ايماق باسشىسى تۇرعىن ءۇي قۇرىلىس جيناق بانكى باسقارما ءتورايىمى ءلاززات يبراگيموۆا, بانك دەپارتامەنتىنىڭ ديرەكتورى رينات تالتۋسوۆ جانە وسى اق اقتوبە وبلىستىق فيليالى ديرەكتورى جەدەلبەك مۋرزاگالەەۆپەن بىرگە وسى جىلدىڭ ءبىرىنشى مامىرىنان باستاپ جۇزەگە اسقالى جاتقان «اسكەري باسپانا» جاڭا باعدارلاماسىن تالقىلادى. ياعني, بۇل باعدارلاما اسكەري قىزمەتكەرلەرگە ارنالعان. وبلىس اكىمى تۇرعىنداردى باسپانامەن قامتۋ ءۇشىن بارلىق مۇمكىندىكتەردى قاراستىرۋ قاجەتتىگىن ايتتى.
قابىلداۋدان سوڭ, وبلىس اكىمى «نۇر اقتوبە» مولتەك اۋدانىندا وتكەن پاتەر كىلتىن تابىستاۋ سالتاناتتى شاراسىنا قاتىستى. ايماق باسشىسى «نۇرلى جەر» باعدارلاماسى بويىنشا 11 اقتوبەلىك ازاماتقا پاتەر كىلتىن تابىستادى.
«باسپانالى بولعان ازاماتتاردى قۋانىشتى ساتتەرىمەن شىن جۇرەكتەن قۇتتىقتايمىن. ەلىمىزدە تۇرعىنداردىڭ پاتەرلى بولۋى ءۇشىن ءتۇرلى مەملەكەتتىك باعدارلامالار جۇزەگە اسىپ كەلەدى. وتباسىلارىڭىز تەك بەرەكەگە تولى بولسىن», - دەدى وبلىس اكىمى ءوز قۇتتىقتاۋىندا.
باعدارلاما شەڭبەرىندە بالالار ءۇيىنىڭ تۇلەكتەرى مەن بيۋدجەتتىك ۇيىم قىزمەتكەرلەرى باسپاناعا قول جەتكىزۋدە. جاڭا قونىسقا يە بولعاننىڭ ءبىرى 23 جاسار بولات شۇكىروۆ وبلىس باسشىسىنا قولداۋ كورسەتكەنى ءۇشىن العىسىن ءبىلدىردى.
ولاردىڭ كوبىسىنىڭ جۇمىس تاجىريبەسى مەن تابىسى از بولعاندىقتان, جالعا بەرىلگەن پاتەرلەردى الداعى ۋاقىتتا ساتىپ الۋ مۇمكىندىگى ۇسىنىلدى. جالدامالى پاتەردى پايدالانا وتىرىپ, مەملەكەتتىك باعدارلاماعا قاتىسۋشى 6 جىل ىشىندە تۇرعىن ءۇي قۇرىلىس جيناق بانكىندەگى ءوز دەپوزيتىندە پاتەر باعاسىنىڭ 50 پايىزىن جيناۋى ءتيىس. وسىعان سايكەس, ول اي سايىن شوتىنا ورتاشا ەسەپپەن 35 000 تەڭگەدەن سالىپ تۇرۋى ءتيىس. جيناقتاۋ مەرزىمى اياقتالعاننان سوڭ, بانك قالعان 50 پايىزىن نەسيەگە جىلدىق 4,2 پايىز مولشەرلەمەمەن بەرەدى.
الداعى ۋاقىتتا بالالار ءۇيىنىڭ 20 تۇلەگى جاڭا باسپاناعا قول جەتكىزەدى دەپ كۇتىلۋدە. پاتەر كىلتى تابىستالعاننان سوڭ, جاڭا قونىس يەلەرى مەن شاقىرىلعان قوناقتار ءۇي اۋلاسىنا اعاش كوشەتتەرىن وتىرعىزدى.