قازىرگى تاڭدا قاۋىمداستىققا 5 مىڭنان استام ادام مۇشە. سوڭعى ەكى جىلدا قاۋىمداستىق مىڭنان استام ءتۇرلى شارالار ۇيىمداستىردى. بۇل شارالار ايەلدەر مەن جاستار كاسىپكەرلىگىن قولداۋعا باعىتتالدى. سونداي-اق ۇيىم تاراپىنان ەلىمىزدىڭ 25 مىڭنان استام تۇرعىنىنا كومەك كورسەتىلدى.
مەملەكەت شاعىن جانە ورتا بيزنەسكە بارلىق جاعداي جاساپ وتىر. «بيزنەستىڭ جول كارتاسى-2020» باعدارلاماسى ارقىلى شاعىن جانە ورتا بيزنەس سالاسىنداعى ايەلدەردىڭ ۇلەسى 44 پايىزدى قۇرادى. «جۇمىسپەن قامتۋدىڭ جول كارتاسى-2020» باعدارلاماسى اياسىندا ايەلدەر ەڭبەك نارىعىنىڭ تالابىنا ساي بىلىكتىلىكتەرىن جەتىلدىرۋدە.
قازاقستان دۇنيەجۇزىلىك بانكتىڭ «Doing Business» رەيتينگى بويىنشا سوڭعى 10 جىلدا 64-ورىننان 36-ورىنعا كوتەرىلدى.
ەلىمىز تاۋەلسىزدىكتىڭ العاشقى ساتتەرىنەن باستاپ گەندەرلىك ساياساتقا, ايەلدەر مەن بالالاردى قولداۋعا, وتباسىلىق قۇندىلىقتاردى ناسيحاتتاۋعا باسا نازار اۋدارىپ كەلەدى. قازاقستان گەندەرلىك تەڭگەرىم بويىنشا 140 ەلدىڭ اراسىندا 44-ورىندا, ال ايەلدەردىڭ ەكونوميكالىق جاعدايى بويىنشا 30-ورىندا تۇر.
قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ جۇرگىزگەن ساليقالى ساياساتى ارقاسىندا تاۋەلسىز ەلىمىز مىقتى مەملەكەت بولىپ قالىپتاستى. ءبىزدى الەم مويىندادى.
ءبىز, كاسىپكەر ايەلدەر, بارلىق وتانداستارىمىزدى 2019 جىلدىڭ 9 ماۋسىمىندا وتەتىن قازاقستان رەسپۋبليكاسى پرەزيدەنتىنىڭ سايلاۋىنا بەلسەندى تۇردە قاتىسۋعا شاقىرامىز.
«قازاقستاننىڭ ىسكەر ايەلدەر قاۋىمداستىعى» رقب
24 ءساۋىر, 2019 جىل