اتالمىش فورۋمدى قوجا احمەت ياساۋي اتىنداعى حالىقارالىق قازاق-تۇرىك ۋنيۆەرسيتەتى مەن تۇركىستان وبلىسى اكىمدىگى ۇيىمداستىرۋدا. فورۋمعا ءازىربايجان, قىرعىستان, تۇركيا, وزبەكستان ەلدەرىنەن جانە قازاقستان رەسپۋبليكاسىنىڭ وزگە وبلىستارىنان جاس دەلەگاتتار, بەلسەندى جاستار قاتىسۋدا. اتالعان فورۋمنىڭ اشىلۋ سالتاناتى قر اقپارات جانە قوعامدىق دامۋ مينيسترلىگىنىڭ جاستار جانە وتباسى ىستەرى جونىندەگى كوميتەت توراعاسى م. قوجاحمەت, تۇركىستان وبلىسى اكىمىنىڭ ورىنباسارى م. وتارباەۆ, TUGVA تۇركيا رەسپۋبليكاسى جاستار قورىنىڭ پرەزيدەنتى ە.ەمينوگلۋ, يسلام ىنتىماقتاستىعى جاستار فورۋمىنىڭ پرەزيدەنتى ت.ايحان قاتىسىپ, فورۋمعا قاتىسۋشىلارعا ساتتىلىك تىلەدى.
فورۋمنىڭ ماقساتى – ءوڭىردىڭ دامۋى مەن جاستار ساياساتىن دامىتۋ بارىسىندا تاجىريبە الماسۋ, وبلىستىڭ تۋريستىك الەۋەتىن ارتتىرۋعا قوسىمشا سەرپىن بەرۋ, تۇركىتىلدەس ۇلتتار اراسىنداعى باۋىرلاستىق بايلانىستار مەن دوستىق قارىم-قاتىناستى دامىتۋ.
فورۋم اياسىندا جاستاردىڭ كەشكى ەركىن تاقىرىپتا كەزدەسۋلەرى, «Opentalks» فورماتىنداعى سەكتسيالىق جۇمىستارى, قاتىسۋشى دەلەگاتتاردىڭ تۇركىستان ءوڭىرىنىڭ تاريحي جانە كيەلى ورىندارىنا ەكسكۋرسياسى ۇيىمداستىرىلماق.
سونداي-اق, تۇركى كەڭەسى جاس كوشباسشىلارىنىڭ ءىى فورۋمىنىڭ اشىلۋ شاراسىندا تۇركى جاستارىنىڭ سالتاناتتى شەرۋى جانە «تۇركىستانعا ورالۋ» تۇركى حالىقتارىنىڭ ەتنو-ونەر فەستيۆالى باستالدى.
تۇڭعىش رەت ۇيىمداستىرىلىپ وتىرعان ەتنو-ونەر فەستيۆالى تۇركىكىتىلدەس ۇلتتار اراسىنداعى باۋىرلاستىق بايلانىستار مەن دوستىقتى, تۇركىلىك مادەنيەت پەن ونەردى ۇرپاقتان ۇرپاققا دارىپتەۋ, قازاق جانە تۇركىتىلدەس حالىقتاردىڭ ءداستۇرلى مۋزىكاسىن جان-جاقتى جەتكىزۋدى كوزدەيدى.
فەستيۆال بارىسىندا تۇركىتىلدەس حالىقتارىنىڭ ەتنوفولكلورلىق انسامبلدەرى مەن ءداستۇرلى ورىنداۋشىلارى, ۇلتتىق اسپاپتا جەكە ورىنداۋشىلار ونەر كورسەتەدى.
باۋىرلاس ەلدىڭ باسىن قوسقان اۋقىمدا شارادا جينالعان قوناقتار تۇركى حالىقتارىنىڭ قولدانبالى ونەر كورمەسىن تاماشالادى.