الدىمەن جامبىل وبلىسىنىڭ كيەلى ورىندارىن ارالاعان ساياحاتشىلار تۇركىستان وبلىسىنىڭ دا تابيعاتى مەن شەجىرەلى تاريحىمەن تانىستى.
بايدىبەك اۋدانىنداعى اقمەشىت ۇڭگىرىنە كەلگەن قوناقتار مۇنداعى ەرەكشە كورىنىسكە ءسۇيسىندى. عالىمداردىڭ زەرتتەۋىنشە, اقمەشىت ۇڭگىرىندەگى اۋا ادامنىڭ جۇيكەسىن تىنىشتاندىرىپ, قان قىسىمىن جاقسارتادى. بويداعى جاعىمسىز ەنەرگيانى تارتىپ الادى. بەلگىلى سپورت جاناشىرى, «قازاقستان بارىسى» جوباسىنىڭ اۆتورى ارمان شوراەۆ ەكسپەديتسياعا وسى ۇڭگىردى كورۋ ءۇشىن ارنايى كەلگەنىن ايتتى. «كەرەمەت اسەر الدىم», – دەيدى ول. ال تانىمال رەجيسسەر اقان ساتاەۆ تۇركىستان وبلىسىندا فيلم تۇسىرۋگە سۇرانىپ تۇرعان ورىندار وتە كوپ ەكەنىن, بولاشاقتا وسى باعىتتا جۇمىس ىستەۋگە قارسى ەمەس ەكەنىن ءسوز ەتتى. ولكەتانۋشى, «وڭتۇستىك اڭىزدارى» باعىتىنىڭ اۆتورى ەرلان سىزدىقتىڭ ايتۋىنشا, ساياحاتشىلاردىڭ العان اسەرلەرى كەرەمەت. ولاردى ولكەنىڭ تابيعاتى مەن اڭىزدارى قاتتى قىزىقتىرعان. ەگەر سۇرانىس بولسا, وسى باعىت بويىنشا تۋريستىك باعىت جالعاسادى. وسى ارقىلى تۇركىستان وبلىسىنىڭ ءتۋريزمى داميدى. 4 اۆتوبۋس پەن 60-تان استام جەڭىل كولىككە مىنگەن ساياحاتشىلار تابيعات اياسىندا تاماقتانىپ, ناعىز كوشپەندىلەرگە ءتان ءومىردى سەزىندى.
بۇعان دەيىن رەسپۋبليكا كولەمىندە 3 ەكسپەديتسيا وتسە, اۋقىمى جانە قاتىسۋشىلار سانى جاعىنان ەڭ ۇلكەنى – وسى «وڭتۇستىك اڭىزدارى».
اقمەشىت ۇڭگىرىنە ايالداعان سوڭ ساياحاتشىلار دومالاق انا كەسەنەسىنە زيارات جاسادى. سونداي-اق شايانداعى اپپاق يشان مەشىتىنە دە ات باسىن بۇرىپ, تاريحىمەن تانىستى.
مارعۇلان سەيسەمباەۆتىڭ باستاماسىمەن قۇرىلعان ەكسپەديتسيا قۇرامىندا ەلگە تانىمال قوعام قايراتكەرلەرى, زيالى قاۋىم وكىلدەرى, ولكەتانۋشىلار, جۋرناليستەر, ونەر قايراتكەرلەرى, كاسىپكەرلەر مەن سپورتشىلار جانە وزگە دە سالا وكىلدەرى بار. ساياحاتشىلار تۇركىستان وبلىسىندا تۋريزم سالاسىنىڭ بولاشاعى زور ەكەنىن جەتكىزدى. ەلباسىنىڭ «رۋحاني جاڭعىرۋ» ماقالاسىندا دا وسى سالاعا ءمان بەرىلگەن. رەسپۋبليكا بويىنشا كيەلى جانە تۋريستىك ورىندار سانى بويىنشا دا تۇركىستان وبلىسى الدىڭعى قاتاردا.
شەجىرە مەن اڭىزعا تولى وڭىرگە قادام باسقان ەكسپەديتسيا مۇشەلەرى ەرتەڭ وبلىستاعى وزگە دە كيەلى ورىنداردى ارالايدى.