اقتوبە وبلىسىندا قۇقىق بۇزۋشىلىق دەڭگەيى تومەندەگەن

جيىنعا رف-نىڭ  ەكاتەرينبۋرگ, ورىنبور قالالارىنان ماكسيم چەرەپانوۆ, ۆيتالي پوپوۆ, ەلەنا ميششەنكو سىندى ت.ب. قۇقىق سالاسىنىڭ پروفەسسورلارى مەن  زاڭ عىلىمدارىنىڭ دوكتورى, وقىتۋشىلار ارنايى كەلگەن.

سونىمەن قاتار, اۋقىمدى باسقوسۋعا نۇر-سۇلتان قالاسىنان  قر پارلامەنتى سەناتىنىڭ دەپۋتاتتارى, كونستيتۋتسيالىق قۇقىق, سوت جۇيەسى جانە قۇقىق قورعاۋ ورگاندارى كوميتەتىنىڭ مۇشەسى مارات تاعيموۆ, اگرارلىق ماسەلەلەر, قورشاعان ورتانى قورعاۋ جانە اۋىلدىق اۋماقتاردى دامىتۋ كوميتەتىنىڭ مۇشەسى مۇحتار جۇماعازيەۆ, قر پارلامەنتى ءماجىلىسىنىڭ زاڭناما جانە سوت-قۇقىقتىق رەفورما جونىندەگى كوميتەتىنىڭ توراعاسى نۇرلان ءابدىروۆ, قر ءىىم اكىمشىلىك پوليتسيا كوميتەتىنىڭ توراعاسى ماقسات بايبولوۆ سىندى جانە جەرگىلىكتى  اقتوبە وبلىستىق پوليتسيا دەپاراتمەنتىنىڭ باستىعى اتىعاي ارىستانوۆ, وبلىس پروكۋرورى  مارات قايبجانوۆ جانە جالپى 250-گە جۋىق ماماندار قاتىستى.  جانە وبلىسقا قاراستى 12 اۋداننىڭ  اكىمدەرى كونفەرەنتسياعا ونلاين رەجيمدە قاتىستى.

باسقوسۋ بارىسىندا  قۇقىق بۇزۋشىلىقتىڭ الدىن-الۋ, ونىمەن قالاي كۇرەسۋ جايىنداعى ماسەلەلەر كوتەرىلىپ, اشىق پىكىرلەر ايتىلدى. ماسەلەن, ازاماتتاردىڭ تەرگەۋ جۇمىستارىنىڭ جۇرگىزىلۋىنە ات سالىسۋ بەلسەندىلىگى تومەن, ءنورماتيۆتى-قۇقىقتىق رەتتەۋلەردى ازاماتتاردىڭ قاتىسۋىمەن جەتىلدىرۋ, سونىمەن بىرگە الەۋمەتتىك  جەلىلەردە زاڭدىق تالاپتاردىڭ  ورىندالۋ دەڭگەيى  سەكىلدى بىرنەشە ساۋالدار تالقىلاندى.

مامانداردىڭ مالىمەتىنشە, ەلىمىزدە  قىلمىس سانى  جىلدان جىلعا ازايىپ وتىر. ونىڭ ىشىندە اقتوبە وبلىسىندا وتكەن جىلدىڭ وسى كەزەڭىمەن سالىستىرعاندا قۇقىق بۇزۋشىلىق سانى 12,3% تومەندەگەن. ماسەلەن, جىل باسىنان بەرى  4339 قۇقىق بۇزۋشىلىق تىركەلسە, وتكەن جىلى بۇل كورسەتكىش 4978-ءدى كورسەتكەن.

وبلىس اكىمى وڭداسىن ورازالين ەڭ باستىسى, حالىقتىڭ  قاۋىپسىزدىگىن قامتاماسىز ەتۋ, ازاماتتاردىڭ ءوز قۇقىقتارىن ىسكە اسىرۋ ماقساتتارىندا جۇمىستار جاسالۋ قاجەتتىگىن ايتتى.

«الدىمىزدا الەۋمەتتىك ماسەلەلەردىڭ توعىسىندا تۇرعان پروبلەمالاردى قاراۋ مىندەتى تۇر, بۇل قۇقىق بۇزۋشىلىقتىڭ الدىن الۋ ءۇشىن  قوعام بولىپ كۇرەسۋ  كوزقاراسىن قالىپتاستىرۋ كەرەك. وسى باسقوسۋ قۇقىقتىق مەملەكەتتىڭ قالىپتاسۋىنا قوسىمشا قادامدار جاساۋعا كومەكتەسەدى دەپ سەنەمىن»,-دەدى وبلىس اكىمى.

كونفەرەنتسياعا كەلگەن قوناقتار ايماق باسشىسىنا  جيىننىڭ جوعارى دارەجەدە ۇيىمداستىرىلعانىنا العىس ءبىلدىرىپ, باسقوسۋدى تۇراقتى تۇردە وتكىزىلەتىنىنە سەنىم ءبىلدىردى.