ءىس-شاراعا ماڭعىستاۋ وبلىسىنىڭ پوليتسيا دەپارتامەنتىنىڭ, قالالىق جانە اۋداندىق پوليتسيا باسقارمالارىنىڭ, جەكە قۇرامى مەن كادر سالاسىنا جاۋاپتى قىزمەتكەرلەر قاتىستى.
اۋماقتىق دەپارتامەنت باسشىسى ن.جاننازاروۆا كەزدەسۋ بارىسىندا 2019-2020 ج.ج. ارنالعان اگەنتتىك پەن ىشكى ىستەر مينيسترلىگى اراسىنداعى ءوزارا ءىس-قيمىلدىڭ جول كارتاسى, قۇقىق قورعاۋ ورگاندارىنداعى سىبايلاس جەمقورلىققا قارسى ءىس-قيمىل ماسەلەلەرىن كوتەرىپ, «اتىراۋ – ادالدىق الاڭى» جوبالىق كەڭسەسىنىڭ باستاماسىمەن قولعا الىنىپ پوليتسيا قىزمەتكەرلەرىن ادال بولۋعا, ادىلدىك پەن شىنشىلدىققا شاقىراتىن, قوعام ىشىندە وڭ ءيميدجىن قالىپتاستىرۋعا باعىتتالعان «ادالدىق ايناسى» جوباسىن وڭ تاجىريبە رەتىندە ۇسىندى.
– جول كارتاسىنىڭ جوباسىندا ىشكى ىستەر ورگاندارىن تۇتىنۋشىعا باعدارلانۋعا باعىتتالعان جاڭعىرتۋ قاراستىرىلعان. اتاپ ايتقاندا, اۋداندىق بولىمدەر مەن پوليتسيا باسقارمالارىندا ازاماتتاردىڭ وتىنىشتەرىن جەدەل قابىلداۋ ءۇشىن ولاردى حقكو ۇلگىسى بويىنشا وزگەرتۋ ۇسىنىلادى. سىبايلاس جەمقورلىق تاۋەكەلدەرىن قىسقارتۋ ءۇشىن پوليتسيا قىزمەتكەرلەرىن تسيفرلاندىرۋدىڭ, سونىڭ ىشىندە جولداعى قاۋىپسىزدىكتى باقىلاۋدى جۇزەگە اسىراتىن جاڭا ادىستەرى ۇسىنىلادى. جول كارتاسىنىڭ جوباسىندا «Integrity Check» (پاراساتتىلىقتى تەكسەرۋ) قاعيداتى بويىنشا, سونداي-اق پوليتسەي مەن ازاماتتىڭ ءوزارا ءىس-قيمىل سالاسىندا «جاسىرىن ساتىپ الۋشى» ادىسىمەن قوعامدىق باقىلاۋ قاراستىرىلعان, دەدى اگەنتتىكتىڭ اۋماقتىق دەپارتامەنتىنىڭ باسشىسى. سونداي-اق, ول جاس ۇرپاقتى ادالدىققا تاربيەلەۋ جانە جۇرتشىلىقتىڭ الەۋمەتتىك جاۋاپكەرشىلىگىن كوتەرۋ ماقساتىندا وڭىرىمىزدە اشىلعان «ادالدىق دۇكەندەرىنە» دە توقتالىپ ءوتتى. وبلىستا اشىلعان 106 دۇكەن تەك وقۋ ورىندارىندا عانا ەمەس, سونىمەن بىرگە اقتاۋ قالالىق پوليتسيا باسقارماسىندا, ارنايى حالىققا قىزمەت كورسەتۋ ورتالىعىندا جانە حالىقارالىق اۋەجايدا وزىنە-ءوزى قىزمەت كورسەتۋ قاعيداتىمەن جۇمىس جاساپ تۇر. دەپارتامەنت باسشىسى وسىنداي كرەاتيۆتى تاجىريبەنى پوليتسيانىڭ باسقا دا اۋداندىق بولىمشەلەرىندە جالعاستىرۋ قاجەت دەگەن ۇسىنىسىن ءبىلدىردى جانە پوليتسيا قىزمەتكەرلەرىنە قاتىستى اكىمشىلىك تاجىريبەگە توقتالا وتىرىپ, كۇندەلىكتى جۇمىس بارىسىندا زاڭدىلىق پەن پاراساتتىلىق قاعيداتتارىن باسشىلىققا الۋعا شاقىردى.
