىگىن تاڭداۋ كەرەك.
بيلىك, قوعام, بيزنەس جانە جەكە تۇلعالار اراسىن بايلانىستىراتىن كوپىر بولۋدى كوزدەيتىن «Serpin» ءبىلىم جانە يننوۆاتسيا ۇلتتىق پالاتاسى سوڭعى ۋاقىتتا ۋنيۆەرسيتەت ستۋدەنتتەرىمەن عانا ەمەس, مەكتەپ وقۋشىلارى جانە مەكتەپكە دەيىنگى بالالارمەن جۇمىس ىستەي باستاعان. اتالعان پالاتا ديرەكتورى اكiم حازiرەتالى قولعا العان ىستەرىنىڭ ەلەۋلىسى رەتىندە «Samsung» كومپانياسىمەن بىرلەسىپ, باعدارلامالاۋ بويىنشا ءتۇرلى وليمپيادالار ۇيىمداستىرىلىپ جاتقانىن جەتكىزدى. «جاقىندا «توعىزقۇمالاق» فەدەراتسياسىمەن كەلىسىمگە وتىردىق. سول ارقىلى ۇلتتىق ويىندارعا دەگەن بالالار مەن جاستاردىڭ قىزىعۋشىلىعىن ارتتىرۋدى ماقسات ەتەمىز. توعىزقۇمالاقتىڭ پايداسىن زەرتتەۋدە ونىڭ شاحماتقا قاراعاندا جۇرىستەرىنىڭ ارتىقشىلىقتارى, اقىل-ويدى دامىتۋعا اسەر ەتەتىن ەرەكشەلىكتەرى بارىن اڭعاردىق», دەدى ءا.حازىرەتالى. ونىڭ ايتۋىنشا, پالاتا ۋنيۆەرسيتەتكە تۇسەتىن ۇمىتكەرلەرگە ارنالعان ءمۇمكىندىكتەردى جالعاستىراتىن «Serpininfo» پلاتفورماسىن ءازىرلەۋ ۇستىندە. وندا تالاپكەرلەر جيناعان بالى بويىنشا قايدا تۇسۋگە بولاتىنىن بىلە الادى. سونداي-اق ءا.حازىرەتالى وتاندىق قانا ەمەس, 10-عا جۋىق شەتەلدىك جوو-لارمەن ءتۇرلى مەموراندۋمدارعا وتىرعانىن تىلگە تيەك ەتتى.
سپيكەرلەر مەن قاتىسۋشىلار شارا سوڭىنا قاراي پىكىر تالاستىرىپ, وزەكتى ماسەلەلەردى ورتاعا سالدى. سونىڭ ناتيجەسىندە ساراپتاما الاڭىنىڭ كەزەكتى سانىندا تالقىلاناتىن ماڭىزدى تاقىرىپتى بەلگىلەدى.