بۇگىندە 300 مىڭنان اسا مۇشەسى بار «اۋىل» حالىقتىق-دەموكراتيالىق پاتريوتتىق پارتياسىنىڭ سەزىندە كۇن تارتىبىندەگى 2019 جىلدىڭ 9 ماۋسىمىندا وتەتىن قازاقستان رەسپۋبليكاسى پرەزيدەنتىنىڭ كەزەكتەن تىس سايلاۋىنا پارتيا اتىنان كانديدات ۇسىنۋ ماسەلەسى قارالدى. جيىندى اشقان «اۋىل» پارتياسىنىڭ توراعاسى ءالي بەكتاەۆ الداعى ماڭىزدى سايلاۋعا لايىقتى ۇمىتكەردى تاڭداۋدا تالقىلاۋ, پىكىرتالاستار بولعانىن ايتا كەلىپ, بارلىق پارتيالاستارى تولەۋتاي راقىمبەكوۆكە سەنىم ارتاتىنىن ايتتى. بۇدان كەيىن پارتيا توراعاسى ۇمىتكەردىڭ قىسقاشا ومىربايانىمەن تانىستىردى.
سەزد بارىسىندا ت.راقىمبەكوۆ دەلەگاتتار سۇراقتارىنا جاۋاپ بەردى. «اۋىل» پارتياسىنىڭ سايلاۋداعى مۇمكىندىگىن قالاي باعالايسىز؟» دەگەن العاشقى ساۋالعا ول: «پارتيامىزدىڭ مۇمكىندىگى وتە جوعارى دەپ ەسەپتەيمىن. ەلىمىزدەگى جالپى حالىقتىڭ 43 پايىزى اۋىلدا تۇرادى. ونىڭ ۇستىنە قالاداعى تۇرعىنداردىڭ ءوزى نەمەسە اتا-اناسى اۋىلدان شىققان», دەي كەلە, قازاقستاندىقتاردىڭ باسىم بولىگى اۋىل ماسەلەسىنە جاناشىر بولاتىنىن العا تارتتى. سۇراق-جاۋاپ كەزىندە ول سايلاۋالدى باعدارلاماسىنىڭ نەگىزگى باعىتى قانداي بولاتىنىن تۇسىندىرە كەلىپ, «اۋىلداردىڭ, كوپ بالالى وتباسىلاردىڭ, اۋىل شارۋاشىلىعىنىڭ ماسەلەلەرى ماعان جاقسى تانىس. سونىمەن بىرگە قالاداعى تۇرعىن ءۇي-كوممۋنالدىق شارۋاشىلىق, جول, كاسىپورىندار, ءوندىرىس, عىلىم تاقىرىبىندا دا ءتاجىريبەم جەتەرلىك», دەپ ءتۇسىندىردى.
بىرنەشە ساۋالدارعا جاۋاپ بەرگەن سوڭ دەلەگاتتاردىڭ پىكىرى تىڭدالدى. جارىسسوزدە ءبىرىنشى بولىپ ءسوز العان پارتيانىڭ جامبىل وبلىستىق فيليالىنىڭ توراعاسى ەربولات بايۇزاق ۇلى اۋىلدى گۇلدەندىرەتىن – جاستار ەكەنىن ايتىپ, ەلىمىزدەگى شالعاي ايماقتارعا جاستاردى تۇراقتاندىرۋ ماسەلەسىن ءبىر جولعا قوياتىن, اۋىلدى جان-جاقتى دامىتاتىن كەشەندى باعدارلاما ازىرلەۋدى ۇسىندى. ال الماتى قالالىق فيليالىنىڭ توراعاسى ابدۋللا ساپار ۇلى: «بۇگىنگى ءۇمىتكەر تۋرالى پارتيانىڭ ۇسىنىسىن وتە ورىندى دەپ ايتا الامىن. سەبەبى تولەۋتاي ساتاي ۇلىن بۇرىننان بىلەمىز, ءبىرلەسىپ جۇمىس ىستەدىك. ول – ءبىلىم, عىلىم جانە ءوندىرىستى ءۇيلەستىرە الاتىن ازامات», دەپ قولداۋ مەن سەنىم ءبىلدىردى.
دەلەگاتتار داۋىس بەرىپ, ءبىراۋىزدان ۇسىنىستى قابىلداعاننان كەيىن قايتا مىنبەگە كوتەرىلگەن ت.راقىمبەكوۆ: «مەنىڭ كانديداتۋرامدى ۇسىنعاندارىڭىز ءۇشىن العىس بىلدىرگىم كەلەدى. مەن ءۇشىن بۇل – جوعارى مارتەبە ءارى ۇلكەن جاۋاپكەرشىلىك», دەدى. سونىمەن قاتار ول پارتيانىڭ ساياسي ۇستانىمى, پارتيالاستارىنىڭ ۇسىنىس-پىكىرلەرى سايلاۋالدى باعدارلاماسىنا نەگىز بولاتىنىن تىلگە تيەك ەتتى.
سەزد سوڭىندا ءسوز العان ءا.بەكتاەۆ جيىنعا قاتىسۋشىلار مەن دەلەگاتتار ءۇشىن ارنايى قويىلعان كورمەدەگى فوتوسۋرەتتەرگە توقتالدى. «بۇل ەڭبەكتەر – پارتيانىڭ «Egemen Qazaqstan» گازەتىمەن ءبىرلەسىپ ۇيىمداستىرىلعان «اۋىل ناقىشتارى» اتتى فوتوسۋرەتشىلەر بايقاۋىنا كەلىپ تۇسكەن 100-دەن اسا جۇمىستىڭ جارتىسىنا جۋىعى عانا. قادىرلى قوناقتاردىڭ الدىندا وسى بايقاۋدىڭ جەڭىمپازدارىن ماراپاتتاۋعا رۇقسات ەتىڭىزدەر!», دەدى پارتيا توراعاسى. بۇل بايقاۋ وسىدان ءبىر جىل بۇرىن جاريالانىپ, جارىسقا قاتىسۋشىلاردىڭ جۇمىستارىن جىل بويىنا بەلگىلى فوتوگرافتار قاراپ, قورىتىندىسى بيىلعى ناۋرىزدىڭ سوڭىندا بەلگىلى بولدى. ءادىل قازىلاردىڭ قۇرامىندا شۇكىر شاحاي (قازىلار القاسىنىڭ توراعاسى), سوۆەتبەك ماعزۇموۆ, ەرلان ومار, ايداربەك عازيز سىندى كاسىبي ماماندار بار. فوتوبايقاۋدىڭ قورىتىندىسى بويىنشا ءىىى ورىندى جەڭىس ىسقاباي, ءىى ورىندى يگور بۋرگاندينوۆ, ال ءى ورىندى فوتو ونەرىنە ەلەۋلى ەڭبەك سىڭىرگەن, فوتوگرافتاردىڭ اقساقالى بولات وماراليەۆ جەڭىپ الدى. جەڭىمپازدارعا ديپلوم مەن اقشالاي سىيلىق تابىس ەتىلدى.