ءباسپاسوز مالىمەتىندە حابارلانعانداي, قازاقستان حالىق اسسامبلەياسى ماڭعىستاۋ وبلىستىق فيليالىندا «بيلەر كەڭەسىن» قۇرۋ جانە ولاردىڭ مۇشەلەرىن سايلاۋ جونىندە كەڭەس وتىرىسى ءوتتى. وتىرىستا قوعامدىق بىرلەستىك رەتىندە قۇرىلاتىن «بيلەر كەڭەسىنىڭ» توراعاسى بولىپ ءبىراۋىزدان حيميا عىلىمدارىنىڭ كانديداتى, قالالىق ءماسليحات دەپۋتاتى مارات مولداعۇلوۆ, حاتشىسى بولىپ وتستاۆكاداعى سۋديا گۇلجاحان يمانعاليەۆا سايلاندى.
سونداي-اق, «بيلەر كەڭەسىنىڭ» 9 مۇشەسى مەن 3 ادامنان تۇراتىن جۇمىس توبى بەلگىلى بولىپ, 2019 جىلعا ارنالعان جۇمىس جوسپارى بەكىتىلدى.
وڭىردە العاش پايدا بولعان «بيلەر كەڭەسىنىڭ» قۇرامىنا قوعام قايراتكەرلەرى, وتستاۆكاداعى سۋديالار مەن وبلىستىڭ قۇرمەتتى ازاماتتارى ەنگىزىلدى. اتالعان قۇرام قوعامدا ورىن العان داۋلاردى بىتىمگەرلىكپەن شەشۋ جولدارىن قاراستىراتىن بولادى. كەڭەس توراعاسى الداعى جۇمىس باعىتتارىمەن, كەڭەس مۇشەلەرىنىڭ مىندەتتەرى مەن قۇقىقتارىن ءتۇسىندىردى. «بيلەر كەڭەسىنىڭ» اۋدان, قالالاردا تۇراتىن مۇشەلەرى ءوز تۇرعىلىقتى جەرى بويىنشا تاراپتاردى قابىلداۋعا قۇقىلى. وسىدان سوڭ, وبلىس سوتىنىڭ, ماڭعىستاۋ وبلىسى قازاقستان حالىق اسسامبلەياسىنىڭ بىرىگىپ ۇيىمداستىرعان دوستىق ۇيىندە «بيلەر كەڭەسىنىڭ» جۇمىس باعىتى» تاقىرىبىندا دوڭگەلەك ۇستەل وتكىزىلدى.
ءىس-شاراعا ماڭعىستاۋ وبلىسى اكىمىنىڭ ورىنباسارى ر.ساكەەۆ, ماڭعىستاۋ وبلىستىق سوتىنىڭ توراعاسى ە.داۋليەۆ جانە القا توراعالارى, سۋديالار, «بيلەر كەڭەسىنىڭ» توراعاسى م.مولداعۇلوۆ پەن ونىڭ مۇشەلەرى, ش.ەسەنوۆ اتىنداعى ۋنيۆەرسيتەت وقىتۋشىلار قۇرامى مەن مەدياتورلار, ءوڭىردىڭ قاريالارى مەن وتستاۆكاداعى سۋديالار قاتىستى.
دوڭگەلەك ۇستەلدە ءسوز العان ە. داۋليەۆ قوعامدا ءتۇرلى الەۋمەتتىك, ازاماتتىق, ەكونوميكالىق داۋلاردىڭ قاتارى كوبەيىپ, ءاربىر ءۇشىنشى ادام سوت اۋرەسىندە جۇرگەنىن ايتىپ, داۋلاردى ازايتۋدىڭ ءبىر تەتىگى – تاتۋلاستىرۋ راسىمدەرىن قولدانۋ اياسىن كەڭەيتۋ ەكەندىگىنە نازار اۋداردى.
ر.ساكەەۆ داۋلاردى سوتقا دەيىن شەشۋ تەتىكتەرىن ىسكە قوسۋ, بيلەر كەڭەسىنىڭ جۇمىسىن ۇيىمداستىرۋ, مەدياتورلاردىڭ قىزمەت كورسەتۋ ساپاسىن ارتتىرۋ ماقساتىندا رەسپۋبليكا بويىنشا 200-گە تارتا «بيلەر كەڭەسى» قۇرىلعاندىعىن اتاپ ءوتتى. سونداي-اق, ول وڭىردە «بيلەر كەڭەسىنىڭ» اتقاراتىن جۇمىسى مەن قوعامداعى ءرولى تۋرالى باياندادى.
جيىن بارىسىندا وبلىستىق سوتتىڭ توراعاسى وڭىردە مەدياتسيا كابينەتتەرىنەن بولەك, ماڭعىستاۋ وبلىسى قازاقستان حالىق اسسامبلەياسىنىڭ جانىڭدا, ۋنيۆەرسيتەتتە جانە كاسىپوداقتار ۇيىندە تاتۋلاستىرۋ ورتالىقتارى, «اتامەكەن» ۇكپ وبلىستىق فيليالىندا تاتۋلاستىرۋ سەكتورى قىزمەت كورسەتەتىنىن, الايدا, وسى جۇمىستاردىڭ بارلىعى ءالى دە قوعامدا داۋدى ازايتا الماي وتىرعانىن ايتىپ, داۋلاردى ازايتۋعا «بيلەر كەڭەسى» ۇلكەن ۇلەس قوساتىندىعىنا سەنىم ءبىلدىردى.
ءىس-شارا بارىسىندا «بيلەر كەڭەسىنىڭ» جۇمىسى تۋرالى ارنايى دايىندالعان روليك كورسەتىلىپ, كەڭەس مۇشەلەرىن جاڭا قىزمەتتەرىمەن قۇتتىقتاپ, ولارعا ەستەلىك رەتىندە كيەلى ماڭعىستاۋ ءوڭىرى مەن اڭىزدارى تۋرالى كىتاپتار سىيعا تارتىلدى.