17 كۇنگە جوسپارلانعان ساپار ارال تەڭىزىنىڭ قازاقستان اۋماعى بويىنشا 4000 شاقىرىمدى قامتيدى. 2019 جىلدىڭ 12 - 28 مامىر ارالىعىندا ساياحاتشىلار كەلەسى باعىت بويىنشا جول جۇرەدى : نۇر-سۇلتان – ارقالىق - تورعاي – ىرعىز – شالقار - بەگىمبەت - بوزوي – وڭتۇستىك نۇكتەسى – چەرنىشەۆ شىعاناعى - قۇلاندى - تۇششىباس – شەۆچەنكو شىعاناعى- شۇبارتاراۋىز تۇبەگى - اقەسپە – بۋتاكوۆ شىعاناعى – قوتىرناق تۇبەگى – ارال - قامىستىباس - قاراتەرەڭ - كوكارال بوگەتى– قاراتەرەڭ - بايقوڭىر – قىزىلوردا – جەزقازعان - قاراعاندى – نۇر-سۇلتان.
بۇل QazaqGeography-ءدىڭ ارالعا باعىتتالعان ءۇشىنشى ەكسپەديتسياسى. 2016 جىلدان باستاپ ءداستۇرلى تۇردە وتكىزىلەتىن شاراعا شەتەل جانە قازاقستاندىق عالىمدار, گەوگرافيالىق قوعامنىڭ بەلسەندى مۇشەلەرى مەن كاسىبي ساياحاتشىلار قاتىسادى. الدىڭعى ەكسپەديتسيالار كەزىندە سولتۇستىك ارالدىڭ بىرنەشە بولىكتەرىندە سۋدىڭ گيدروبيولوگيالىق كۇيى زەرتتەلگەن بولاتىن. وسىعان دەيىن ارال تەڭىزىنىڭ ورتاشا تۇزدىلىعىنىڭ تومەندەۋ بەتالىسى تىركەلگەن ەدى. بۇل سولتۇستىك ارالداعى ەكولوگيالىق جاعدايدىڭ جاقسارىپ كەلە جاتقانى تۋرالى الدىن الا قورىتىندى شىعارۋعا مۇمكىندىك بەردى.
ايتا كەتەر جايت, 2018 جىلى نازارباەۆ ۋنيۆەرسيتەتىنىڭ گيدروبيولوگ عالىمدارىمەن بىرگە زەرتتەۋ سپەكترىنە وڭتۇستىك ارال كىرىپ, تەڭىزدىڭ وزبەكستان بولىگى دە زەرتتەۋگە الىندى. عىلىمي سىنامالاردىڭ ناتيجەلەرى بويىنشا پلانكتوندىق توپتانۋلاردىڭ بيوالۋانتۇرلىلىگى, سۋدىڭ لاستىعى, قىشقىلدىعى, تۇز, فوسفور دەڭگەيى تۋرالى دەرەكتەر جينالدى, ول سولتۇستىك جانە وڭتۇستىك ارال ەكوجۇيەسىنىڭ دامۋىنداعى الدىن الا ترەندتى انىقتاۋعا مۇمكىندىك بەردى. عىلىمي زەرتتەۋ جۇمىستارىنان بولەك, ەكسپەديتسيانىڭ ماقساتى - ارال ءوڭىرى بويىنشا تۋريستىك باعىت كارتاسىن جاساپ, بىرەگەي فوتو- جانە بەينەماتەريالدار جيناۋدى كوزدەيدى.