مارافوننىڭ ەڭ ۇزىن قاشىقتىعى – 21 شاقىرىمدىق سىندا بەلارۋسسيا مەن قىرعىزستاننان كەلگەن اتلەتتەر ۆلاديسلاۆ پرياموۆ پەن داريا ماسلوۆا توپ جاردى. ايتا كەتۋ كەرەك, بەلارۋس جەلاياعى ۆلاديسلاۆ پرياموۆ وسىمەن ەكىنشى رەت اتالعان مارافوننىڭ جەڭىمپازى اتانىپ وتىر.
Armanǵa jol-2019 جارتىلاي مارافونىندا 2 شاقىرىمدىق «بالاپان» سىنىندا حابىلحان الپامىس پەن اناستاسيا تسۆيركۋنوۆا, «دوستىق» سىنىندا (7 كم) قۇدايبەرگەن زەينوللاەۆ پەن ۆيكتوريا سەنكينا جەڭىمپاز اتاندى.
بيىل ءبىرىنشى رەت سكانديناۆ ءجۇرىسى بويىنشا ۇيىمداستىرىلعان «دوستىق» دوداسىندا (7 كم) اسقار جاڭابەرگەنوۆ پەن اسەل اسانوۆا الدىنا جان سالمادى.
مۇمكىندىگى شەكتەۋلى جاندار اراسىنداعى «دوستىق» سايىسىندا بوتاكوز اقىلبەكوۆا ۇزدىك شىقتى.
18-34 جاس ارالىعىنداعى جەلاياقتار جارىسىندا (14 كم) ەرجان جانارىستانوۆ پەن ەكاتەرينا گريتساي ءبىرىنشى ورىنعا يە بولدى. 51-65 جاس ارالىعىنداعى «سپۋتنيك» دەپ اتالعان سىندا سەرگەي پوليكارپوۆ پەن تەلعوناي شااەۆا ۇزدىك شىقتى.
جاستارى 70-كە جەتكەن ەگدە جەلاياقتار اراسىنداعى جارىستا بيەباي تىلەمىسوۆ پەن امەگۇلسىن مۇسىلمانوۆا ءبىرىنشى بولىپ مارە سىزىعىن قيدى.
– جارىس جولى ۇنادى. مارافوننىڭ ۇيىمداستىرىلۋى دا جوعارى دەڭگەيدە ءوتتى. جىل بويى بار كۇشىمدى سالىپ جاتتىقتىم. بىلتىرعى جىلعى رەكوردىمدى جاڭارتا الماعانىم راس. دەگەنمەن, ءبىرىنشى ورىن ماعان بۇيىردى, – دەدى جارتىلاي مارافوننىڭ ەرلەر اراسىنداعى جەڭىمپازى ۆلاديسلاۆ پرياموۆ.
– جۇگىرۋ مەنىڭ جۇمىسىم. قاراعاندى مارافونىنا مەن ءبىرىنشى رەت قاتىسىپ وتىرمىن. بىلتىر قۇربىم وسى جارىسقا قاتىسقان ەكەن. سونىڭ ۇگىتتەۋىنىڭ ارقاسىندا مەن دە بيىل باق سىناپ, ءتاپ-ءتاۋىر ناتيجەگە قول جەتكىزدىم, – دەدى ايەلدەر اراسىنداعى سىننىڭ جەڭىمپازى داريا ماسلوۆا.
جارتىلاي مارافوندا جەڭىمپاز جانە جۇلدەگەر بولعان جەلاياقتار جۇلدە قورىنا دەپ تىگىلگەن 8 ميلليون تەڭگەنى ءوزارا ءبولىستى. ناقتىراق ايتار بولساق, جەڭىمپاز اتانعان سپورتشىلار 1 ملن تەڭگەدەن سىياقى الدى.
– جىل وتكەن سايىن جارتىلاي مارافونعا قاتىسۋشىلار سانىنىڭ ارتىپ كەلە جاتقانى قۋانتادى, – دەدى قاراعاندى وبلىستىق دەنە شىنىقتىرۋ جانە سپورت باسقارماسىنىڭ باسشىسى دميتري كارپوۆ.
Armanǵa jol-2019 جارتىلاي مارافونىن مىڭداعان جانكۇيەر تاماشالادى.