تۇڭعىش پرەزيدەنت – ەلباسىنىڭ «الەۋمەتتىك قامقورلىق» باستاماسى اياسىندا ەلوردا بويىنشا جاڭارتىلعان ااك الۋشىلار شامامەن 7 مىڭ ادامدى قۇرايدى.
«ە-حالىق» اقپاراتتىق جۇيەسىنىڭ كومەگىمەن ااك-گە قۇجاتتاردى تاپسىرۋ ءتارتىبى ايتارلىقتاي جەڭىلدەتىلدى. جاردەماقىنى الۋ ءۇشىن جەكە باسىن كۋالاندىراتىن قۇجات جانە ءوتىنىش بەرسە جەتكىلىكتى. ەگەر جۇيەدە قاجەتتى اقپارات بولماعان جاعدايدا جۇمىسپەن قامتۋ ورتالىقتارىنىڭ قىزمەتكەرلەرى نەمەسە اكىمدىكتەر ءتيىستى مەملەكەتتىك ورگاندارعا جازباشا ءوتىنىش جاسايدى. 30 كۇن ىشىندە دايىندالاتىن بۇل قۇجاتتى كۇتكىسى كەلمەگەن ءوتىنىش بەرۋشىلەر قاجەتتى قۇجاتتاردى ءوزى ۇسىنۋعا قۇقىلى. «جاڭا اتاۋلى الەۋمەتتىك كومەكتە تابىستى ەسەپتەۋگە وزگەرىستەر ەنگىزدىك. ياعني 1 ساۋىردەن باستاپ كوپبالالى انالارعا, «التىن القا», «كۇمىس القا» يەلەرىنە تولەنەتىن, مۇگەدەك بالالارعا تولەنەتىن جاردەماقىلاردى جانە شاكىرتاقى مەن جەرگىلىكتى جەردەن تولەنەتىن اقشالاي جاردەمدى الىپ تاستادىق. سونداي-اق جەكە قوسالقى شارۋاشىلىقتان تۇسەتىن تابىستى جانە زەينەتاقىنى الىپ تاستاڭىزدار دەپ تە ايتىلۋدا. ونى ءبىز قاراپ جاتىرمىز. قارجىلاي مۇمكىندىگىمىزگە قاراي شەشىم قابىلدايتىن بولامىز», دەگەن ب.ساپارباەۆ ەلىمىز بويىنشا ءار وتباسىنىڭ جەكە الەۋمەتتىك كارتاسى دايىندالىپ جاتقانىن دا اتاپ ءوتتى.
«ەلباسى الەۋمەتتىك كومەك ەڭ مۇقتاج وتباسىلارعا كورسەتىلۋى كەرەك دەگەن بولاتىن. ءبىز وسىنداي وتباسىلاردى انىقتاۋ ءۇشىن جەرگىلىكتى بيلىك وكىلدەرىمەن بىرگە ءار وتباسىنىڭ جەكە الەۋمەتتىك كارتاسىن جاساپ جاتىرمىز. بۇل جۇمىستى 1 شىلدەگە دەيىن اياقتايمىز. بۇل ااك تاعايىنداۋ ءۇشىن عانا ەمەس, وتباسىنىڭ جالپى جاعدايىن ءبىلۋ ءۇشىن دە كەرەك», دەدى ب.ساپارباەۆ.
ەلوردا اكىمى باقىت سۇلتانوۆ نۇر-سۇلتان قالاسىندا الەۋمەتتىك كومەكتىڭ كولەمى مەن سانى ارتقانىن جەتكىزدى. ول «ەلباسىنىڭ تاپسىرماسىنا سايكەس نۇر-سۇلتان قالاسى ءوز تاراپىنان بيۋدجەتتىك باعدارلامالارداعى كۇتە تۇراتىن شارالاردى كەيىنگە قالدىرىپ, ۇنەمدەۋ جۇمىسى ارقىلى الەۋمەتتىك سالاعا قوسىمشا قارجى ءبولىپ وتىر. ناقتى 13 شارا قابىلداندى. وعان 8 ملرد تەڭگەگە جۋىق قارجى بولىنبەك», دەي كەلىپ, وسىعان دەيىن كورسەتىلىپ كەلە جاتقان بەس ءتۇرلى الەۋمەتتىك كومەككە قوسىمشا قارجى بولىنگەنىن ايتتى.
