قوعامدىق باقىلاۋدىڭ ينتەراكتيۆتى كارتاسى «استانا – ادالدىق الاڭى» جوباسىن ىسكە اسىرۋ اياسىندا ەنگىزىلدى.
كارتا – بۇل سىرتقى رەسۋرستا بولىنەتىن بيۋدجەت قاراجاتىن كورسەتۋ جانە باقىلاۋ, شاعىمدار, پىكىرلەر جيناۋ جانە اقپاراتتى تالداۋ ءۇشىن جالپى قولجەتىمدى سەرۆيس.
«ەگەر جولداردا جوندەۋ جۇمىستارى جۇرگىزىلىپ جاتسا, نەمەسە كەرىسىنشە, جوندەۋ جۇمىستارى ۇزاق ۋاقىت جۇرگىزىلمەسە, ازاماتتار ينتەراكتيۆتى كارتا سايتىنا كىرە الادى (www.publicbudget.kz). قالا كارتاسىنان نىساندى تاۋىپ, ءتيىستى پىكىر قالدىرۋى قاجەت. حابارلامالاردى جەدەل شارالار قابىلداناتىن جوبا قىزمەتكەرلەرى قاداعالايدى», – دەدى قالا اكىمىنىڭ ورىنباسارى ارمان تۇرلىبەك.
ونىڭ ايتۋىنشا, رەسۋرستا بولىنگەن قاراجات پەن جۇمىستاردى جۇرگىزۋ بارىسى تۋرالى مالىمەتتەر جيناقتالعان.
«وسىلايشا ءبىز ازاماتتىق باقىلاۋ ينستيتۋتىن كۇشەيتىپ, ەلوردا تۇرعىندارىنىڭ قالالىق پروتسەستەرگە تارتىلۋ كورسەتكىشىن ارتتىرعىمىز كەلەدى», دەپ اتاپ ءوتتى ا.تۇرلىبەك.
كارتادا جولداردى جوندەۋ جانە سالۋ جونىندەگى دەرەكتەر عانا ەمەس, مەكتەپتەر, ەمحانالار سياقتى بارلىق الەۋمەتتىك نىساندارعا بولىنگەن بيۋدجەتتىك قاراجات جونىندە مالىمەتتەر كورسەتىلگەن.
ەلوردا تۇرعىندارى قانداي دا ءبىر وبەكتىنىڭ قىزمەتىنە قاتىستى كەز كەلگەن سيپاتتاعى ءوتىنىشتى قالدىرا الادى. بۇل مەكتەپتەردە ىرىكتەۋگە قاتىستى ساۋالدار, ەمحانادا مەديتسينالىق قىزمەت كورسەتۋدىڭ ساپاسى نەمەسە مەملەكەتتىك ورگانعا شاعىم بولۋى مۇمكىن.
پراكتيكالىق سەرۆيس كومەگىمەن ەلوردا تۇرعىندارى قالالىق ورتانى جاقسارتۋ بويىنشا شاعىمدار مەن ۇسىنىستاردى قالدىرا الادى, سونداي-اق بيۋدجەت قاراجاتىنىڭ جۇمسالۋىن باقىلاۋدى جۇزەگە اسىرا الادى. ءوز پىكىرلەرىڭىزدى www.publicbudget.kz سايتىندا قالدىرا الاسىزدار.