ورىندىققا قارسى ءمىنىپ وتىرعان اققۇبا ايسانا, – ورىندىقتىڭ ارقالىعىنا ايقاستىرا قويعان اپپاق بىلەگىنە يەگىن سۇيەپ وتىرعان. سوسىن ورنىنان ەرىنە تۇردى دا قابىرعاعا تولتىرا جاپسىرعان قارا الا ساۋىسقانداي اق-قارا ءتۇستى فوتوسۋرەتتەرگە جاعالاي قاراپ:
– ەريك, نەگە تەك قانا اق-قارا تۇسكە قۇمارسىڭ وسى؟
– ءتۇرلى-ءتۇستى ۇناتپايمىن. وتىرىك پەن جاساندىلىقتىڭ ءبارى سول ءتۇرلى-ءتۇستى جىلتىراقتارعا جاسىرىنادى.
ايسانا ۇستەلدىڭ ۇستىندەگى فوتوسۋرەتتىڭ ءبىرىن الىپ:
– مىنا ادەمى ايەلدىڭ ۇستىندەگى كويلەگى قارا-سۇر. مۇمكىن بۇل كويلەك القىزىل بولعان شىعار, ەگەر فوتو ءتۇرلى-ءتۇستى بولسا, مىنا بەيشارا ايەل ودان دا سۇلۋ كورىنەر مە ەدى؟ – باسىن ەكى جاعىنا كەزەك-كەزەك قيسايتىپ, ءارى-بەرى قاراعانىنا ءسۇيسىنىپ قالىپتى ەريك. – وتكەن زامانداعى بارلىق ءتۇستى ۇرلاپ, وزىنە جۇتىپ العان قارا ءتۇستىڭ مۇنىسى قىلمىس ەمەس پە؟
ەريك مىرس ەتىپ ەزۋ تارتتى, كوفەۆاركانىڭ تۇيمەسىن باسىپ جاتىپ.
– سەن مويىنداۋعا ءتيىسسىڭ, بۇل جاي عانا اق پەن قارا تۇستەن باسقا رەڭدى قابىلداي الماۋدان تۋعان كەششە تۇسىنىك.
– جانىم-اۋ, بۇل ءار ادامنىڭ ءوز قالاۋى. كوللەكتسيا جيناۋ – جەكە قىزىعۋشىلىق.
– ال مىنا قالىڭ قارا الا سۋرەتتە قانداي ءمان-ماعىنا بار؟
– مەن بۇل فوتولاردان سول كەزدەگى ادامداردىڭ كوڭىل-كۇيىن كورەمىن. مىسالى, مىنا فوتودا ءۇيدىڭ قابىرعاسىندا جالاڭاش ايەلدىڭ پلاكاتى تۇر... مىنە, قارا. جانە وسى اق-قارا ءتۇستى فوتودان جانىما ءبىر جىلىلىق تابامىن. ادامداردىڭ كوزىنەن ومىرگە دەگەن قۇشتارلىقتى كورەمىن.
– ول تەك سەنىڭ كوزىڭە عانا كورىنگەن نارسە. – ايسانا ادەمى اپپاق ساۋساقتارىمەن فوتوسۋرەتتى نۇسقاپ, – مەكتەپ بىتىرۋشىلەر كەشىندەگى مىنا ءبىر توپ جىگىتتىڭ, – مىنە, مىنا ءبىر جالبىرباس جىگىت ناعىز الاياقتىڭ ءوزى, تەك ونىڭ كوزىندەگى قىزىلدى, جۇزىندەگى جازۋدى اق-قارا ءتۇس جۋىپ كەتكەن.
ەريك كوفەسىن ارالاستىرىپ جاتىپ, بۇعان قىرىنان ءبىر قارادى دا تاعى دا ءۇنسىز قالدى.
– جارايدى, ءجۇرشى, شىعايىقشى مىنا جەردەن. قابىرعاداعى كوزدەر وڭمەنىمنەن ءوتىپ بارادى. مىنا ەسكى تۇستەر ادامدى تۇنشىقتىرادى. بىزگە تەزىرەك شىعۋ كەرەك, – دەپ ساعاتىنا ءبىر قاراعان ايسانا, – ورىندىققا قايتا وتىردى.
– سەن ەشتەڭەگە تاڭ قالا المايسىڭ, ايسانا. سەبەبى سەن ءالى دە سول جۇلدىزناماداعى «ومىرىڭىزدە ءبىر كەرەمەت وزگەرىس بولدى» دەگەنگە سەنىپ قالعانسىڭ. سەن كۇتىپ ءجۇرسىڭ. يا سەن ونى ۇمىتتىم دەپ ويلايسىڭ. جوق, ول ءبارىبىر ساناڭنىڭ ءبىر تۇكپىرىن كەمىرىپ جاتىر.
– قويش, ەريك. بۇگىندىككە مەنى مۇلدە قۇشاقتاعان جوقسىڭ.
– ۇيات ەمەس پە, مىنا, مىنالاردان... فوتوسۋرەتتەرگە قارادى.
ءۇنسىز قالدى ەكەۋى دە. ەريك كوفەسىن سوراپتاپ, اق-قارا فوتوسۋرەتتەرگە; سوسىن شاعىن سورەگە تولتىرعان انتيكۆارياتتارعا; كونە ساعاتتار تىلىنە; كونە زاتتاردىڭ اراسىن تورلاعان-سالاقتاعان ورمەكشى تورىنا قاراپ, نەشە ءتۇرلى ويعا باتىپ وتىرعان. سوسىن تەمەكى تۇتاتپاق بولعان دا ءبىر-اق كوردى, بولمەدە ەشكىم جوق بولىپ شىقتى. ايسانا قاي ۋاقىتتا كەلدى, قاي ۋاقىتتا شىعىپ كەتتى مۇلدە ەسىندە قالماپتى. قالتاسىن سيپالاپ وتتىق قارادى.
باقىتبەك قادىر