اتاپ ايتقاندا, بۇعان دەيىن ەلوردادا 2 مىڭ وتباسى تۇرعىن ءۇي كومەگىنە يە بولعان بولسا, بيىل ونىڭ كولەمى 18 پايىزعا ارتپاق. ەكىنشىدەن, 18 جاستان اسقان مۇمكىندىگى شەكتەۋلى تۇلعالاردىڭ كۇتۋشىلەرىن تەگىن جولاقىمەن قامتاماسىز ەتۋ ءۇشىن قالالىق بيۋدجەتتەن 1,3 ملرد تەڭگە قاراستىرىلىپ وتىر. ءۇشىنشى, ۇيدە ءبىلىم الاتىن مۇمكىندىگى شەكتەۋلى بالالارعا كورسەتىلەتىن كومەك 25 مىڭ تەڭگەگە دەيىن (1,5 ەسەگە) جوعارىلاعان. ءتورتىنشى, مەملەكەتتىك الەۋمەتتىك تاپسىرىس اياسىندا تەگىن تەحنيكالىق جانە كاسىبي ءبىلىم الۋعا قولداۋ كورسەتىلەدى. بۇل ءۇشىن 3 مىڭ ادامعا 1,5 ملرد تەڭگە بولىنگەن. بەسىنشى, ءبىلىم بەرۋ, دەنساۋلىق ساقتاۋ جانە اسكەري سالادا جۇمىس ىستەيتىن بيۋدجەتتىك قىزمەتكەرلەرگە بەرىلەتىن تۇرعىن ءۇي سەرتيفيكاتىنىڭ سانىن 2 مىڭعا جەتكىزۋ ءۇشىن بيۋدجەتتەن 2 ملرد تەڭگە قاراستىرىلعان.
«قوسىمشا 8 الەۋمەتتىك شارانى ايتاتىن بولساق: 1) كوپ بالالى وتباسىلاردىڭ بالالارى مەكتەپكە, كوللەدجگە, جوعارى وقۋ ورنىنا تەگىن بارۋ ءۇشىن 200 ملن تەڭگە ءبولىنىپ وتىر. ياعني 36 مىڭ بالا تەگىن جولاقىمەن قامتىلادى. 2) بۇعان دەيىن ەلوردامىزداعى بارلىق مەكتەپتە وقۋشىلار 4-سىنىپقا دەيىن تەگىن ىستىق تاماقپەن قامتىلعان بولسا, 1 قىركۇيەكتەن باستاپ كوپ بالالى وتباسىلاردىڭ بالالارى 1-11 سىنىپقا دەيىن تەگىن تاماقتانا الادى. قازىر 32 مىڭ بالاعا تەگىن تاماق بەرىلۋ ءۇشىن 1 ملرد-قا جۋىق تەڭگە قاراستىرىلدى. 3) كوپ بالالى جانە از قامتىلعان وتباسىلاردىڭ بالالارىنا, جەتىم بالالارعا ارنايى ساۋىقتىرۋ دەمالىسى ۇيىمداستىرىلادى. بيىل 10 مىڭ بالاعا 500 ملن تەڭگە ءبولىندى. 4) مەكتەپ فورماسىمەن جانە وقۋ قۇرالدارىمەن تەگىن قامتاماسىز ەتۋ ءۇشىن 38 ملن تەڭگە ءبولىنىپ, 32 مىڭ بالاعا بەرىلەدى. 5) كوپ بالالى جانە از قامتىلعان وتباسىلاردىڭ بالالارى, سونداي-اق مۇگەدەك بالالار بالاباقشاعا تەگىن بارۋىنا قولداۋ كورسەتىلەدى. بۇگىندە «بالاپان» باعدارلاماسى بويىنشا ءار بالاعا ورىن ءۇشىن ءبىز 27 مىڭ تەڭگە تولەپ وتىرمىز, ال تۇرعىندار, تاماق ءۇشىن 17 مىڭ تەڭگە تولەيسىزدەر. 