شارا بارىسىندا سىبايلاس جەمقورلىققا قارسى قىزمەتىمەن سوڭعى ءۇش جىلدىقتا وڭىردە تىركەلگەن سىبايلاس جەمقورلىق دەرەكتەرى, اسىرەسە ىشكى ىستەر ورگاندارى سالاسىندا ورىن العان قىلمىستىق ىستەر تۋرالى دەرەكتەر كەلتىرىلىپ, سىبايلاس جەمقورلىقتىڭ الدىن الۋ بويىنشا شارالاردىڭ ودان ءارى جالعاساتىنى باسا ايتىلدى. سونىمەن بىرگە قر قىلمىستىق-پروتسەسسۋالدىق كودەكسىنىڭ 200-بابىنا سايكەس, زاڭبۇزۋشىلىقتاردى جويۋ جونىندەگى ەنگىزىلگەن بىرقاتار ۇسىنىستار تۋرالى مالىمەت بەرىلدى. مىسالعا 2016-2018 ج.ج. ىشكى ىستەر ورگاندارىنا وسىنداي 67 ۇسىنىس جولدانىپ, ولاردى قاراستىرۋ ناتيجەسىندە 77 تۇلعا تارتىپتىك جاۋاپكەرشىلىككە تارتىلعان. سولاردىڭ ىشىندە 4 ەسكەرتۋ, 12 سوگىس, 28 قاتاڭ سوگىس, 12 قىزمەتىنە تولىق ەمەس سايكەستىلىك, 12 لاۋازىمىنان بوساتۋ, 9 جۇمىستان شىعارۋ.
جۇرگىزىلگەن جەدەل-ىزدەستىرۋ قىزمەتىنىڭ ناتيجەسىندە جانە ازاماتتاردان كەلىپ تۇسكەن وتىنىشتەر بويىنشا 2016-2018ج.ج. جانە اعىمداعى جىلدىڭ 4 ايىندا 24 ىشكى ىستەر ورگاندارى قىزمەتكەرىنە قاتىستى 41 سىبايلاس جەمقورلىق قىلمىستار تىركەلدى, 31 جازالاۋ قورىتىندىسىمەن سوتقا جولداندى, 20 تۇلعاعا قاتىستى سوت شەشىمى شىققان.
كەزدەسۋ سوڭىندا ءسوز العان ماڭعىستاۋ وبلىسىنىڭ پوليتسيا دەپارتامەنتىنىڭ باستىعى ق.تايمەردەنوۆ سپيكەرلەرگە العىسىن ءبىلدىرىپ, ىشكى ىستەر ورگاندارى تاراپىنان جۇرتشىلىقپەن كەرى بايلانىس مەحانيزمدەرىن جەتىلدىرۋ, قىزمەتىندە اشىقتىقتى قامتاماسىز ەتۋ جانە پوليتسيا قىزمەتكەرىنە دەگەن تۇرعىنداردىڭ كوزقاراسىن وزگەرتۋگە بار كۇشتەرىن سالاتىندارىنا سەندىردى.
– اپتا سايىن ورىنباسارلارىممەن ازاماتتاردى جەكە قابىلداۋ جۇرگىزىلەدى, جەكە ءوزىم سەنبى سايىن تۇرعىندارمەن كەزدەسەمىن. قازىرگى تاڭدا 2 فرونت-كەڭسە اشىلىپ, 1-ءشى جارتىجىلدىقتىڭ اياعىنا دەيىن بارلىق قالالىق جانە اۋداندىق بولىمشەلەردە اشۋ جوسپارلانۋدا. ايىنا ءبىر رەت الەۋمەتتىك جەلىلەردە «ون-لاين» رەجىمىندە جەلى قولدانۋشىلاردىڭ سۇراقتارىنا جاۋاپ بەرەمىن. تاۋلىك بويى «Whats App» قوسىمشاسى ارقىلى فوتو جانە بەينەروليكتەردى جالعاۋمەن تۇرعىنداردان ءتۇرلى قۇقىق بۇزۋشىلىقتار تۋرالى سۇراقتار قابىلدانادى. سىبايلاس جەمقورلىقتىڭ الدىن الۋ باعىتىندا اعىمداعى جىلدىڭ 1 قاڭتارىنان باستاپ بارلىق اكىمشىلىك حاتتامالار ەلەكتروندىق تۇردە راسىمدەلەدى. جالپى العاندا جەكە قۇرام اراسىندا سىبايلاس جەمقورلىق دەرەكتەرىنىڭ الدىن الۋ ءۇشىن بارلىق ءىس-شارالار قولعا الىنۋدا. سىبايلاس جەمقورلىققا قارسى ءىس-قيمىل بويىنشا ءوزارا ىنتىماقتاستىق اگەنتتىكتىڭ اۋماقتىق دەپارتامەنتتەرىمەن جالعاساتىن بولادى, دەدى ق.تايمەردەنوۆ.
ماڭعىستاۋ وبلىسى