جاقىندا وبلىس اكىمىنىڭ, مەملەكەتتىك ورگان باسشىلارىنىڭ, ءوڭىردىڭ ونەركاسىپ كاسىپورىندارى مەن ۇيىمدارى وكىلدەرىنىڭ قاتىسۋىمەن وتكەن ماجىلىستە جاس مامانداردى جۇمىسقا ورنالاستىرۋ ماسەلەسى تالقىلاندى.
ءماجىلىستى اشقان وبلىس اكىمى ق.كوشەرباەۆ: «وزدەرىڭىز بىلەسىزدەر, ءبىز 2014 جىلدان باستاپ مەكتەپ تۇلەكتەرىن ماقساتتى تۇردە ۇزدىك وتاندىق جانە رەسەيلىك جوعارى وقۋ ورىندارى مەن كوللەدجدەرگە جىبەرىپ كەلەمىز. بىلتىر العاشقى 74 جاس مامان ديپلومدارىن الىپ, ەلگە ورالدى, قىزمەتتەرىن باستادى. بيىل تاعى 177 جاس مامان وقۋىن بىتىرەدى. قاجەتتى ماماندىقتاردى, اتاپ ايتقاندا مەتاللۋرگ, تەحنولوگ, حيميك, ەنەرگەتيك, جەر قاتىناستارى جانە تاعى باسقا ماماندىقتاردى يگەرگەن بۇل ينجەنەر ماماندار الداعى ۋاقىتتا ەلىمىزدىڭ, ءوڭىردىڭ ودان ءارى ءوسىپ-وركەندەۋىنە ءوز ۇلەستەرىن قوساتىن بولادى. سوندىقتان, جىل سايىن ءبىتىرۋشى جاس مامانداردىڭ جۇمىسپەن قامتىلۋى بارشامىزعا اسا ماڭىزدى ءارى جاۋاپتى ءىس», دەدى.
جاستار ساياساتى جونىندەگى باسقارما باسشىسى قۋانىش جانۇزاقوۆ بيىل 117 ستۋدەنتتىڭ 53 تۇلەگى «مبجقي» ۇلتتىق زەرتتەۋ تەحنولوگيالىق ۋنيۆەرسيتەتىن, 41 تۇلەگى ك.ا.تيميريازەۆ اتىنداعى رەسەي مەملەكەتتىك اگرارلىق ۋنيۆەرسيتەتىن, 23 تۇلەگى سانكت-پەتەربۋرگ قالاسىنداعى تەحنولوگيا جانە ەنەرگەتيكا جوعارى مەكتەبىن بىتىرەتىندىگى تۋرالى ايتتى. ولار «نانوتەحنولوگيا جانە ميكروسيستەمالىق تەحنيكا», «مەتاللۋرگيا», «تەحنولوگيالىق ماشينالار مەن جابدىقتار», «ەلەكتر ەنەرگەتيكاسى جانە ەلەكتروتەحنيكا», «اگروينجەنەريا» جانە تاعى باسقا 22 ماماندىق بويىنشا ءبىلىم العان. ولاردىڭ 50 ماگيستراتۋرادا وقۋىن جالعاستىرۋدى جوسپارلاپ وتىرسا, 67 تۇلەك ەلگە ورالماق. وسىعان وراي, «بيىل وڭىردە اگروونەركاسىپ كەشەنى سالاسىندا 76 جوبا ىسكە اسىرىلۋدا. ايماقتا ىسكە قوسىلۋى جوسپارلانعان 4 جوبا بويىنشا 400-دەن اسا ادامدى جۇمىسپەن قامتۋ جوسپارلانعان. جاس ماماندار وسى جوبالار جانە باسقا دا ءىرى كاسىپورىندار مەن مەكەمەلەرگە جۇمىسپەن قامتىلۋى ءتيىس», دەدى وبلىس اكىمى.
ءماجىلىس قورىتىندىسى بويىنشا وبلىس اكىمى ءوزىنىڭ ورىنباسارلارىنا ءاربىر تۇلەكتىڭ جۇمىسقا ورنالاسۋىنا جەكە جاۋاپتى ەكەندىگىن ەسكەرتتى.
قىزىلوردا وبلىسى