قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان ءابىش ۇلى نازارباەۆتىڭ جارلىعىمەن تۇركىستان قالاسىنىڭ وبلىس ورتالىعى مارتەبەسىنە يە بولۋى جانە مادەنيەت جانە سپورت مينيسترلىگىنىڭ «ازىرەت سۇلتان» مەملەكەتتىك تاريحي-مادەني قورىق-مۋزەيى مەن تاريحي ورىنداردى زەرتتەۋ, قايتا جاڭارتۋ جانە قالپىنا كەلتىرۋگە ارنالعان جوباسىنا سايكەس سەرپىندى جۇمىس ءجۇرىپ جاتقانى بەلگىلى. جىل باسىنان قارقىن العان ارحەولوگيالىق قازبا جۇمىستارى بىرقاتار تاريحي مالىمەتتەردىڭ بەتىن اشىپ, ءوز جەمىسىن بەرە باستادى. رەسپۋبليكالىق, وبلىستىق بۇقارالىق اقپارات قۇرالدارىنا تىڭ اقپاراتتارمەن ءبولىسۋ ماقساتىندا 27 گەكتار اۋماقتى الىپ جاتقان العاشقى قالالىق قونىستاردىڭ ءبىرى كۇلتوبە قالاشىعىنداعى ارحەولوگيالىق قازبا جۇمىستارى جانە ءۇستى جابىنمەن قورشالعان تسيتادەل جونىندە اڭگىمەلەگەن مينيستر «كۇلتوبە قالاشىعىنىڭ تاريحي نىساندارىن قالپىنا كەلتىرۋ» جوباسىن جۇزەگە اسىرۋبىڭ 2019-2021 جىلدارعا كوزدەلگەن جوسپارلارى جونىندە دە ايتتى. سان عاسىرلىق تاريحقا باي تاريحي قالا ورنىنا جۇرگىزىلگەن زەرتتەۋ جۇمىستارى جىلدىڭ باسىندا قوقان حاندىعى كەزەڭىنە ءتان ءحىح عاسىر قۇرىلىستارىن اشۋمەن بايلانىستىرىلسا, كوكتەمنىڭ العاشقى ايلارىندا ەرتە كەزەڭدەردىڭ جادىگەرلەرىنىڭ كوپتەپ تابىلۋى جانە اعىمداعى ايدا تۇرگەش قاعاناتى ءداۋىرىنىڭ تيىنى مەن ءىح عاسىر ديرحەمى تابىلۋىمەن قۇندى. ياساۋي ءومىر سۇرگەن داۋىرگە دەيىن جاسالاتىن انىقتاۋ جۇمىستارىنان كۇتىلەتىن ناتيجە كوپ. كۇلتوبە تۋريستەر ءۇشىن اشىق اسپان استىنداعى ەكسپوزيتسيالىق جانە ارحەولوگيالىق نىسان رەتىندە قىزمەت اتقارادى.
ءباسپاسوز تانىستىرىلىمى قارناق اۋىلىنداعى تايقازاننىڭ تەمىرىن بالقىتقان پەش ورنىندا جالعاستى. «ازىرەت سۇلتان» مەملەكەتتىك تاريحي-مادەني قورىق-مۋزەيىنىڭ ارحەولوگيا ءبولىمى جۇرگىزىپ جاتقان قازبا جۇمىستارى اتاقتى قولباسشى ءامىر تەمىردىڭ بۇيرىعىمەن تەمىر ۇستالالارى قۇيعان تايقازان تەمىرىن دايىنداعان ورىندى انىقتاعان بولاتىن. تاريحي دەرەكتەر بويىنشا تەمىر بالقىتقان شەبەرلەردى تابريزيلەر دەپ اتاعان. شەبەرلەردىڭ ۇرپاعىمەن جۇزدەسىپ اتا-بابالارىنىڭ كاسىبى جونىندە پىكىر الماسقان ارىستانبەك مۇحامەدي ۇلى قازبا ورنىنان انىقتالىپ كەلە جاتقان پەش ورنىن كوردى.
سونىمەن قاتار, ساۋلەت ونەرى ەسكەرتكىشى بولىپ سانالاتىن شامەت يشان مەشىت-مەدرەسەسىمەن تانىستى. قوجا احمەت ياساۋي كەسەنەسىنىڭ ناقىشىنا ۇقساس ەتىپ جاسالعان مەشىت عيماراتى نەگىزگى ناماز وقيتىن جانە قىلۋەتتى قامتيتىن كىشى زالداردان, شارۋاشىلىق بولمەسىنەن تۇرادى. تابريزيلەر ۇرپاعى اتا-بابالارىنىڭ كاسىبىن ۇرپاقتان-ۇرپاققا جالعىستىرۋىمەن قاتار تەمىردەن جاسالعان كونە جادىگەرلەردى جيناقتاپ, مەدرەسە ءىشىن مۋزەي رەتىندە پايدالانۋدا. ارالاۋ بارىسىندا مينيستر ارىستانبەك مۇحامەدي ۇلى مەشىت-مەدرەسەنىڭ كۇمبەزىنە قايتا جاڭارتۋ جۇمىستارىن جۇرگىزۋ ءۇشىن «قازقايتاجاڭارتۋ» كاسىپورنىنىڭ باسشىسىنا بىرقاتار تاپسىرمالار جۇكتەدى.
پرەسس-تۋر ورتاعاسىرلىق ساۋران قالاشىعىندا جالعاسىپ قۇپياسىن قوينىنا جاسىرعان ەجەلگى شاحاردى تۋريستىك ورتالىققا اينالدىرۋ باعىتىندا اتقارىلاتىن جۇمىستار بويىنشا مالىمەت بەرىلدى. قازىرگى تاڭدا ساۋران ساپار ورتالىعىنىڭ جوبالىق قۇجاتتارى ازىرلەنۋ ۇستىندە. الداعى ۋاقىتتا تۋريستەرگە قىزمەت كورسەتەتىن ارنايى عيمارات پەن جاتاقحانا, قىزمەتكەرلەر مەن باقىلاۋ ورىندارى سىندى جوبالار جاسالىنباق.
- باستامانىڭ العاشقى قادامى رەتىندە «وڭتۇستىك اڭىزدارى» اتتى «Nomad Explorer» رەسپۋبليكالىق تۋريستىك ەكسپەديتسياسىنىڭ قورىتىندى گالا-كونتسەرتىنىڭ ساۋران قالاسى ماڭىندا ءوتۋىنىڭ ماڭىزى ەرەكشە, - دەدى ارىستانبەك مۇحامەدي ۇلى.
بيزنەس-قۇرىلىم, زيالى قاۋىم وكىلدەرى, وتاندىق شوۋ-بيزنەس جۇلدىزدارى, بلوگەرلەر جانە باق وكىلدەرىنەن قۇرالعان 1000-عا جۋىق ادام قاتىسقان شاراعا دا قاتىسقان مينيستر تۋريستەرمەن جۇزدەسىپ, العىسىن ءبىلدىردى.