باسكەتبولدان قازاقستاننىڭ تۇراقتى بىرىنشىلىگى اياقتالىپ, پلەي-وففقا جولداما العان كوماندالار انىقتالدى.
ەل چەمپيوناتىنىڭ 2018-2019 جىلعى ماۋسىمىندا جەتى كوماندا كۇش سىناستى. ولار – «استانا» (نۇر-سۇلتان), «الماتى لەگيونى» (الماتى), «كاسپي» (اقتاۋ), اتىراۋدىڭ قوس كلۋبى – «اتىراۋ بارىستارى» مەن «اگۋ اتىراۋ بارىستارى», «سينەگورە» (كوكشەتاۋ) جانە «توبىل» (قوستاناي).
تۇراقتى بىرىنشىلىكتىڭ قورىتىندىسى بويىنشا جارتىلاي فينالدا باق سىناۋ قۇرمەتىنە يە بولعان ءتورت كوماندا انىقتالدى. ەندى وسى مەجەدە «استانا» (نۇر-سۇلتان) مەن «توبىل» (قوستاناي) جانە «الماتى لەگيونى» (الماتى) مەن «اتىراۋ بارىستارى» (اتىراۋ) ءوزارا شەبەرلىك بايقاسادى. بۇل باسەكەلەر 18-21 مامىر ارالىعىندا وتەدى.
جوعارىدا اتالعان ماتچتاردا جەڭىسكە جەتكەندەرى باس جۇلدە ءۇشىن تالاسسا, ۇتىلعاندارى قولا مەدال ءۇشىن سايىسقا تۇسەدى. شەشۋشى باسەكەلەر 25-28 مامىر ارالىعىندا وتەدى.