1 قىركۇيەكتەن باستاپ كوپ بالالى وتباسىلاردىڭ بالالارىنا بۇل قارجى بيۋدجەتتەن تولەنەتىن بولادى. بۇل ءۇشىن دە بيىلعا جارتى ملرد تەڭگە ءبولۋدى كوزدەپ وتىرمىز. 6) 180 مىڭ بالاعا ەلوردانىڭ جوو-لارىنا تانىمال ماماندىقتار بويىنشا ءبىلىم الۋعا ارنايى گرانتتار بولىنبەك. بۇل ءۇشىن تاعى 25 ملن تەڭگە ءبولىنىپ, جىلىنا ءار بالاعا 500 مىڭ تەڭگە بەرىلەدى. 7) كوپ بالالى انالارعا ءتىس دارىگەرى قىزمەتىن تەگىن ۇسىنۋ ءۇشىن بيۋدجەتتەن 400 ملن تەڭگە قاراستىرامىز. 8) كوپ بالالى وتباسىلارعا قىسقى وتىنمەن كومەكتەسۋ ءۇشىن قوسىمشا 1000 وتباسىنا قاراجات ءبولىندى», دەدى نۇر-سۇلتان اكىمى.
سونداي-اق قالا باسشىسى الەۋمەتتىك ماسەلەلەر بويىنشا ءۇش ايدىڭ ىشىندە 350 جەكە تۇلعانى قابىلداعانىن, 850 ادامنىڭ قابىلداۋدا كەزەكتە تۇرعانىن ايتا كەلىپ, جەكە ماسەلەلەردىڭ اۋدان, باسقارما دەڭگەيىندە دە شەشىمىن تابۋى ءۇشىن اۋدان اكىمدەرى مەن باسقارما باسشىلارى دا بەلسەندى بولۋى كەرەك ەكەنىن ەسكەرتتى.
قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ توراعاسى مارحابات جايىمبەتوۆ كوپ بالالى وتباسىلاردى ءپاتەرمەن قامتۋ ءبىرىنشى كەزەكتە تۇرعانىن اتاپ ءوتتى. نۇر-سۇلتان قالاسى بويىنشا 616 پاتەرگە قارجى بولىنبەك. ياعني جىل سايىن قوسىمشا 5,1 ملرد تەڭگە بولىنەدى. 7 جىلدىڭ ىشىندە 35,9 ملرد تەڭگە ءبولىنىپ, 4107 قوسىمشا پاتەر سالىنادى», دەدى ول.
كوميتەت توراعاسىنىڭ ايتۋىنشا, نۇر-سۇلتان قالاسىندا پاتەر كەزەگىندە تۇرعان كوپ بالالى وتباسىنىڭ سانى 1 قاڭتاردا 2888 بولسا, سوڭعى ءۇش ايدا ولاردىڭ سانى 3000 ادامعا كوبەيگەن. «كوپ بالالى وتباسىلارعا ءبىرىنشى كەزەكتە پاتەر بەرىلەتىنىنەن حاباردار بولعان مەملەكەتتىك, بيۋدجەتتىك قىزمەتكەرلەر كاتەگورياسىن كوپ بالالى وتباسىلارعا اۋىستىرعان. سوعان قاراماستان مەملەكەت ەسەبىنەن بيىل 23 721 جالدامالى پاتەر بەرىلەدى دەپ وتىرمىز. نۇر-سۇلتان قالاسىندا 1938 پاتەر بەرىلەدى», دەدى م.جايىمبەتوۆ.
مايگۇل سۇلتان,
«Egemen Qazaqstan»