سالتاناتتى جيىن ەلباسى كىتاپحاناسىنىڭ ديرەكتورى ءا.راحىمجانوۆتىڭ قۇتتىقتاۋ سوزىمەن اشىلدى.
«قازاقستان حالقىنىڭ العاش رەت ءوزىنىڭ پرەزيدەنتىن تاڭداۋى – تاريحي وقيعالار اراسىنداعى ەڭ ماڭىزدى شەشىم. قازىرگى تاڭدا ەلىمىز جەتكەن جەتىستىكتەر مەن تابىستاردى قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ كوپجىلدىق ەڭبەگىنسىز ەلەستەتۋ ءمۇمكىن ەمەس. ن.نازارباەۆتىڭ ءاربىر باتىل شەشىمى – الەمدىك ساياساتقا ىقپال ەتۋدىڭ تاپتىرماس ۇلگىسى», دەگەن ول پرەزيدەنت ينستيتۋتىنىڭ قالىپتاسۋىنا ارنالعان كورمەگە العاش رەت تولىق كولەمدە ۇسىنىلعان توپتامالار جيناقتالعانىن ايتتى. بۇدان سوڭ, ل.ن.گۋميلەۆ اتىنداعى ەۇۋ رەكتورى ە.سىدىقوۆ ءسوز سويلەدى.
«ەلىمىزدەگى پرەزيدەنتتىك ينستيتۋت – تاۋەلسىز ەلدىڭ عانا ەمەس, ءبارىمىزدىڭ تاعدىرىمىز, بارشامىزدىڭ قۇندىلىعىمىز. سونىمەن قاتار ول جالپى حالىقتىڭ بيلىككە, تۇراقتى دامۋ كەپىلدىگىنە دەگەن سەنىمى. 2019 جىلدىڭ 19 ناۋرىزىندا ەلباسى ن.ءا.نازارباەۆ سانالى تۇردە پرەزيدەنتتىك وكىلەتتىگىن پارلامەنت سەناتىنىڭ توراعاسى قاسىم-جومارت توقاەۆقا تاپسىردى. وسىلايشا بيلىك ترانسفورماتسياسى جۇزەگە استى», دەدى ە.سىدىقوۆ.
ۇيىمداستىرۋشىلاردىڭ ايتۋىنشا, اتالعان كورمە – ەلباسى كىتاپحاناسى قىزمەتكەرلەرىنىڭ «مۋزەي جيناعى» جوباسى اياسىنداعى عىلىمي-زەرتتەۋ جۇمىستارىنىڭ ناتيجەسى. مۇندا قويىلعان ەكسپوناتتار ەكى بولىمگە توپتاستىرىلعان. ونىڭ ءبىرىنشىسى قۇرمەت بەلگىسى – اساتاياققا, ال ەكىنشىسى مانتيالارعا ارنالعان.
اتالعان اساتاياقتاردى شەتەلدىك دەلەگاتسيا وكىلدەرى مەن قازاق ەلىنىڭ ازاماتتارى تۇڭعىش پرەزيدەنت – ەلباسىنىڭ ەل دامۋىنا قوسقان وراسان زور ۇلەسى ءۇشىن قۇرمەت رەتىندە سىيعا تارتقان. ءار اساتاياق قازاق حالقىنىڭ قولدانبالى-ساندىك ونەرىنىڭ ەرەجەسىنە ساي جاسالعان. قالىڭ كوپشىلىككە العاش رەت تولىق كولەمدە ۇسىنىلعان توپتامالار تۇڭعىش پرەزيدەنت – ەلباسى ن.نازارباەۆتىڭ مەملەكەتتىك قىزمەتىنىڭ ءبىر قىرىمەن تانىسۋعا مۇمكىندىك بەرەدى.
ەكسپوزيتسيادا ۇسىنىلعان اساتاياقتار زەرگەرلىك جانە كوركەم ونەردىڭ تەڭدەسسىز تۋىندىلارى. ولاردىڭ ءۇستى جارتىلاي اسىل تاستارمەن كومكەرىلگەن, ۇستىڭگى جاعىندا شار تارىزدەس نىشان بار. بۇل نىشاننىڭ رۋحاني باستاۋ رەتىندەگى وزىندىك قاسيەتى بار دەپ ەسەپتەلىنەدى. اساتاياق قازاق حالقىنىڭ داستۇرلەرىن ەسكەرە بەزەندىرىلگەن. ماسەلەن, «قوشقارمۇيىز» حالقىمىزدىڭ بىرلىگىن, مولشىلىق پەن كەلىسىمدى بەينەلەيدى.
ەكىنشى كوللەكتسيادا شەتەلدىك وقۋ ورىندارىنىڭ ەلباسىنا ءار جىلدارى سىيلاعان مانتيالارى جيناقتالعان. مانتيالار الەمنىڭ ءار قيىرىنداعى وقۋ ورىندارىنىڭ قازاقستاننىڭ تۇڭعىش پرەزيدەنتى – ەلباسىنىڭ جوعارى ءبىلىمنىڭ ينتەگراتسياسى اياسىنداعى اسا زور تابىستارىن تانۋىنىڭ ايعاعى. كەلۋشىلەر نازارىنا جاپونيا, كورەيا, قىتاي, ۆەتنام, كانادا, رەسەي ەلدەرى ۋنيۆەرسيتەتتەرىنىڭ تۇڭعىش پرەزيدەنت – ەلباسىنا بەرگەن مانتيالارى ۇسىنىلعان.