سىبايلاس جەمقورلىققا قارسى ءىس-قيمىل ساياساتىنىڭ بازالىق باعىتتارى ەلباسىنىڭ «قازاقستان-2050» ستراتەگياسىندا, «100 ناقتى قادام» ۇلت جوسپارىندا بەلگىلەنگەن سىبايلاس جەمقورلىقتى ىرىكتەۋ مىندەتتەرىن ىسكە اسىرۋ ارقىلى ناقتى بەلگىلەنگەن.
ۇلتتىق باياندامانىڭ ماقساتى سىبايلاس جەمقورلىقتىڭ الدىن الۋ بويىنشا پراكتيكالىق ءىس-شارالاردى ازىرلەۋ جانە سىبايلاس جەمقورلىققا قارسى زاڭنامانى جەتىلدىرۋمەن قازاقستانداعى سىبايلاس جەمقورلىققا قارسى ساياساتتى جانە ونىڭ تارالۋىنىڭ جاي-كۇيى مەن ۇردىسىنە وبەكتيۆتىك تالداۋ بولىپ تابىلادى.
وسى ورايدا, باياندامانى تانىستىرىپ, تالقىلاۋ ماقساتىندا اگەنتتىكتىڭ اۋماقتىق دەپارتامەنتىنىڭ ۇيىمداستىرۋىمەن «دوستىق ۇيىندە» مەملەكەتتىك ورگانداردىڭ باسشىلارى, ۇەۇ وكىلدەرى, ءماسليحات دەپۋتاتتارى مەن ەتنو-مادەني بىرلەستىكتەردىڭ, وبلىستىق اسسامبلەيا جانە قوعامدىق كەڭەس مۇشەلەرىنىڭ قاتىسۋىمەن كەڭەيتىلگەن جيىن ءوتتى.
شارادا بىرنەشە قوعامدىق كەڭەس مۇشەلەرى مەن باسقا دا قاتىسۋشىلار وزدەرىنىڭ ۇسىنىستارى مەن پىكىرلەرىن جەتكىزگەن بولاتىن. مەملەكەتتىك قىزمەتتە 40 جىلدىق ءوتىلى بار و.توعجانوۆ جەمقورلىق دەرتىمەن قوعام بولىپ كۇرەسۋ كەرەكتىگىن ايتىپ, وڭىردەگى ءبىلىمدى دە تاجىريبەسى مول مەملەكەتتىك قىزمەتشىلەردى جوعارى لاۋازىمداردا, پرەزيدەنت اكىمشىلىگىندە دە قىزمەتتە كورگىسى كەلەتىندىگىن جەتكىزدى. قوعامدىق كەڭەستىڭ مۇشەسى ت.قالجان ۇلى پارانى العاندى ەمەس, بەرگەن ازاماتتى عانا جازاعا تارتۋ قاجەتتىگىن دۇرىس دەپ سانايدى. ال بەكەت اتا مەشىتىنىڭ باس يمامى سەيىتبەك سمايىل قاجى دىنىمىزدەن شاريعات بويىنشا دايەكتەر كەلتىرە كەلە «پارانى بەرگەننىڭ دە, العاننىڭ ورنى توزاقتا» دەيدى. سونىمەن بىرگە, جەمقورلىققا قارسى تاربيەنى ءاربىر ادام وزىنەن, وتباسىنان باستاعانى ءجون ەكەندىگىن جەتكىزدى. وعان قارسى تۇرۋدىڭ, ءاردايىم ادال بولۋدىڭ بىردەن ءبىر جولى – تاربيە تال بەسىكتەن دەمەكشى, وتباسى تاربيەسىندە بالاعا دۇرىس تاربيە بەرۋ, جەمقورلىقتىڭ زاردابىن بالا كەزدەن ءتۇسىندىرۋ.
سونىمەن قاتار, قوعامدىق كەڭەس مۇشەسى ا.تالاسباەۆا ءوزىنىڭ ماسەلەسى مەن ۇسىنىسىن جەتكىزە وتىرىپ, جۇمىسقا ورنالاسۋ كەزىندەگى اشىقتىق, ءبىلىم جانە مەديتسينا سالاسىنداعى ورىن الاتىن سىبايلاس جەمقورلىق كورىنىستەرىنە ءجيى كۋا بولاتىندىعىن جەتكىزدى. وعان سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ (سىبايلاس جەمقورلىققا قارسى قىزمەت) ماڭعىستاۋ وبلىسى بويىنشا دەپارتامەنتى باسشىسىنىڭ ورىنباسارى ب.ماحمۇد قانداي دا ءبىر سىبايلاس جەمقورلىق كورىنىستەرىنە تاپ بولعان كەزدە, ارىز بەن ناقتى دالەلدەر بولعان جاعدايدا, كەز كەلگەن ۋاقىتتا قابىلداۋعا دايىن ەكەندىكتەرىن جانە وعان قارسى شارا قولداناتىندارىن ەسكەرتتى.
ماڭعىستاۋ وبلىسىنىڭ قوعامدىق كەڭەس توراعاسىنىڭ م.ا. ب.ءجۇسىپوۆ «سىبايلاس جەمقورلىققا قارسى ءىس-قيمىل تۋرالى» ۇلتتىق باياندامانىڭ ماڭىزدىلىعىن ەسكەرە وتىرىپ جەكە قۇراممەن ۇجىم اراسىندا تالقىلايتىنىن جانە الداعى ۋاقىتتا دەپارتامەنتپەن تىعىز, بىرلەسىپ جۇمىس جاسايتىندىعىن جەتكىزدى.
ماڭعىستاۋ وبلىسى