ۇمىتكەر كانديداتۋراسىن استانادا وتكەن «اۋىل» حالىقتىق-دەموكراتيالىق پارتياسىنىڭ كەزەكتەن تىس XV سەزىندە ءبىراۋىزدان قابىلدادى.
پارتيا توراعاسى ءالي بەكتاەۆ تولەۋتاي راحىمبەكوۆتىڭ اۋىل شارۋاشىلىعى ماماندارى اراسىندا تانىمال ەكەنىن, وعان 300 مىڭنان استام پارتيا مۇشەلەرىنىڭ سەنىم ارتىپ وتىرعانىن جەتكىزدى.
«ماعان سەنىم ءبىلدىرىپ, پارتيا اتىنان مەنىڭ كانديداتۋرامدى ۇسىنعاندارىڭىز ءۇشىن العىس بىلدىرگىم كەلەدى. مەن ءۇشىن بۇل جوعارى مارتەبە جانە وتە ۇلكەن جاۋاپكەرشىلىك. ەلىمىز ماڭىزدى ساياسي كەزەڭدى باستان وتكەرىپ جاتىر. مەن ۇمىتكەر رەتىندە الدارىڭىزدا جاۋاپكەرشىلىك جۇگىن تولىق سەزىنەمىن. اۋىل پارتياسىنىڭ مۇشەسى رەتىندە پارتيانىڭ ساياسي ۇستانىمدارى مەن نەگىزگى قۇجاتتارى جانە سىزدەر ايتقان بۇگىنگى ۇسىنىستار مەنىڭ كەلەشەكتەگى سايلاۋالدى باعدارلاماما نەگىز بولادى. مەنىڭ سانالى عۇمىرىم اۋىلمەن, اۋىل شارۋاشىلىعىمەن بايلانىستى. ءوزىم اۋىلدا تۋدىم, اۋىلدا ءوستىم, اۋىل شارۋاشىلىعى سالاسىنىڭ دامۋى جولىندا ەڭبەك ەتىپ كەلەمىن. بۇل سالاداعى پروبلەمالار «اۋىل» پارتياسىنىڭ نازارىنان ەشقاشان تىس قالعان ەمەس. اۋىل - قازاقستاننىڭ الەۋمەتتىك-ەكونوميكالىق دامۋىنىڭ نەگىزى», دەپ اتاپ ءوتتى.
سونىمەن بىرگە, ت. راحىمبەكوۆ پارتيا پرينتسيپتەرىنە نەگىزدەلگەن ساياسي پلاتفورمادا بىرقاتار ماسەلەگە كوڭىل بولىنگەنىن اتاپ ءوتتى. «اۋىلدا ءومىر ءسۇرۋ ساپاسىنىڭ جوعارى ستاندارتتارىن قالىپتاستىرىپ, اۋىل مەن قالانىڭ دامۋىنداعى الەۋمەتتىك سايكەسسىزدىكتى جويۋ. الدىمەن ىشكى نارىقتى ەلىمىزدە وندىرىلگەن جوعارى ساپالى تابيعي اۋىلشارۋاشىلىق ونىمدەرمەن قامتاماسىز ەتۋ. اۋىلداردا دامىعان زاماناۋي, ينجەنەرلىك, الەۋمەتتىك جانە وندىرىستىك ينفراقۇرىلىمدى قالىپتاستىرۋ. قازاقستاندى ءبىلىم بەرۋ, دەنساۋلىق ساقتاۋ جانە الەۋمەتتىك دامۋدىڭ لايىقتى جۇيەسى بار مەملەكەتكە اينالدىرۋ. ەلىمىزدىڭ باستى بايلىعى سانالاتىن بىرلىك, ىنتىماقتاستىق, تۇراقتىلىق قۇندىلىقتارىن بيىك ۇستاپ, لايىقتى جالعاستىرۋ», دەدى ۇمىتكەر.
ت. راحىمبەكوۆ ءوزىنىڭ ەڭبەك جولىندا ءتۇرلى سالالاردا تاجىريبە جيناقتاعانىن اتاپ ءوتتى.